Pərviz Heydərov: "Yeni mexanizm yaradılmalı, kooperativ təsərrüfat üsullarından istifadə imkanları geniş tətbiq olunmalıdır"
"Mal əti ilə özümüzü 95, qoyun əti ilə 99 faiz təmin edirik". Bu sözləri Prezident İlham Əliyev "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunmuş konfransda deyib.
O bildirib ki, ölkə bütün növ tərəvəzlə özünü 96 faiz təmin edir: "Kartofla təminat 86 faizdir, bu bir az aşağı düşüb. Şəkərlə özümüzü 115 faiz təmin edirik. Ancaq bunun tərkibində 73 faiz xarici faktor var".
Dövlət başçısı qeyd edib ki, Azərbaycan idxaldan asılılığa son qoya və ixracın artmasına nail ola bilər: "Yeni dövriyyəyə cəlb edilən torpaqlar hesabına idxaldan asılılığa son qoya və ixracın artmasına nail ola bilərik. Keçən il 90 min ton pambıq tədarük etmişik. Bu il isə 200 min ton pambıq istehsalı gözləyirik. Bu sahə Mingəçevirdə yaradılacaq sənaye parkının təminatı ilə bağlıdır. Mingəçevirdə təməlini qoyduğumuz iplik və digər sahələrlə bağlı zavodlar bu ilin sonlarında istifadəyə verilməlidir. Yeri gəlmişkən, hazırda 37 rayonda insanlar baramaçılıqla məşğuldurlar. 2019-cu ildə 1300 ton barama istehsalı planlaşdırılır".
Dövlət başçısının çıxışından o da məlum olub ki, taxılçılıq az gəlir gətirən sahə olsa da, strateji sahədir. O deyib ki, hazırda Azərbaycan özünü 53 faiz taxılla təmin edir və bu göstərici artırılmalıdır.
Bütün bu deyilənlərin fonunda, ərzaq idxalından asılılığa necə son qoymaq olar və bu nə zaman mümkün ola bilər? Sözügedən məsələni dəyərləndirən iqtisadçı-ekspert Pərviz Heydərovun fikrincə, bundan sonra kənd təsərrüfatını inkişaf etdirməyin qayğısına daha çox qalmaq lazımdır: "Zavod və fabriklərin yaradılması öz yerində, lakin aqrar məhsulların istehsalı və tədarükü bölgələrimizin iqtisadiyyatında əsas gəlir mənbəyini təşkil etməlidir. Ölkədə əmək qabiliyyətli əhalinin 40 faizə yaxın hissəsi məhz aqrar istehsalla bağlı sahələrdə yerləşir. Buna görə də kənd təsərrüfatı məhsulları istehsalına münasibət dəyişməlidir. Yeni mexanizm yaradılmalı, kooperativ təsərrüfat üsullarından istifadə imkanları geniş tətbiq olunmalıdır. Bu baxımdan, Prezidentin 6 dekabr 2016-cı il tarixində imzaladağı "Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında" Fərman çox əhəmiyyətlidir. Bu, ölkəmizin yeni iqtisadi situasiya ilə əlaqədar seçməli olduğu növbəti inkişaf modelinin, bir növ, bünövrə mexanizmini müəyyən edir. Sözügedən strategiyanın əhəmiyyəti ondan ibarətdir ki, bundan sonra atılacaq bütün zəruri addımlar məhz göstərilən sahələr və istiqamətlər üzrə hazırlanmış strateji yol xəritələrinə uyğun olacaq. Bunların sırasında kənd təsərrüfatı məhsullarının istehsalına və emalına dair "Strateji Yol Xəritəsi" xüsusən böyük əhəmiyyətə malikdir. Çünki kənd təsərrüfatının inkişafı hökumət üçün həmişə prioritetdir və indiki şəraitdə bunun önəmi daha da artıb. Bu sahədə dövlət-özəl investisiya fondunun yaradılması isə, nəzəri baxımdan, xüsusən uğurlu təklifdir. Ölkədə kənd təsərrüfatının sürətli inkişafını təmin etmək üçün dövlət və özəl sektor tərəfdaşlığı olduqca vacibdir və hökmən stimullaşdırılmalıdır. Bütün bunların kompleks şəkildə görülməsi ərzaq idxalına son qoya bilər".
Vidadi ORDAHALLI
