Problemli kreditlərin həlli ilə bağlı imzalanmış sərəncamdan sonra martın 28-də müvafiq siyahı açıqlanıb. Bildiyimiz kimi, Maliyyə Bazarlarına Nəzarət Palatası (Palata) bir müddət əvvəl problemli kreditlərin hesablanmasını həyata keçirib və kompensasiya alacaq vətəndaşların siyahısını hazırlayıb.
Tam siyahı isə aprelin 15-də açıqlanıb. Kompensasiya alacaq şəxslər siyahıda adlarını axtarmağa başlayıblar. Ancaq bəzi vətəndaşlar adlarını siyahıda tapmaqda çətinlik çəkirlər. Əsasən bağlanmış banklarda kreditləri olan vətəndaşlar adlarını siyahıda tapmaqda çətinlik çəkirlər.
Elşən Allahverdiyev: “… elektron portalda “Apelyasiya komissiyasına müraciət” bölümü yaradılıb”
Məsələ ilə bağlı məlumat verən Maliyyə Bazarlarına Nəzarət Palatasının mətbuat katibi Elşən Allahverdiyev qeyd etdi ki, həmin vətəndaşlar üçün palatanın rəsmi saytında bölüm yaradılıb: “Adları siyahıda tapılmayan, ancaq onlara kompensasiya və ya restrukturizasiya şamil edilməsindən əmin olan vətəndaşlar üçün elektron portalda “Apelyasiya komissiyasına müraciət” bölümü yaratmışıq. Həmin bölümdə müvafiq xanaları dolduraraq şikayət edə bilərlər. Apelyasiya komitəsi ona baxır və 15 iş günü müddətində vətəndaşa cavab verilir. Həqiqətən, ola bilər ki, hansısa texniki məsələ ilə bağlı həmin şəxsin adı siyahıda çıxmayıb”.
Elşad Məmmədov: “Kompensasiya alacaq şəxslər siyahısında adını tapa bilməyənlər Maliyyə Bazarlarına Nəzarət Palatasına müraciət etməlidirlər”
İqtisadçı-ekspert Elşad Məmmədov bizimlə söhbətində qeyd etdi ki, problemli kreditlərlə bağlı Prezident İlham Əliyev tərəfindən imzalanan sərəncamda konkret olaraq qeyd olunur ki, həmin ərəfədə bütün kommersiya banklarından kredit götürmüş şəxslərə kompensasiya ödəniləcək. Eynilə, bağlanmış banklardan vaxtilə kredit götürən şəxslər də kompensasiya almalıdırlar: “Problemli kreditlərlə bağlı ödənişin edilməsinə və digər problemlərin həll olunmasına nəzarət Maliyyə Bazarlarına Nəzarət Palatasına tapşırılıb. Kompensasiya alacaq şəxslər siyahısında adını tapa bilməyənlər Maliyyə Bazarlarına Nəzarət Palatasına müraciət etməlidirlər. İcra mexanizmi ilə bağlı konkret işlər hazırlanıb və müvafiq qərarda da göstərilib”.
Günel CƏLİLOVA
