Bütün xarici təsirlərə baxmayaraq, son illər ərzində Azərbaycan inkişaf və təkmilləşməyə doğru addımlar atır. Müstəqilliyin başlanğıcında Azərbaycan Dağlıq Qarabağ münaqişəsi ilə bağlı ciddi problemlərlə üzləşdi. Nəticədə ölkə humanitar fəlakət, bir milyon qaçqın və məcburi köçkünün mövcudluğu ilə üzləşdi. Buna baxmayaraq, ölkə iqtisadi böhranla uğurla mübarizə apardı və sabitliyə nail oldu. Azərbaycan öz inkişaf yolunu davam etdirir və bugünkü nailiyyətlər bir çox sahədə əldə edilmiş yüksək səviyyəni nümayiş etdirir. Bu gün bu faktı dünyanın aparıcı institutları və beynəlxalq maliyyə təşkilatları da təsdiq edirlər.
Son zamanlar əhalinin sosial rifah halının gücləndirilməsi istiqamətində silsilə işlər həyata keçirilir. Minimum əməkhaqqının təqaüd və müavinətlərin artırılmasının şahidi oluruq. Əməkhaqqı və təqaüdlərin artırılması əhalinin sosial rifah halının yüksəlməsinə səbəb olur.
Əhalinin sosial durumunun daha da yaxşılaşması üçün yenidən əməkhaqqı və təqaüdlərin artımı gözlənir. Bu xoş xəbəri Prezident İlham Əliyev aprelin 18-də Bakının Suraxanı rayonunun Qaraçuxur qəsəbəsində əsaslı şəkildə yenidən qurulan Neftçilər parkında yaradılan şəraitlə tanış olarkən əhaliyə bildirib. O qeyd edib ki, minimum əməkhaqqının, pensiyanın təxminən 40% qaldırılması önəmli addımdır. Artım böyük olsa da, bu bizi qane edə bilməz. Çünki bizdə maaşlar və pensiyalar bundan sonra da qaldırılacaq: “Müvafiq göstərişlər verilib, indi hökumətdə iş aparılır. Müvafiq nazirliklərə göstəriş verildi. Bizim maliyyə imkanlarımız artır. Çünki ölkəmizdə aparılan ciddi iqtisadi islahatlar bizə əlavə gəlirlər gətirir. Bu ilin əvvəlindən kifayət qədər böyük rəqəm artıq büdcəyə daxil oldu. Mənim göstərişimlə əlavə yığılan büdcə gəlirləri ilk növbədə vətəndaşların sosial müdafiəsinə istiqamətləndirilməlidir. O cümlədən, maaşların, pensiyaların qaldırılmasına”.
Prezident qeyd edib ki, minimum əməkhaqqı, minimum pensiyalar Azərbaycanda bundan sonra da qaldırılacaq ki, vətəndaşlar daha da yaxşı yaşasınlar.
Ölkə ictimaiyyəti və ekspertlər əməkhaqqı və təqaüdlərin artırılmasını müsbət qarşılayırlar. Əməkhaqqı və pensiyaların məbləğinin qaldırılmasının hansı civarda olacağını öyrənmək üçün araşdırma apardıq.
Aydın Hüseynov: “Hər il 15-20 faiz civarında əməkhaqqı, təqaüd və müavinətlərin artırılması nəzərdə tutulur”
Millət vəkili Aydın Hüseynov “Bakı-Xəbər”ə açıqlamasında qeyd etdi ki, cari ilin yanvar ayından etibarən Prezident İlham Əliyevin sərəncamları ilə böyük sosial paket təqdim olundu: “Məlum olduğu kimi, pensiya, müavinət, təqaüd, əməkhaqqı və minimum əməkhaqqının məbləği artdı. Artımın baş verməsinin səbəbini bəzi şəxslər müxtəlif formada izah etdilər. Bir qisim bunun “qara yollarla” baş verdiyini iddia etdi. Ancaq artımların əsas səbəbi ölkə iqtisadiyyatının dinamik inkişafının təmin olunmasıdır, beləliklə, dövlət büdcəsinə əlavə vəsaitlər daxil oldu”.
Millət vəkilinin sözlərinə görə, hər il 15-20 faiz civarında əməkhaqqı, təqaüd və müavinətlərin artırılması nəzərdə tutulur. A.Hüseynov hesab edir ki, dövlət büdcəsinin icrası ilə bağlı səslənən fikirlər uğurla reallaşarsa, əməkhaqlarının həcmi təxminən 20 faiz civarında artar.
Günel CƏLİLOVA
