Fuad İbrahimov: “Belə bir ölkə ilə iqtisadi əlaqələrin genişlənməsinin böyük perspektivi var”
“2024-cü ildə ölkələrimiz arasında tranzit daşımaların həcmi 2023-cü illə müqayisədə 18 faizdən çox artaraq 1,3 milyon tonu keçib. 2025-ci ilin ilk doqquz ayında bu rəqəm təxminən bir milyon tona çatıb ki, bu da nəqliyyat mübadilələrində dinamik artımı nümayiş etdirir”.
Bu barədə Prezident İlham Əliyev Özbəkistanın UzA agentliyinə müsahibəsində bildirib.
Daha sonra Prezident Əliyev bunları qeyd edib: “Ölkələrimiz arasında əməkdaşlığın əsas istiqamətlərindən biri şaxələndirilmiş nəqliyyat və logistika infrastrukturunun inkişafı, tranzit imkanlarının genişləndirilməsidir. Bu sahədə ölkələrimizin Orta Dəhliz Beynəlxalq Nəqliyyat Marşrutunda iştirakı xüsusi əhəmiyyətə malikdir və onun çərçivəsində Azərbaycan Özbəkistan və Mərkəzi Asiya dövlətləri üçün mühüm tranzit ölkə qismində çıxış edir. Son illərdə Orta Dəhliz vasitəsilə ixrac imkanlarının və daşımaların artması xüsusi strateji əhəmiyyətə malikdir”.
“Bu gün Şərqlə Qərb arasında dəhlizlərin heç biri Orta Dəhlizin yerini verə bilməz”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimov hesab edir ki, Orta Dəhlizdən danışanda bu coğrafiyanın önəminə xüsusi diqqət etmək lazımdır: “Şərqlə Qərb arasında qiymət əmələgəlmə prosesinə uyğun, rəqabətyönümlü, vaxt nöqteyi-nəzərindən ən əlverişli dəhlizdir. Bu gün Şərqlə Qərb arasında dəhlizlərin heç biri Orta Dəhlizin yerini verə bilməz. Məsələ ondadır ki, burada artıq praktiki olaraq sınaqdan keçmiş bir dəhlizdən söhbət gedir. İki həftə ərzində Çindən Avropaya məhsulu daşımaq mümkündür. Burada əsas məsələlərdən biri indi kifayət qədər çox o paya yiyələnməkdir. Nəzərə almaq lazımdır ki, Şərqlə Qərbin arasında ticarət dövriyyəsi artıq 1 trilyonu haqlayır. Yəni Çinlə Avropa arasında. Belə bir vəziyyətdə bu məhsulların daşınması, daşınmaya yiyələnmək üçün mütləq şəkildə şaxələnmə lazımdır. Prezident İlham Əliyev Orta Asiya ölkələrinin rəhbərləri ilə görüşündə mütləq şəkildə bunu izah etmək istəyir ki, biz bu tranzit imkanlarını şaxələndirməliyik. Bir Azərbaycanın bu şaxələndirmə işini aparması ilə iş bitmir. Mütləq şəkildə lazımdır ki, digər Orta Asiya ölkələri də bu işdə fəal iştirak etsinlər. Özbəkistan Orta Asiyanın önəmli dövlətlərindən biridir. Əhalisinin sayına görə ən böyük region ölkəsidir. Özbəkistan bütün yerləşdiyi region ölkələri ilə quru sərhədinə malikdir. Özbəkistanda son illər aparılan islahatlar nəticəsində ölkəyə cəlb edilən xarici sərmayələr artır. Belə bir ölkə ilə iqtisadi əlaqələrin genişlənməsinin böyük perspektivi var. Çünki Özbəkistan həm də böyük bazardır. Təsadüfi deyil ki, iki ölkə arasında 2025-ci ilin ilk doqquz ayında tranzit daşımaların həcmi təxminən bir milyon tona çatıb. Bütün bunlar əlaqələrin dinamik inkişafının göstəricisidir. Ona görə də hər iki ölkə bu imkanlardan maksimum yararlanmalıdır”.
Vidadi ORDAHALLI
