Əkrəm Həsənov: “Kredit faizlərinin bahalaşması inflyasiya ilə də bağlıdır”
Cari il sentyabr ayının 1-nə Azərbaycanda milli valyutada yeni verilmiş kreditlər üzrə orta illik faiz dərəcəsi 18.52% təşkil edib. Azərbaycan Mərkəzi Bankının yaydığı məlumata əsasən, manatla yeni verilmiş kreditlərin orta faiz dərəcəsi ilin əvvəli ilə müqayisədə 1.96 faiz bəndi, ötən ilin müvafiq dövrü ilə müqayisədə isə 2.40 faiz bəndi artıb.
Qeyd edək ki, cari ilin sentyabr ayının 1-nə Azərbaycanda bankların kredit portfelinin həcmi 28 milyard 704.9 milyon manata bərabər olub. Kredit portfelinin 15 milyard 91.8 milyon manatını biznes kreditləri, 9 milyard 114.5 milyon manatı istehlak kreditləri, 4 milyard 498.6 milyon manatı isə ipoteka kreditləri təşkil edib.
Maraqlıdır, manatla verilmiş kreditlərin faiz dərəcəsi niyə artıb?
“Faiz dərəcəsinin çox olmasının səbəblərindən biri kreditin qaytarılmama ehtimalının yüksək olmasıdır”
Bank sahəsi üzrə ekspert Əkrəm Həsənov baki-xeber.com-a şərhində bildirdi ki, kredit faizlərinin yüksəlməsinin bir neçə səbəbi var: “İlk olaraq deyim ki, faizlərin yüksəlməsi ilk növbədə pulun bahalaşması ilə bağlıdır. Mərkəzi Bank tərəfindən banklara, xüsusilə iri banklara qarşı məcburi ehtiyat normaları artırılıb. Yəni banklar Mərkəzi Bankda daha çox vəsait saxlamalıdır. Bu isə banklar üçün likvidliyin azalması və nəticədə kredit vəsaitlərinin bahalaşması deməkdir. Həmçinin, kredit faizlərinin bahalaşması inflyasiya ilə də bağlıdır. Son zamanlar qiymət artımı yaşanır”.
Həmsöhbətimizin dediyinə görə, faiz dərəcəsinin çox olmasının səbəblərindən biri kreditin qaytarılmama ehtimalının yüksək olmasıdır: "Banklarda kredit risqinin çox olması faiz dərəcələrinin artırılmasına gətirib çıxarır. Bu gün ölkə iqtisadiyyatında risqlərin, o cümlədən institusional risqlərin yüksək olması verilən kreditlərin geri qayıtma ehtimalını aşağı salır. Bu da həm bankları vəsaitlərini sığortalamaq məqsədilə kredit faizlərini artırmağa vadar edir, həm də onların iqtisadiyyatı kreditləşdirmə marağını azaldır".
Günel CƏLİLOVA
