Əkrəm Həsənov: “Banklar xırda pulu ona görə almır ki, sonra onu başqasına satmaq çətin olur”
Son zamanlar Azərbaycanda bəzi banklar valyuta mübadiləsi zamanı kiçik məbləğdə valyuta dəyişmir və ya xırda pul verməkdən imtina edirlər. Bununla bağlı şikayətlərin sayı artıb.
“Bankların müştəriyə xırda pul verməkdə çətinlik çəkməsi valyuta çatışmazlığı ilə bağlı deyil, bu banklara sərf etmədiyi üçün imtina edirlər”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, valyutadəyişmə məntəqələri bir valyutanı digərinə dəyişir və eyni zamanda müəyyən əskinasları qəbul etməyə bilir: “Məsələn, valyutadəyişmə məntəqəsi deyə bilər ki, bəzi xarici əskinasları – 1 və ya 5 dolları qəbul etmirəm. Burda da haqlılıq payı var, heç kim onlardan həmin əskinasları almırsa, bu şərtləri normal qəbul olunmalıdır. Əgər valyutadəyişmə məntəqəsi müəyyən məbləğdə – məsələn, 100 avro və ya 100 dolları dəyişirsə, vətəndaş bu halda ondan imtina alarsa, şikayət edə bilər. Amma ümumilikdə, belə şeylər nadir olur və hər kəs üçün eyni qaydada tətbiq edilir. Dediyim kimi, problem sadəcə bəzən bankların xırda əskinasları qəbul etməməsi ilə bağlıdır”.
Həmsöhbətimiz onu da əlavə etdi ki, məlum problemin yaranmasının səbəblərindən biri də odur ki, banklara xırda pulu alıb-satmaq sərf etmir: “Banklar xırda pulu ona görə almır ki, sonra onu başqasına satmaq çətin olur. Bu hal bütün banklarda müşahidə oluna bilməz. Bəzi banklarda məlum problem yaşana bilər.
Bankların müştəriyə xırda pul verməkdə çətinlik çəkməsi valyuta çatışmazlığı ilə bağlı deyil, bu banklara sərf etmədiyi üçün imtina edirlər. Onu da deyim ki, ölkədə valyuta mübadiləsi əməliyyatları "Valyuta tənzimi haqqında" Qanun və Azərbaycan Mərkəzi Bankının normativ aktları ilə tənzimlənir. Bank vətəndaşa imtina edərsə o zaman şəxsin hüququ var ki, aidiyyəti qurumlara şikayət etsin. Bankların kiçik məbləğdə valyuta dəyişməkdən və ya xırda pul verməkdən imtina etməsi qanunla təsbit olunmuş hal deyil və müştərilər bu səbəbdən şikayət etmək hüququna malikdirlər”.
Günel CƏLİLOVA
