Azər Allahverənov: “Hətta il ərzində Azərbaycan üzərindən daşınan yüklərin həcmi 70 milyon ton ola bilər”
Şuşada “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda keçirilən IV Şuşa Qlobal Media Forumunun açılış mərasimində çıxış edən Prezident İlham Əliyev deyib ki, xoşbəxtlikdən, biz yüklərin artan həcminin daşınmasını təmin etməyə hazır idik:
“Bir sözlə, bütün həmin meyarlar Azərbaycanın əhəmiyyətini birmənalı şəkildə artırır. Xoşbəxtlikdən, biz yüklərin artan həcminin daşınmasını təmin etməyə hazır idik. Hazırda biz öz imkanlarımızı artırırıq. Dəniz ticarət limanımıza gəldikdə, hazırda o, 15 milyon ton imkanı ilə Xəzərdə ən iri limandır və onun həcmi 25 milyon tonu təmin etmək üçün artırılacaq. Hazırda biz Avropaya və geriyə yükləri daşımaq üçün öz gəmiqayırma zavodumuzda 10 gəmini tikirik. Mərkəzi Asiya ölkələri və Avropa Komissiyası ilə sıx münasibətlərimiz hər iki istiqamətin mərkəzində dayanır və bu, həqiqətən böyük üstünlük yaradır”.
Sözügedən məsələni baki-xeber.com-a şərh edən millət vəkili Azər Allahverənovun fikrincə, Prezident Əliyev Avrasiya qitəsində realizə olunan çoxsaylı inteqrasiya layihələri ilə bağlı vacib fikirlər səsləndirdi: “Bu, nəticə etibarı ilə bir daha onu göstərdi ki, formatına görə media üzərində qurulan Forumda həm də qlobal məna kəsb edən və geosiyasi əhəmiyyətə malik olan çox vacib mövzuların müzakirəsi keçirildi. Bir daha məlum oldu ki, Azərbaycanın beynəlxalq münasibətlər sistemində rolu artır. Azərbaycan bu gün Avrasiya üçün mühüm əhəmiyyət kəsb edən iki çox vacib sütun üzərində inteqrasiya layihələrini reallaşdırmaqdadır. Bunlardan biri bilavasitə enerji təhlükəsizliyi ilə bağlıdır. Digəri isə beynəlxalq yükdaşımalar və nəqliyyat-logistika layihələri ilə bağlıdır. Bu gün Orta Dəhliz layihəsinin uğurla realizə olması məhz Azərbaycanın zamanında inşa etdirdiyi Bakı-Tbilisi-Qars dəmir yolu əsas seqment olaraq özünü biruzə verməkdədir. İldən-ilə Orta Dəhliz üzərindən daşınan yüklərin həcminə diqqət etdikdə görürük ki, həmin həcmin artırılması bilavasitə BTQ-nin potensialının tam şəkildə istifadəsi ilə bağlıdır. Xüsusən də infrastrukturun modernləşməsi və böyük həcmdə yükaşırma qabiliyyətinin artırılması üçün Azərbaycan böyük sərmayələr yatırmaqdadır. Nəticədə Digər mühüm məqam isə Bakı Dəniz Limanı ilə daşınan yüklərin həcminin artmasıdır. Bununla bağlı çox vacib hədəflər müəyyən edilib. Yaxın illərdə bu dəniz limanı ilə daşınan yüklərin həcmi 25 milyon tona çatdırılacaq. Həm infrastruktur buna uyğunlaşdırılır, həm də Ələtdə ilin sonunda beynəlxalq hava limanının istifadəyə verilməsi nəzərdə tutulub. Bu da bütövlükdə Xəzər dənizi üzərindən daşınan yüklərin həcminin artırılmasına gətirib çıxardır. Başqa bir tərəfdən gələcəkdə Zəngəzur dəhlizinin istifadəyə verilməsi nəticə etibarı ilə daşınan yüklər bir neçə dəfə artacaq. Bu baxımdan Azərbaycan öz üzərinə düşən işi görüb. Xüsusən Ağbəndə qədər olan yolların çəkilməsini uğurlu şəkildə tamamlamaq üzrədir. Zəngəzur dəhlizi açılandan sonra bu, beynəlxalq yükdaşımalara ciddi impuls verəcək. Bir sözlə, bir sıra layihələr həyata keçiriləndən sonra Orta Dəhliz üzərindən daşımalar kəskin artacaq. Hətta il ərzində Azərbaycan üzərindən daşınan yüklərin həcmi 70 milyon ton ola bilər”.
Vidadi ORDAHALLI
