Natiq Cəfərli: "Azərbaycanla da anlaşmalar olsa bunun baş verməsi mümkündür"
Gürcüstan Baş naziri İrakli Kobaxidze deyib ki, Ermənistan Bakı-Tbilisi-Qars dəmir yolu layihəsinə daxil edilə bilər. O bildirib ki, Gürcüstanın beynəlxalq nəqliyyat marşrutlarının inkişafında uzunmüddətli, sıx və effektiv əməkdaşlığı onu Türkiyə və Azərbaycan, eləcə də Ermənistan, Mərkəzi Asiya və digər tərəfdaş dövlətlərlə birləşdirir.
“Ermənistan Bakı-Tbilisi-Qars dəmir yolu layihəsinə daxil edilə bilər. Gürcüstanın birləşdirici funksiyasının inkişafından danışarkən, Ermənistana böyük diqqət yetirilir. Tranzit xidmətlərinin inkişafı da daxil olmaqla, erməni dostlarımızla tərəfdaşlığımızı mümkün qədər dərinləşdirməyə hazırıq”, - Kobaxidze qeyd edib.
Ermənistanın Bakı-Tbilisi-Qars dəmir yolu layihəsinə qoşulması nə dərəcədə mümkündür? Bu nəyə gətirib çıxara bilər? Azərbaycan buna icazə verər, verməz? Çox da ki, bu xəttə qoşulmağı Ermənistan istəyir, amma sərf edərmi? Ermənistan o biri tərəfdən də Qars-Gümrü dəmir yolunu açmaq istəyir. Qars-Gümrü dəmir yolu xəttini açandan sonra Ermənistanın bu yola ehtiyacı qalacaq, qalmayacaq? Bu regionda nə kimi dəyişiklik edə bilər?
İqtisadçı Natiq Cəfərli baki-xeber.com-a bildirdi ki, Ermənistanın bu yola qoşulması mümkündür. “Faktiki olaraq Ermənistandan Gürcüstana, Gürcüstandan isə Axalkalaki üzərindən Türkiyəyə-bu yola qoşulmaq mümkündür. Bu texniki olaraq mümkündür. Qalır burada siyasi və iqtisadi əlaqələrin genişlənməsi və Azərbaycanın icazəsi. Çünki o dəmir yolu Azərbaycana məxsusdur. Baxmayaraq ki, Gürcüstan ərazisindən keçir. Ona görə də Azərbaycanla da anlaşmalar olsa bunun baş verməsi mümkündür. Düşünmürəm ki, Azərbaycan bununla bağlı hansısa bir problem yaradar. Çünki dünənki seçkilərdə də Paşinyan və komandasının qalib gəlməsi sülh prosesinin davam etməsindən xəbər verir. Ona görə də bu kifayət qədər realdır və kifayət qədər də mümkündür. Amma Zəngəzur dəhlizi açıldıqdan sonra Ermənistanın buna ehtiyacı qalmayacaq”.
N.Cəfərlinin sözlərinə görə, Ermənistan elə Zəngəzurdan, Naxçıvandan keçməklə Türkiyəyə daha qısa və daha sərfəli bir yol əldə edəcək.
İradə SARIYEVA
