Azərbaycanın qeyri-neft sektorunun gücləndirilməsi istiqamətində həyata keçirdiyi sənayeləşmə siyasəti çərçivəsində Qaradağ rayonunda “Matanat-A” şirkətinə məxsus “AZWOOL” mineral daş yunu zavodunun açılışı ölkənin sənaye inkişafında mühüm mərhələ kimi qiymətləndirilir.
Prezident İlham Əliyevin açılışda iştirakı bu müəssisənin strateji əhəmiyyətini göstərməklə yanaşı, dövlətin sənaye istehsalına verdiyi dəstəyin ardıcıl olduğunu nümayiş etdirir.
43 milyon manatlıq investisiya dəyərinə malik bu zavodun yaradılmasına dövlət tərəfindən 10 milyon manat güzəştli kredit ayrılıb. Müəssisədə ABŞ, Almaniya və Türkiyədən gətirilmiş son nəsil avadanlıqlar quraşdırılıb və illik istehsal gücü 1,5 milyon kubmetr təşkil edir. Belə bir istehsal həcmi yalnız ölkə daxilində tələbatı qarşılamaqla kifayətlənmir, həm də ixrac potensialı yaradaraq Azərbaycanın qeyri-neft sektoru üzrə valyuta gəlirlərini artırmaq imkanları açır.
Əvvəllər tikinti sektorunda geniş şəkildə zərərli hesab edilən şüşəli parça və şüşəli pambıq kimi izolyasiya materiallarından istifadə olunurdu. Bu materialların tərkibindəki mikroskopik şüşə lifləri işçilərin dərisinə nüfuz edir, güclü qaşınma və dəri qıcıqlanması yaradırdı. Daha təhlükəlisi isə həmin liflərin nəfəs yollarına keçərək tənəffüs sisteminə ciddi zərər vurması idi. Bu səbəbdən bu materiallarla işləyən şəxslər sağlamlıq risqləri ilə üz-üzə qalırdılar. “AZWOOL” zavodunun fəaliyyətə başlaması bu təhlükəli təcrübənin tədricən aradan qalxmasına, sağlamlıq üçün daha təhlükəsiz və ekoloji baxımdan üstün materialların tətbiqinə şərait yaradır.
Daş yunu — təbii vulkanik daşların, əsasən də bazaltın çox yüksək temperaturda əridilərək nazik liflər halına salınması nəticəsində əldə edilən müasir izolyasiya materialıdır. Pambıqvari yumşaq strukturuna baxmayaraq, yüksək dayanıqlığa malikdir və tikinti sektorunda həm istilik, həm də səs izolyasiyası üçün geniş tətbiq olunur. Bu materialın yanmaya və nəmə qarşı davamlılığı, uzunömürlülüyü və ekoloji təhlüksizliyi onu köhnə izolyasiya materiallarına nisbətən daha üstün və təhlükəsiz edir. Buna görə də yeni zavodun fəaliyyətə başlaması yalnız iqtisadi deyil, həm də ictimai sağlamlıq baxımından əhəmiyyətli irəliləyiş hesab oluna bilər.
Zavodun işə düşməsi 180 yeni iş yerinin yaradılmasına səbəb olub. Bu, Qaradağ rayonunun sosial-iqtisadi aktivliyini artırmaqla yanaşı, yeni sənaye infrastrukturunun bölgədə məskunlaşmasına və lokal iqtisadi ekosistemin genişlənməsinə şərait yaradır. İstehsal həcminin böyüməsi ilə əlaqəli olaraq logistika, nəqliyyat, xidmət və texniki dəstək sahələrində də əlavə məşğulluq yaranacağı gözlənilir.
Daxildə istehsal olunan daş yunu, idxalın əvəzlənməsi siyasəti çərçivəsində xüsusi əhəmiyyət kəsb edir. İndiyə qədər xarici ölkələrdən alınan bu materialın ölkədə istehsal olunması həm valyuta axınının qarşısını alır, həm də tikinti sektorunda qiymət sabitliyini təmin edir. Bundan əlavə, muasir texnologiyalar əsasında istehsal olunan yerli məhsulun keyfiyyəti rəqabət qabiliyyətini artırır və ixraca yönələn məhsul portfelini genişləndirir.
Prezidentin zavodun açılışında iştirakı bir tərəfdən sənaye sektoruna dövlət səviyyəsində prioritet yanaşmanın göstəricisidirsə, digər tərəfdən, investorlar və sahibkarlar üçün güclü siyasi dəstək mesajı verir. Bu addım dövlət-özəl sektor əməkdaşlığının inkişafına və yeni investisiya təşəbbüslərinin təşviqinə şərait yaradır.
“AZWOOL” zavodunun istifadəyə verilməsi Azərbaycanın sənayeləşmə prosesində yeni mərhələnin başlandığını təsdiqləyir. Bu layihə təkcə yerli istehsalın güclənməsi və iqtisadi diversifikasiyanın genişlənməsi deyil, həm də daha təhlükəsiz, ekoloji və insan sağlamlığına uyğun tikinti materiallarının tətbiqini təşviq edir. Son nəticədə zavod həm iqtisadi, həm sosial, həm də ekoloji baxımdan ölkənin davamlı inkişaf strategiyasına əhəmiyyətli töhfə verir.
Dəniz NƏSİRLİ
