Eyyub Kərimli: “Bakı-Tbilisi-Ceyhan boru xəttinin texniki imkanları nefti Fransaya daha qısa müddətdə, sürətli çatdırmasına imkan verir”
Azərbaycanın yanvar-sentyabr dövründə Fransaya xam neft ixracı həm həcmi, həm də dəyəri baxımından əhəmiyyətli artım göstərib. Dövlət Gömrük Komitəsinin məlumatına görə, ölkəmiz bu dövrdə Fransaya 165,1 min ton xam neft göndərərək, 83,4 milyon ABŞ dolları gəlir əldə edib.
Ötən ilin eyni dövrü ilə müqayisədə ixrac həcmi 84,1%, dəyəri isə 1,5 dəfə artıb. Qeyd edək ki, bu göstərici Azərbaycanın ümumi neft ixracının təxminən 0,97%-ni təşkil edir.
Ümumilikdə, yanvar-sentyabr aylarında Azərbaycan 17 milyon ton xam neft və neft məhsulları ixrac edərək 8,9 milyard dollar gəlir əldə edib. Eyni dövrdə ölkənin xarici ticarət dövriyyəsi 35,4 milyard dollar təşkil edib ki, bunun 18,6 milyard dolları ixracın, 16,8 milyard dolları isə idxalın payına düşüb.
Maraqlıdır, Azərbaycanın Fransaya neft ixracının artması hansı amillərlə bağlıdır? Neft ixracının artması iki ölkə arasında əvvəl mövcud olan gərginliyin azalması, münasibətlərin normallaşması ilə əlaqəli ola bilər mi?
“Hazırda Azərbaycandan Fransaya xam neft ixracının artması iki ölkə arasında münasibətlərin istiləşməsi ilə əlaqəli deyil”
İqtisadi və Sosial Araşdırmalara Yardım İctimai Birliyinin sədri, iqtisadçı-ekspert Eyyub Kərimli “Bakı-Xəbər”ə şərhində bunları bildirdi: “Hazırda ölkəmiz enerji sahəsində diversifikasiya siyasəti həyata keçirir. Avropanın bir sıra ölkələrinə neft-qaz ixrac olunur. Məlumdur ki, Fransanın TOTAL şirkəti vaxtilə ölkəmizlə bu sahə ilə bağlı əməkdaşlıq edib. Hazırda Azərbaycandan Fransaya xam neft ixracının artması iki ölkə arasında münasibətlərin istiləşməsi ilə əlaqəli deyil. Məlumdur ki, Fransa Avropanın ən böyük sənaye ölkələrindən biridir. Onların neftə ehtiyacı var. İstənilən halda neftin satışı ölkəmiz üçün əhəmiyyətlidir”.
Həmsöhbətimiz onu da əlavə etdi ki, Rusiya Ukrayna arasında yaşanan müharibə uzanır: “Məlum müharibəyə görə Rusiyaya sanksiyalar təyin olunur. Bu vəziyyət Fransanın neft axtarışına çıxmasına səbəb olub və ölkəmizlə əməkdaşlıq etməkdə məcburdur. Bakı-Tbilisi-Ceyhan boru xəttinin texniki imkanları nefti Fransaya daha qısa müddətdə, sürətli çatdırmasına imkan verir. Fransanın ölkəmizdən neft alması onların marağındadır. Bu hal Azərbaycan üçün iqtisadi cəhətdən böyük nailiyyətdir. Neft ixracı ticarət dövriyyəsinin artmasına səbəb olur. Həmçinin, Avropa bazarında özünü möhkəmləndirmək üçün əlavə fürsətdir”.
Günel CƏLILOVA
