Fuad İbrahimov: “Problem odur ki, bəzi məmurlar qeyri-neft sektorunu inkişaf etdirmək üçün sahibkarlara imkan vermir”
Prezident İlham Əliyev İslam İnkişaf Bankı Qrupunun 2026-cı il üzrə İllik Toplantılarının açılış mərasimində çıxışında bildirib ki, biz ixracımızda neft, qaz və qeyri-neft və qaz sektorunun balansının dəyişdirilməsini davam etdirmək üçün gərgin çalışmalıyıq:
“Biz ixracımızda neft, qaz və qeyri-neft və qaz sektorunun balansının dəyişdirilməsini davam etdirmək üçün gərgin çalışmalıyıq. Bu gün ixracımızın mütləq əksəriyyətini enerji resursları təşkil edir. Beləliklə, biz vəziyyəti dəyişmək üçün çox gərgin çalışırıq və bunun üçün əlbəttə ki, bizə daha çox islahatlar, daha çox investisiyalar və yeni bazarlar lazımdır və bu da problemdir. Çünki bazarlar uğrunda, mən belə deyərdim, çox fəal mübarizə gedir”.
Görünən odur ki, qeyri-neft sektorunun inkişafında bazarların tapılması asan olmayacaq. O baxımdan bu istiqamətdə xüsusən də nələrin edilməsinə ehtiyac var?
Sözügedən məsələni baki-xeber.com-a şərh edən iqtisadçı-ekspert Fuad İbrahimov bununla bağlı bir sıra məqamlara toxundu: “Qeyri-neft sektorunda əsaslı irəliləyişə nail ola bilməməyimiz ən ağrılı məsələlərdən biridir. Bu istiqamətdə səy göstərən bir nömrəli və tək adam cənab Prezidentdir. Problem ondadır ki, Prezidentdən başqa bu məsələyə məmurların demək olar hamısı biganə yanaşır. Bunun üçün hərtərəfli şərait yaratmaq lazımdır. Həm daxildə, həm də xaricdən kifayət qədər iş adamı gəlib bu sahədə iş görmək istəyərdi. Azərbaycan elə əlverişli mövqedə yerləşir ki, bu sahənin inkişafı səmərəli nəticələr verə bilər. Sadəcə buna hərtərəfli iqtisadi zəmin yaradılmalıdır. Bura daxildir əlverişli investisiya mühiti, bürokratik əngəllərin aradan qaldırılması, sağlam rəqabət və vergi qanunvericiliyinin təkmilləşdirilməsi. Bu gün sahibkar işıq, qaz, su çəkilişində texniki şərtlərə ağlasığmaz ödənişlər edirsə, hansı qeyri-neft sektorunun inkişafından söhbət gedə bilər? Təftiş etmək lazımdır ki, bu günə qədər cənab Prezident tərəfindən açılan müəssisələr nə vəziyyətdədir, necə işləyir, nə istehsal edir? Velosiped zavodundan tutmuş akumlyator zavoduna qədər. Artıq biz bu sahədə mövcud olan problemləri dilə gətirməkdən yorulmuşuq. Problem odur ki, bəzi məmurlar qeyri-neft sektorunu inkişaf etdirmək üçün sahibkarlara imkan vermir. Sahibkar ixrac yönümlü məhsul istehsal etmək üçün mütləq şəkildə onun məhsulunun dəyəri rəqabətyönümlü olmalı və nəzərdə tutulan keyfiyyətlərə cavab verməlidir. Buna da o mühit yoxdur. Son zamanlar nə qədər azərbaycanlı iş adamı gedib Özbəkistanda müəssisə açıb. Niyə? Çünki orada sahibkarlara hərtərəfli şərait yaradılıb. Hətta Azərbaycandakı zərgərlərin çoxu belə Özbəkistana köçdü. Halbuki, Azərbaycan zərgərləri bacarıqlarına, əl qabiliyyətlərinə görə, İtaliya zərgərlərindən belə üstün idilər. Ona görə də bu və digər problemlər həll edilmədən Azərbaycanda qeyri-neft sektorunu inkişaf etdirmək çətin olacaq”.
Vidadi ORDAHALLI
