Ölkəmizdə iqtisadi-siyasətin əsas hədəflərindən birinə çevrilən azad sahibkarlıq və liberal iqtisadiyyatın formalaşması məsələsi bütün istiqamətləri ilə özünü göstərir. Azərbaycanda iqtisadiyyatın inkişafına, yerli və xarici investorların cəlb edilməsinə, onlara şərait yaradılmasına xüsusi diqqət yetirilir.
Ölkəmizdə biznes mühitinin inkişafı üçün münbit şərait yaradılıb və bir çox ekspertlərin də dediyi kimi, Azərbaycanın iqtisadiyyatı dayanıqlıdır və investisyalara açıqdır. Bu səbəbdən də xarici şirkətlər tərəddüd etmədən Azərbaycanda müxtəlif sahələrə investisiya qoyurlar. Bu gün Azərbaycan iqtisadiyyatına sərmayə qoymaqda maraqlı olan dünya şirkətləri kifayət qədərdir.
Sentyabrın 22-23-də Bakıda 1-ci Azərbaycan Beynəlxalq İnvestisiya Forumu (1st Azerbaijan International Investment Forum – “AIIF 2025”) keçirildi. İqtisadiyyat Nazirliyinin, İxracın və İnvestisiyaların Təşviqi Agentliyinin-AZPROMO-nun təşkilatçılığı, Avropa Evi - “Ambrosetti”nin (TEHA) strateji tərəfdaşlığı, həmçinin “Euronews” və “Sea Breeze”in media və təşkilati dəstəyi ilə keçirilən forumda dövlət rəsmiləri, biznes liderləri və beynəlxalq investorları bir araya gəldilər.
Qeyd edək ki, Bakıda 1-ci Azərbaycan Beynəlxalq İnvestisiya Forumu Prezident İlham Əliyevin himayəsi altında baş tutub.
Forum Şərq və Qərbin strateji qovşağında yerləşən ölkələrin investisiya imkanlarını araşdırmaq, qlobal ticarətin və dayanıqlı təchizat zəncirlərinin gələcəyini formalaşdırmaq üçün unikal bir platforma təqdim etdi. Burada iştirakçılar yeni qlobal rəqabətlilik paradiqmalarına dair dəyərli biliklər əldə etməklə yanaşı, yüksək səviyyəli əlaqələr qurmaq, strateji sazişlər bağlamaq və yeni tərəfdaşlıqlar formalaşdırmaq imkanları qazandılar.
Tədbirin proqramı çərçivəsində plenar iclaslar, institusional və panel sessiyalar, tematik müzakirələr və ölkəmizin investisiya imkanları və potensialına dair sərginin keçirilməsinin şahidi olduq. İki gün davam edən forumda enerji, nəqliyyat, sənaye, kənd təsərrüfatı, rəqəmsal inkişaf, səhiyyə və daşınmaz əmlak sahələrində regional əməkdaşlıq və investisiya perspektivləri müzakirə olundu.
Forumun ilk günündə regionların strateji inteqrasiyası, tranzit imkanları, enerji və infrastruktur layihələri, innovasiyalar, “yaşıl” enerji, daşınmaz əmlak, şəhərsalma və dayanıqlı inkişaf mövzularında plenar iclas və dörd panel sessiyası baş tutdu. İki gün davam edən forumda enerji, nəqliyyat, sənaye, kənd təsərrüfatı, rəqəmsal inkişaf, səhiyyə və daşınmaz əmlak sahələrində regional əməkdaşlıq və investisiya perspektivləri müzakirə olunub. Tədbirin ilk günündə regionların strateji inteqrasiyası, tranzit imkanları, enerji və infrastruktur layihələri, innovasiyalar, yaşıl enerji, daşınmaz əmlak, şəhərsalma və dayanıqlı inkişaf mövzularında plenar iclas və dörd panel sessiyası baş tutub. Forumun ikinci günü isə dövlət-özəl tərəfdaşlığı, maliyyə, səhiyyə, biotexnologiya, əczaçılıq və rəqəmsal sağlamlıq, kənd təsərrüfatı, aqrobiznes, ərzaq sənayesi, sənayeləşmə, kiçik və orta sahibkarlıq, yaşıl keçid, eləcə də sahibkarlığın inklüzivliyi mövzularına həsr olunan panel sessiyaları keçirilib.
Həm yerli, həm də beynəlxalq ekspertlər Birinci Azərbaycan Beynəlxalq İnvestisiya Forumunu Azərbaycanın iqtisadi həyatında mühüm hadisə kimi dəyərləndirdilər. Ekspertlərə görə, hər bir ölkənin iqtisadi inkişafı üçün investisiya qoyuluşu mühüm əhəmiyyət kəsb edir və investisiya cəlbi üçün isə əlverişli şəraitin olması vacibdir. Ekspertlər qeyd edirlər ki, Azərbaycanda biznes mühitinin yaxşılaşdırılması, investisiya cəlb edilməsi imkanlarının stimullaşdırılması istiqamətində ciddi addımlar atılıb. Ölkə iqtisadiyyatına investisiyaların cəlb olunması məqsədilə hökumət tərəfindən "açıq qapı" siyasəti həyata keçirilir. Hazırda Azərbaycan hökuməti iqtisadi islahatların davam etdirilməsi, biznes mühitinin daha da yaxşılaşdırılması, qeyri-neft sektorunun inkişaf etdirilməsi ilə bağlı tədbirlər həyata keçirir. Ekspertlər qeyd edirlər ki, Azərbaycan müstəqillliyini bərpa etdikdən bu yana xarici investorlarla səmərəli əməkdaşlığa başlayıb, müharibə şəraitinin olmasına, ölkə iqtisadiyyatının çətin vəziyyətinə baxmayaraq, “Əsrin müqaviləsi” kimi mühüm saziş imzalanıb.
Prezident İlham Əliyevin Forum iştirakçılarına müraciətində vurğulanırdı ki, müstəqilliyi qazandıqdan etibarən Azərbaycan xarici investorlarla əməkdaşlığa xüsusi önəm verib, dünyanın aparıcı şirkətləri ilə birlikdə həm ölkəmiz, həm də region üçün mühüm əhəmiyyət kəsb edən layihələrə imza atıb: “Ümummilli lider Heydər Əliyevin təşəbbüsü ilə imzalanmış “Əsrin müqaviləsi” qlobal miqyasda nümunəvi əməkdaşlıq modeli kimi tarixə düşüb, sonrakı illərdə Asiyadan Avropaya qədər uzanan iri transmilli layihələr və logistika şəbəkələrinin inkişafı üçün möhkəm zəmin yaradıb.
Ölkəmizin ərazi bütövlüyü təmin olunandan sonra Azərbaycanın səyləri ilə regionda uzunmüddətli sülh, sabitlik və dayanıqlı inkişafın əsası qoyuldu. Hazırda Azərbaycan xarici siyasətində artıq iqtisadi diplomatiyaya üstünlük verərək diqqətini yeni əməkdaşlıq əlaqələrinin qurulmasına, qeyri-neft sahələrinin, xüsusilə də ölkənin turizm potensialının daha da güclənməsinə istiqamətləndirir”.
Prezident vurğulayırdı ki, Azərbaycanda həyata keçirilmiş sosial-iqtisadi islahatlar və qlobal iqtisadiyyata inteqrasiya aparıcı beynəlxalq şirkətlər üçün ölkəmizdə geniş və əlverişli imkanlar yaradıb: “Məhz bu səbəbdən 2004-2024-cü illər ərzində iqtisadiyyatımıza 344,4 milyard ABŞ dolları həcmində sərmayə qoyulub, bunun əhəmiyyətli hissəsi və ya 213,2 milyard ABŞ dolları qeyri-neft sektorunun inkişafına yönəlib. Bu, xarici investorların Azərbaycana olan etimadı, ölkəmizdə hökm sürən təhlükəsizlik və sabitlik mühitinin bariz göstəricisidir... Bu gün Azərbaycanda iqtisadi artım uzunmüddətli sabit trendə çevrilib. 2021-2024-cü illərdə qeyri-neft sektoru hər il orta hesabla 6,7 faiz artıb və onun ümumi iqtisadiyyatda payı 68 faizə yüksəlib. Qeyri-neft ixracı son altı ildə demək olar ki, iki dəfə artıb. Bu da ölkəmizin rəqabət qabiliyyətinin yüksəlməsinin əyani göstəricisidir. Bütün bu nailiyyətlər ölkədə müasir istehsal infrastrukturunun qurulması ilə dəstəklənib”.
Bu gün Azərbaycan iqtisadiyyatında yaşıl enerji sahəsinin inkişafı baş verir. Ölkəmiz həm bu sahədə, həm də ənənəvi enerji sahəsində müxtəlif dövlətlərlə əməkdaşlıq edir. Prezidentin qeyd etdiyi kimi, Azərbaycan həm bu günün enerji təhlükəsizliyini möhkəmləndirir, həm də sabahın yaşıl iqtisadiyyatını qurur. Bu baxımdan, Birinci Azərbaycan Beynəlxalq İnvestisiya Forumu əməkdaşlıq və sərmayə cəlbi imkanlarının genişləndirilməsi üçün mühüm əhəmiyyət daşıyır. Forumda müxtəlif ölkələrdən yüksək səviyyəli rəsmilər, dünyanın aparıcı yerli və beynəlxalq şirkətlərinin və maliyyə institutlarının, beyin mərkəzlərinin təmsilçiləri, biznes nümayəndələri, qlobal investorlar, yerli və xarici media təmsilçisi daxil olmaqla ümumilikdə 1000-ə yaxın nümayəndə iştirak edib. Ekspertlərin təhlillərinə görə, forumun keçirilməsində məqsəd Şərq və Qərbin, Şimal və Cənubun strateji qovşağında yerləşən Azərbaycanın region ölkələri ilə konkret layihələr üzrə tərəfdaşlıqların genişləndirilməsi, qarşılıqlı faydaya əsaslanan birgə fəaliyyət mexanizmlərinin təkmilləşdirilməsi, eyni zamanda ölkəmizin şəffaf və dayanıqlı iqtisadiyyatı, əlverişli işgüzar mühiti, strateji inkişaf prioritetləri, geniş investisiya imkanları və mühüm nəqliyyat-logistika üstünlükləri barədə məlumatlılığı daha da artırmaq və beynəlxalq marağı təşviq etməkdir. Azərbaycanda açılan 9 sənaye parkı, sənaye məhəllələri və Aqroparklar investorlar üçün xüsusi investisiya şəraiti təşviq edir. Ekspertlərə görə, xarici investorların ölkəmizə cəlb edilməsi iqtisadiyyatımızın şaxələndirilmiş şəkildə inkişafına və güclənməsinə xidmət edəcək.
Milli Məclisin deputatı Aydın Hüseynovun mətbuata bildirdiyinə görə, Birinci Azərbaycan Beynəlxalq İnvestisiya Forumu ölkəmizin iqtisadi həyatında mühüm hadisə kimi dəyərləndirilə bilər: “Çünki bu cür tədbirlər, ilk növbədə, Azərbaycanın qlobal iqtisadi məkandakı mövqeyini möhkəmləndirir, onu beynəlxalq biznes dairələri üçün daha cəlbedici və etibarlı tərəfdaş kimi təqdim edir. Forum təkcə sərmayəçilərlə dövlət nümayəndələrini deyil, həm də müxtəlif ölkələrdən gələn iş adamlarını, maliyyə qurumlarını və innovasiya sahəsində çalışan mütəxəssisləri bir araya gətirməklə, yeni iqtisadi əməkdaşlıqların formalaşmasına zəmin yaradır”.
A.Hüseynov qeyd edib ki, Azərbaycanın strateji coğrafi mövqeyi, zəngin təbii resursları, sürətlə inkişaf edən infrastruktur layihələri və açıq iqtisadi siyasəti sərmayədarlar üçün artıq uzun müddətdir diqqət mərkəzindədir. Forum isə bu marağı daha da artıraraq, həmin potensialı reallaşdırmaq üçün platforma rolunu oynayır: “Burada aparılan müzakirələr, imzalanan razılaşmalar və qurulan əlaqələr gələcək illərdə müxtəlif sahələrdə - enerji, nəqliyyat, logistika, kənd təsərrüfatı, rəqəmsal iqtisadiyyat və turizm sektorunda yeni investisiya axınlarına yol aça bilər. Ən önəmlisi isə odur ki, forum Azərbaycanın iqtisadiyyatında şaxələnməni dəstəkləyən, qeyri-neft sektorunun inkişafını stimullaşdıran imkanlar yaradır. Xarici sərmayədarlar burada yalnız mövcud layihələrə deyil, həm də innovativ təşəbbüslərə, startaplara maraq göstərərək ölkənin bilik və texnologiya əsaslı iqtisadiyyat quruculuğuna töhfə verə bilərlər. Bu proses, həmçinin yeni iş yerlərinin açılmasına, müasir idarəetmə təcrübələrinin tətbiqinə və milli iqtisadiyyatın qlobal trendlərə uyğunlaşmasına xidmət edəcək.
Beləliklə, Birinci Azərbaycan Beynəlxalq İnvestisiya Forumu təkcə sərmayə cəlbi baxımından deyil, həm də ölkəmizin iqtisadi nüfuzunun artması, beynəlxalq əməkdaşlıq əlaqələrinin dərinləşməsi və Azərbaycanın regional iqtisadi mərkəz kimi rolunun güclənməsi baxımından tarixi əhəmiyyət daşıyır. Bu forum gələcəkdə davamlı ənənəyə çevrilərsə, Azərbaycanın dünya iqtisadi xəritəsindəki mövqeyi daha da möhkəmlənəcək”.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
