Kamran Məmmədli: “Kartof və şəkər çuğunduru kimi sahələrə maraq hələ də azdır, bunun əsas səbəblərindən biri fermerlərin hələ də məlumatsız və inamsız olmasıdır”
Azərbaycanda təbiətin qəfil və dağıdıcı təsirlərinə qarşı kənd təsərrüfatı sahəsində risqlərin idarə olunması istiqamətində mühüm addımlar atılmaqdadır.
Məlumdur ki, meyvə bağlarının dolu, leysan, şaxta, sel və digər təbii fəlakətlərdən qorunması məqsədilə fermerlərə sığorta imkanları təqdim olunur. Aqrar Sığorta Fondu tərəfindən tətbiq olunan 50%-lik dövlət güzəşti fermerlərin bu mexanizmdən istifadəsini daha əlçatan edib. Açıqlanan son məlumatlara görə, fermerlər arasında ən çox maraq taxılçılıq və meyvə bağlarına sığorta üzrə müşahidə olunur, şəkər çuğunduru və kartof sahələri isə daha az diqqət çəkir.
Maraqlıdır, ən az maraq göstərilən sahələr - kartof və şəkər çuğunduru üzrə sığortanın təşviqi üçün hansı tədbirlər planlaşdırılır? Bu sahəyə marağın azalmasının səbəbi nədir?
“Kənd təsərrüfatı məhsullarının sığortası üzrə sığorta məbləği bitkinin əkildiyi ərazinin sahəsi, gözlənilən məhsulun miqdarı və qiyməti nəzərə alınaraq hesablanır”
Iqtisadçı Kamran Məmmədli “Bakı-Xəbər”ə şərhində bildirdi ki, qeyri-neft sektorunun ən əsas sahəsi olan kənd təsərrüfatında bəzi işlər aparmaq lazımdır. Bu sahədə atılan ilk addım ekstensiv təsərrüfat sahəsindən intensiv təsərrüfat sahəsinə keçirməkdir.: “Məhsuldarlığı maksimum səviyyəyə çatdırmaq üçün bir sıra tədbirlər görmək mütləqdir. Ölkəmizdə bu sahə ilə bağlı potensialımızın yüksək olmasına baxmayaraq, biz bundan maksimum səviyyədə istifadə etmirik. Ancaq etiraf etmək lazımdır ki, son illər Azərbaycanda aqrar sığorta nəzərəçarpacaq dərəcədə genişlənib. Ödənişlərin artması və sığortalanmış sahələrin genişlənməsi göstərir ki, inam əvvəlki illərlə müqayisədə xeyli yüksəlib. Buna baxmayaraq, kartof və şəkər çuğunduru kimi sahələrə maraq hələ də azdır. Bunun əsas səbəblərindən biri fermerlərin hələ də məlumatsız və inamsız olmasıdır. Məlumdur ki, Aqrar Sığorta Fondu daim sığorta şərtlərini yeniləyir. Ancaq fermerlər hələ də bu sahəyə etibar etmir və təbiət hadisələri zamanı ziyanla qarşılaşır. Fermerlər biilməlidir ki, kənd təsərrüfatı məhsullarının sığortası üzrə sığorta məbləği bitkinin əkildiyi ərazinin sahəsi, gözlənilən məhsulun miqdarı və qiyməti nəzərə alınaraq hesablanır”.
Günel CƏLİLOVA
