Beyləqan rayonunun Birinci Aşıqlı kəndində "Aqrar Sığorta – Güvənli Gələcək!" layihəsi çərçivəsində fermerlər üçün növbəti maarifləndirici təlim təşkil olunub. 10 iyul 2026-cı ildə keçtilən tədbirin əsas məqsədi kənd təsərrüfatı ilə məşğul olan fermerlərin aqrar sığorta sistemi barədə məlumatlılığını artırmaq, onları mövcud sığorta imkanlarından istifadəyə təşviq etmək və kənd təsərrüfatında risklərin düzgün idarə olunması ilə bağlı biliklərini genişləndirmək olub.
Təlim "Liberal İqtisadçılar Mərkəzi" İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən "Aqrar Sığorta – Güvənli Gələcək!" layihəsi çərçivəsində baş tutub.
Tədbir zamanı iştirakçılara aqrar sığortanın əhəmiyyəti, sığortalanan kənd təsərrüfatı riskləri, dövlətin təqdim etdiyi dəstək mexanizmləri, sığorta müqaviləsinin bağlanması qaydaları, zərər baş verdiyi halda müraciət prosedurları, həmçinin fermerlərin hüquq və öhdəlikləri barədə ətraflı məlumat verilib. Mütəxəssislər mövzunu real praktik nümunələr əsasında izah edib, fermerlərin çoxsaylı suallarını cavablandırıblar.
Çıxışlarda bildirilib ki, aqrar sığorta təbii fəlakətlər, dolu, sel, güclü külək, yanğın və digər risklər nəticəsində yaranan maliyyə itkilərinin azaldılmasında mühüm rol oynayır. Fermerlərin aqrar sığortadan istifadə etməsi onların təsərrüfat fəaliyyətinin davamlılığını təmin etməklə yanaşı, kənd təsərrüfatının dayanıqlı inkişafına da töhfə verir.
Təlimdə Birinci Aşıqlı kəndi və ətraf yaşayış məntəqələrindən olan fermerlər, ailə-kəndli təsərrüfatı sahibləri və kənd təsərrüfatı sahəsində çalışan vətəndaşlar fəal iştirak ediblər. Tədbirin sonunda iştirakçıların sualları cavablandırılıb, aqrar sığorta xidmətlərindən istifadə imkanları barədə ətraflı izahat verilib.
Qeyd edək ki, "Aqrar Sığorta – Güvənli Gələcək!" layihəsi 1 may–31 iyul 2026-cı il tarixlərini əhatə edir. Layihə çərçivəsində Beyləqan rayonunun müxtəlif kəndlərində fermerlər üçün silsilə maarifləndirici görüş və təlimlərin keçirilməsi nəzərdə tutulub.
Eyni zamanda, layihə çərçivəsində fermerlərin operativ məlumatlandırılması məqsədilə 099 470 43 01 nömrəsi vasitəsilə mobil məsləhət xidməti fəaliyyət göstərir. Fermerlər aqrar sığorta ilə bağlı suallarını bu nömrəyə ünvanlayaraq mütəxəssislərdən ödənişsiz məsləhət ala bilərlər.
"Liberal İqtisadçılar Mərkəzi" İctimai Birliyi hesab edir ki, bu cür maarifləndirici tədbirlər fermerlərin aqrar sığorta sistemindən daha geniş istifadə etməsinə, kənd təsərrüfatında risklərin səmərəli idarə olunmasına və ölkədə dayanıqlı aqrar inkişafın gücləndirilməsinə mühüm töhfə verir.
"Liberal İqtisadçılar Mərkəzi" İctimai Birliyinin mətbuat xidməti
