Bəzi banklar kartlardakı pulsuz xidmətin limitini iki dəfədən də çox aşağı endirib. Qeyd edək ki, əvvəl ay ərzində 7 min manata qədər əməliyyatlara görə faiz tutulmurdusa, indi bu rəqəm 3 min manata endirilib.
Bəzi müştərilər isə limitin azaldılmasından xəbərdar olmadıqlarından, pul tutulmalarının səbəbini də bilmirlər. Ümumiyyətlə, bu hal vətəndaşlar arasında narazılığa səbəb olub.
Natiq Cəfərli: “Bankların gəlir və mənfəətləri azaldıqca onlar gəlir istiqamətində yeni addımlar atır”
Iqtisadçı Natiq Cəfərli “Bakı-Xəbər”ə şərhində bildirdi ki, bankların gəlir və mənfəətləri azaldıqca onlar gəlir istiqamətində yeni addımlar atır: “Bu ilk deyil: "Məlumdur ki, cashbaklarin verilməsində də ciddi azalmalar var. Banklar harda imkan varsa, orda müştərilərə, vətəndaşlara göstərdiklərə xidmətə görə əlavə haqq almağa çalışır. Onlar bunu etməkdə məqsədi öz mənfəətini artırmaqdır. Bu da təbii ki, vətəndaşlar arasında heç də xoş qarşılanmır”.
Əkrəm Həsənov: “Bank hər hansı xidməti müəyyən məbləğədək və ya müddətədək pulsuz edirsə, bu, sadəcə müştəri cəlb etmək üçün kampaniya xarakteri daşıyır”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, bankın heç bir xidməti pulsuz deyil. Bank hər hansı xidməti müəyyən məbləğədək və ya müddətədək pulsuz edirsə, bu, sadəcə müştəri cəlb etmək üçün kampaniya xarakteri daşıyır: “Uzun illər Azərbaycanda banklar müştəri qazanmaq üçün kart xidmətlərini, pul köçürmələrini və hətta nağdlaşdırmanı pulsuz təqdim ediblər. Amma həmin xərclər başqa yolla – yüksək kredit faizləri hesabına qarşılanırdı. Banklar bütün xərclərini və qazancını əsasən borcalanlardan çıxırdı. Sonradan faizlər azaldı, lakin əvəzində banklar nağdlaşdırma və köçürmələrdə komissiyaları artırmağa başladılar. Məlumat üçün deyim ki, nağdlaşdırmanın bank üçün bir sıra xərcləri mövcuddur. Bank nağd pulu Mərkəzi Bankdan alır və bunun üçün komissiya ödəyir. Yəni heç bir bank nağd pulu pulsuz əldə etmir. İkincisi isə, nağd pul xidməti üçün əlavə xərclər yaranır. Kassirlər və inkassatorlar saxlanılır, bankomatların işlək vəziyyətdə qalması təmin edilir, ofis kirayəsi və digər xərclər çəkilir. Bank bu xərcləri qarşılamaqla yanaşı, qazanc da əldə etməlidir. Axı bank xeyriyyə fondu deyil, kommersiya qurumudur”.
Günel CƏLİLOVA
