Fuad İbrahimov: “Avropanın Azərbaycandan elektrik enerjisi idxalı qaçılmazdır”
IV Şuşa Qlobal Media Forumunda çıxış edən Prezident İlham Əliyev deyib ki, elektrik enerjisinin Avropa bazarına ixracı gündəliyimizin əsas istiqamətlərindən biridir:
“Ölkəmizdə bu sahədə artıq böyük işlər görülüb və işlər yekunlaşıb. Lakin qeyd etdiyim kimi, həm ənənəvi enerji resurslarımıza, həm də bərpaolunan enerji mənbələrinə tələbat artmaqda davam edəcək. Bizim bərpaolunan enerji sahəsində çox böyük potensialımız var. Təkcə Qarabağda ümumi gücü 340 meqavat olan su elektrik stansiyaları artıq istifadəyə verilib. Bundan əlavə, növbəti bir il ərzində 340 meqavat gücündə Günəş elektrik stansiyalarının tikintisi də başa çatdırılacaq. Buna görə, elektrik enerjisinin Avropa bazarına ixracı gündəliyimizin əsas istiqamətlərindən biridir. Çünki Avropa bazarının əlavə enerji resurslarına ehtiyacı var və bizim əlavə imkanlarımız var”.
Sözügedən məsələni baki-xeber.com-a şərh edən iqtisadçı-ekspert Fuad İbrahimovun fikrincə, enerji təhlükəsizliyi məsələsi müasir dünyanın ən aktual məsələlərindən biridir: “Pandemiya dövründən sonra dünya iqtisadiyyatının parametrlərində dəyişikliklər var. Bu, həm də qlobal münaqişələrlə bağlıdır. Yəni bu gün logistik dəhlizlərin və enerji təhlükəsizliyi ilə bağlı mənbələrin rolu artıb. Enerji təhlükəsizliyini təmin edən ölkələr öz regionunda, hətta qitələrarası bir varlığa çevrilib. Bu nöqteyi-nəzərdən Azərbaycan Şərqlə-Qərb, eyni zamanda regionda Şimalla Cənub arasında elastik dəhlizlərin mənbəyi kimi cazibədarlığını qoruyub saxlayır. Bununla yanaşı, enerji təhlükəsizliyi nöqteyi-nəzərindən Azərbaycan zəngin təbii sərvətlərini iqtisadi dövriyyəyə cəlb edib. İndi də biz bərpa olunan enerji mənbələrini iqtisadi dövriyyəyə cəlb edilməsi istiqamətində çalışırıq. Digər tərəfdən müasir dövrdə elə yeniliklər baş verir ki, bunlara çevik reaksiya vermək lazımdır. Artıq süni intellekt mərhələli şəkildə idarəetmənin əvəzolunmaz bir parçasına çevrilir. Bu qüvvə artıq işlərin yüngülləşməsində, zaman itkisinin qarşısının alınmasında və digər proseslərin idarə edilməsində əvəzolunmaz rol oynayır. Elektrik enerjisi, enerji mənbəyi olmadığı halda bütün bu müasir dövrün tələblərini, idarəetmə sistemini, avtomatlaşdırılmış idarəetmə sistemini nizamlamaq mümkün deyil. Yəni belə bir halda fasilələrin baş verməsi böyük bir sistemi iflic edə bilər. Odur ki, enerji ilə təmin olunma müasir dövrün tələblərinin ən vacib göstəricilərindən biridir. Elektrik yoxdursa, informasiya bazası yoxdur, data bazaları yoxdur. Data bazaları yoxdursa, hər hansı uçotun aparılması, sistemli şəkildə idarə olunması mümkün deyil. Bu da müasir idarəetmə sistemində böyük problemlər yarada bilər. O üzdən, Avropanın Azərbaycandan elektrik enerjisi idxalı qaçılmazdır. Çünki Avropada hər il elektrik enerjisinə tələbat artır”.
Vidadi ORDAHALLI
