Əyyub Kərimli: “…Azərbaycan enerji siyasətinin təkamül xəttini və gələcək prioritetlərini ortaya qoyub”
Prezident İlham Əliyev "Bakı Enerji Həftəsi"nin iştirakçılarına ünvanladığı müraciətdə bir sıra mühüm mesajlar verib. Prezidentin müraciətində bildirilib: “Ölkəmizin enerji tarixi zəngin ənənələrə və mühüm tarixi nailiyyətlərə əsaslanır. Hələ XIX əsrdə Azərbaycanda müasir neft sənayesinin formalaşması ölkəmizi qlobal enerji tarixinin aparıcı mərkəzlərindən birinə çevirmişdir. XX əsr Ümummilli Lider Heydər Əliyevin rəhbərliyi ilə Azərbaycanın beynəlxalq enerji tərəfdaşlıqlarının formalaşdığı dövr olmuşdur. XXI əsrdə isə ölkəmiz artıq “yaşıl enerji”yə keçid və dayanıqlı enerji modelinin qurulması istiqamətində yeni mərhələyə qədəm qoymuşdur”.
Prezident bununla üç əsrdə Azərbaycanın üç böyük enerji strategiyasını bəyan edib.
İqtisadi və Sosial Araşdırmalara Yardım İctimai Birliyinin sədri, iqtisadçı-ekspert Eyyub Kərimli baki-xeber.com-a bildirdi ki, ölkə başçısının müraciətində əsas diqqətçəkən məqam ölkəmizin enerji tarixini üç əsr üzrə strateji mərhələlər şəklində təqdim edilməsidir. “Belə ki, bu yanaşma əslində Azərbaycan enerji siyasətinin təkamül xəttini və gələcək prioritetlərini ortaya qoyub. Bildiyiniz kimi, XIX əsr Azərbaycanın dünya enerji xəritəsində neft ölkəsi kimi formalaşdığı dövr idi. Bakıda sənaye üsulu ilə ilk dəfə neft hasilatının başlanması ölkəmizin qlobal neft sənayesinin əsas mərkəzlərindən birinə çevirdi və Azərbaycan dünya enerji tarixində xüsusi yer qazandı. XX əsrdə isə xüsusilə ümummilli lider Heydər Əliyevin rəhbərliyi ilə enerji resursunun beynəlxalq əməkdaşlıq və geosiyasi tərəfdaşlıq alətinə çevirdiyi mərhələ oldu. Belə ki, “Əsrin müqaviləsi” və sonrakı enerji layihələri Azərbaycanı qlobal enerji təhlükəsizliyinin mühüm ixracatçısına çevirdi. Ölkəyə böyük investisiyalar və uzunmüddətli iqtisadi sabitlik gətirdi. Hesab edirəm ki, XXI əsrdə isə yeni enerji paradiqması formalaşır. Prezidentin də vuğuladığı yaşıl enerji strategiyası onu göstərir ki, Azərbaycan artıq tək neft və qaz ixracatçısı kimi deyil, həm də bərpaolunan enerji istehsalçısı və enerji tranzit mərkəzi kimi də dünyada mövqeyini möhkəmləndirir. Həmçinin Xızı-Abşeron külək elektrik stansiyası, günəş və külək enerji layihələri, eyni zamanda Xəzər dənizi üzərindən planlaşdırılan yaşıl enerji, elektrik ixrac təşəbbüsləri bu strategiyanın praktiki təzahürüdür. Bir sözlə, Prezidentin bu mesajı ölkəmizdə üç əsrdə üç fərqli lakin bir-birini tamamlamayan enerji strategiyası qurulduğunu göstərir”.
Ə.Kərimlinin fikrincə, XIX əsrdə neftin kəşfi, sənayeləşməsi, XX əsrdə enerji diplomatiyası və beynəlxalq tərəfdaşlıq, XXI əsrdə isə yaşıl enerji və dayanıqlı inkişaf modeli vurğulanır. Ekspert qeyd etdi ki, artıq Azərbaycan həm də Avropanın ciddi tərəfdaşıdır. “Bilirsiniz ki, ölkəmiz 11 Avropa ölkəsinə enerji ixrac edir. Digər tərəfdən bu istiqamətdə yaşıl enerjinin əldə edilməsi istiqamətində ciddi investisiyalar həyata keçirir və bu investisiyaların nəticəsində ölkəmiz neft resurslarını artıq yaşıl enerji resurslarına transformasiya edir. Bu da gələcəkdə ölkəmizin enerji daşıyıcısı kimi mövqeyini daha da möhkəmləndirəcək və yenə də Azərbaycanın siyasi-iqtisadi mövqeyi daha da möhkəmlənir, əhəmiyyətini bölgə üçün, region üçün daha da artırır”-deyə Ə.Kərimli vurğuladı.
İradə SARIYEVA
