Əkrəm Həsənov: “Banklar sahibkarlara kredit verilməsi şərtlərini çətinləşdirir”
Bu il noyabrın 1-nə Azərbaycan banklarının sənaye sahəsi üzrə biznes kredit portfeli 2,692 milyard manat təşkil edib.
Azərbaycan Mərkəzi Bankının yaydığı məlumatda qeyd edilir ki, sənaye sahəsi üzrə kredit portfeli aylıq müqayisədə 8 milyon manat və ya 0,3% azalıb, ötən ilin eyni dövrünə nisbətən isə 101,9 milyon manat 3,6% azalıb.
Məlumat üçün bildirək ki, sənaye sahəsi üzrə banklar tərəfindən verilmiş biznes kreditlərinin məbləği 2025-ci ilin oktyabrın 1-nə 2,684 miyard manat, ötən il noyabrın 1-nə isə 2,794 milyard manat təşkil etmişdi.
Maraqlıdır, sənaye sahəsi üzrə kredit verilişinin azalmasının səbəbi nə ilə bağlıdır?
“Azərbaycanda sənaye kreditinin az verilməsinin səbəbi ölkədə sənaye sahəsinin az inkişaf etməsi ilə bağlıdır”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, Azərbaycanda sənaye biznes kreditinin az verilməsinin səbəbi ölkədə sənaye sahəsinin az inkişaf etməsi ilə bağlıdır: “Hazırda ölkədə sənaye sektoru üzrə inkişaf neft-qaz sahəsində qeydə alınır. Digər sahələrə heç kim vəsait ayırmaq istəmir. Çünki sahibkarlığın inkişafı istiqamətində işlər görülmür, onlar sıxışdırılır. Belə bir şəraitdə banklar da sənaye sahəsinə kredit verməkdən çəkinir. Banklar üçün ən rahat yol istehlak krediti verməkdir. Ümumiyyətlə, bu gün ölkədə etibar ediləcək kiçik və orta biznes nümunələri çox azdır. Banklar onlara kredit verib geri alan zaman bir çox problemlərlə üzləşirlər. Aylıq ödənişlərdə ləngimələr, məbləğın bəzən tam ödənilməməsi kimi məsələlər ortaya çıxır. Ona görə də bankların çoxu bu biznes subyektlərinə kredit verməkdən çəkinir.
Bəzən banklar kredit vermək üçün bu subyektlər qarşısında bir sıra şərtlər qoyur. Yəni kreditin verilməsi prosesini çətinləşdirir. Nəticədə də sahibkarlar biznesləri inkişaf etdirmək üçün banklardan krediti götürə bilmir. Bu zaman isə şikayətlər çoxalır. Sahibkarlar bankları kredit şərtlərinin ağır olmasında günahlandırırlar. Burada əsas məsələ kreditin geri qaytarılması zamanı yaşanan çətinliklərdir. Bu səbəbdən banklar sahibkarlara kredit verilməsi şərtlərini çətinləşdirir”.
Günel CƏLİLOVA
