Son bir ildə Azərbaycanda istehlakçıların əczaçılıq məhsulları və tibbi ləvazimatlara çəkdiyi xərc 24,9 faiz artıb. Bu barədə Dövlət Statistika Komitəsinin yaydığı məlumatda bildirilir.
Dövlət Statistika Komitəsi vurğulayır ki, 2026-cı ilin yanvar-iyun aylarında pərakəndə ticarət şəbəkəsində istehlakçılara 32,4 milyard manatlıq, o cümlədən 17,6 milyard manatlıq ərzaq məhsulları, içkilər və tütün məmulatları, 14,8 milyard manatlıq qeyri-ərzaq malları satılıb. 2025-ci ilin yanvar-iyun ayları ilə müqayisədə pərakəndə ticarət dövriyyəsi real ifadədə 3,7 faiz, o cümlədən ərzaq məhsulları, içkilər və tütün məmulatları üzrə 1,4 faiz, qeyri-ərzaq malları üzrə 6,5 faiz artıb. Azərbaycanda tez-tez dərmanların qiymətlərindən şikayətlər eşidilir. Şikayətlərdə həm bir çox dərmanların keyfiyyətsiz olduğu, həm də qonşu ölkələrlə müqayisədə kəskin baha olduğu deyilir. Bundan başqa, cari ilin ilk yarısında Azərbaycan sənayesində sıfıra yaxın artım baş verib. Dövlət Statistika Komitəsinin yaydığı məlumata görə, sənaye sektorunda 2026-cı ilin yanvar-iyun aylarında 33,1 milyard manat məbləğində və ya ötən ilin eyni dövrü ilə müqayisədə real ifadədə 0,1 faiz çox sənaye məhsulu istehsal edilib. Artımın əsasən emal sənayesində baş verdiyi qeyd edilir: “Daha çox artım avtomobil, qoşqu, yarımqoşquların istehsalı (2,2 dəfə), əczaçılıq məhsullarının istehsalı (+35,5%), toxuculuq sənayesi (+34,0%), dəri və dəridən məmulatların, ayaqqabıların istehsalı (+20,6%), sahələrində olub”. Son 1 ayda isə ölkə sənayesində cüzi artım tempində belə azalma olub. DSK 2026-cı ilin yanvar-may aylarında 27,5 milyard manat məbləğində və ya ötən ilin eyni dövrü ilə müqayisədə real ifadədə 0,2 faiz çox sənaye məhsulu istehsalı baş verdiyini açıqlamışdı. Dövlət Statistika Komitəsi onu da bildirir ki, 2026-cı ilin 6 ayında ötən ilin analoji dövrünə nisbətən Azərbaycanda inflyasiya 5,7 faiz təşkil edib. O, cümlədən qida məhsulları, alkoqollu içkilər və tütün məmulatları 6,7 faiz, qeyri-qida məhsulları 3,8 faiz, əhaliyə göstərilmiş ödənişli xidmətlər isə 5,7 faiz bahalaşıb. Həmçinin, Dövlət Statistika Komitəsi bildirir ki, ölkədə rəsmi işləyənlərin sayı azalır. Qurumun açıqlamasına görə, bu il iyunun 1-də ölkədə muzdla çalışan işçilərin sayı 1 milyon 790 min 600 nəfər olub. Onlardan 859,9 min nəfəri dövlət sektorunda, 930,7 min nəfəri qeyri-dövlət sektorunda fəaliyyət göstərib. DSK-nın statistikasına görə, rəsmi işləyənlərin sayı ondan 1 ay əvvəllə müqayisədə 2, ilin əvvəlinə nisbətdə isə 18 minə yaxın azalıb. Azalma daha çox qeyri-dövlət sektorunda baş verib.
Samirə SƏFƏROVA
