Aydın Hüseynov: “Ötən 30 il ərzində enerji sektorundan əldə olunan gəlirlər Azərbaycanın iqtisadi inkişafında mühüm rol oynayıb”
Prezident İlham Əliyev Bakı Ekspo Mərkəzində “Bakı Enerji Həftəsi” çərçivəsində keçirilən 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un rəsmi açılış mərasimində Azərbaycanın enerji inkişafının tarixindən də danışıb.
Prezident Əliyev bildirib: “...Azərbaycanın enerji inkişafı 1994-cü ildə başladı. Yeri gəlmişkən, təşkilatçılara da öz dərin təşəkkürümüzü bildiririk. Əgər 1994-cü ilə nəzər salsaq, keçmişdə Azərbaycanın çox ağır vəziyyətdə olduğunu görə bilərik. Ölkə iqtisadi baxımdan tam qarışıq, siyasi baxımdan qeyri-sabit idi. Ərazinin təxminən 20 faizi Ermənistanın işğalı altında idi. Bir milyon qaçqın var idi və həmin vaxt, bu, ola bilsin, adambaşına düşən ən yüksək qaçqın sayı idi. Bizim heç bir vəsaitimiz yox idi. Elektrik enerjisini idxal edirdik. Biz hətta təbii qazı idxal edirdik. Yoxsulluq səviyyəsi 50 faizdən artıq idi. İşsizlik geniş yayılmışdı. Müstəqil ölkə kimi yaşamaq və irəliyə getməkdə bizim üçün yeganə yol sahib olduğumuz təbii sərvətlərdən istifadə idi. Azərbaycan ilk ölkə idi ki, Xəzərin ehtiyatlarını beynəlxalq neft şirkətlərinə açıq etdi. Həmin vaxtdan etibarən çox hadisələr oldu...”
1994-cü ildə başlayan Azərbaycanın enerji yüksəlişi dövrü Azərbaycana ötən bu 30 ildə nələr qazandırdı? Əldə olunan bu qazanclar Azərbaycan dövlətinin dünyadakı mövqeyini və simasını necə dəyişdi?
Millət vəkili Aydın Hüseynov baki-xeber.com-a bildirdi ki, Prezident İlham Əliyevin “Enerji Həftəsi”ndə vurğuladığı kimi, Azərbaycanın enerji yüksəlişi 1994-cü ildən başlayıb. “Həmin il ümummilli lider Heydər Əliyevin rəhbərliyi ilə imzalanmış “Əsrin müqaviləsi” Azərbaycanın müasir inkişaf tarixində yeni mərhələnin əsasını qoydu. Bu qərar ölkənin zəngin enerji ehtiyatlarının beynəlxalq bazarlara çıxarılmasına imkan yaratdı və Azərbaycanın gələcək inkişaf strategiyasını müəyyənləşdirdi.
Ötən 30 il ərzində enerji sektorundan əldə olunan gəlirlər Azərbaycanın iqtisadi inkişafında mühüm rol oynayıb. Bu vəsaitlər hesabına ölkədə geniş infrastruktur layihələri həyata keçirilib, yeni yollar, hava limanları, elektrik stansiyaları, məktəblər, xəstəxanalar və digər sosial obyektlər inşa olunub. Azərbaycanın maliyyə imkanları artıb, iqtisadi müstəqilliyi daha da möhkəmlənib”.
A.Hüseynov qeyd etdi ki, bu dövrdə Azərbaycan beynəlxalq enerji bazarında etibarlı tərəfdaş kimi tanınıb: “Bakı-Tbilisi-Ceyhan neft kəməri, Cənub Qaz Dəhlizi və digər iri layihələr ölkənin strateji əhəmiyyətini artırıb. Hazırda Azərbaycan bir sıra ölkələrin enerji təhlükəsizliyində mühüm rol oynayır və beynəlxalq əməkdaşlığın vacib iştirakçılarından biri hesab olunur.
Enerji sahəsində əldə olunan uğurlar Azərbaycanın beynəlxalq mövqeyinə də müsbət təsir göstərib. Güclü iqtisadiyyat ölkənin siyasi imkanlarını genişləndirib, beynəlxalq təşkilatlarda və regional proseslərdə rolunu artırıb. Azərbaycan bu gün regionun aparıcı dövlətlərindən biri kimi qəbul olunur və bir çox mühüm layihələrin təşəbbüskarı qismində çıxış edir.
Enerji gəlirləri ölkənin müdafiə potensialının gücləndirilməsinə də imkan yaradıb. Silahlı Qüvvələrin modernləşdirilməsi, müdafiə infrastrukturunun yenilənməsi və təhlükəsizlik sahəsində həyata keçirilən tədbirlər Azərbaycanın milli maraqlarının daha etibarlı qorunmasına şərait yaradıb.
Son 30 ilin nəticələri göstərir ki, 1994-cü ildə əsası qoyulan enerji strategiyası Azərbaycana yalnız iqtisadi qazanc gətirməyib. Bu strategiya ölkənin siyasi müstəqilliyini möhkəmləndirib, beynəlxalq nüfuzunu artırıb və onu regional əhəmiyyətə malik güclü dövlətə çevirib. Bu gün Azərbaycanın dünya miqyasında qazandığı mövqe və həyata keçirdiyi beynəlxalq layihələr məhz həmin strateji qərarların nəticəsi kimi qiymətləndirilir”.
İradə SARIYEVA
