İlqar Hüseynli: “Azərbaycanda pensiya fonduna 41500 manat vəsait yığılan insanların sayı azdır”
Keçmiş SSRİ və region ölkələrində qadınların pensiya yaşı ən çox Azərbaycanda artıb. Məlum olduğu kimi, 1 iyul 2025-ci il tarixindən etibarən Azərbaycanda qadınların pensiya yaşı 64,5 olub. Son 12 ildə Azərbaycanda qadınların pensiya yaşı 5 il artırılıb.
Qeyd edək ki, 12 il əvvəl – 2014-cü ildə Azərbaycanda qadınlar pensiyaya 59,5 yaşında çıxıblar. Müqayisə üçün bildirək ki, keçmiş SSRİ və region ölkələrinin heç birində qadınların pensiya yaşı Azərbaycandakı qədər artırılmayıb. Azərbaycandan sonra ən yüksək artım Moldovada olub. 12 il əvvəl Moldovada qadınların pensiya yaşı 57 olduğu halda, bu il 61,5 yaşa qaldırılıb. Ümumilikdə isə, keçmiş SSRİ və region ölkələrinin 8-də qadınların pensiya yaşı dəyşdirilməyib.
“Xüsusən işləyən qadınların əmək haqları elə də çox olmadığı üçün onların belə bir imkanı yoxdur”
Sözügedən məsələni “Bakı-Xəbər”ə şərh edən ekspert İlqar Hüseynlinin fikrincə, Əmək və Əhalinin Sosial Müdafiəsi Nazirliyi nəyə görəsə o zaman pensiyaya çıxma müddətini tətbiq edərkən qadınlar üçün hər altı aydan bir pensiya yaşının artırılması ilə bağlı qərar qəbul etdi: “Bu, hər ildə bir il artmaq demək idi. Nəticədə Azərbaycanda kişilərlə yanaşı, qadınların da pensiya yaşı artırıldı. Ona görə də digər postsovet ölkələri ilə müqayisədə Azərbaycanda pensiya yaşı daha çox artırılıb. Burada bir neçə amil nəzərdə tutulub. Guya Azərbaycanda insanların orta ömür müddəti 72 ildir. Bunu əsas götürüb pensiya yaşını 65-dən götürüblər. Hesab edirəm ki, bu, doğru yanaşma deyil. Əvvəla, iş stajına görə bizdə pensiyaya çıxma var. Bir də Dövlət Sosial Müdafiə Fonduna yığımlar olmalıdır. Yəni Fonda 41500 manat yığılmalıdır ki, pensiya ala biləsən. Azərbaycanda pensiya fonduna bu qədər vəsait yığılan insanların sayı azdır. Xüsusən də qadınların timsalında onların belə bir imkanı yoxdur. Ona görə ki, işləyən qadınların əmək haqları elə də çox deyil. O üzdən, qadınlar bu məbləği toplaya bilmirlər. Yalnız burada yeganə variant yaşa görə pensiyaya çıxmaqdır. Təəssüflər olsun ki, Azərbaycanda qadınların pensiya yaşı digər ölkələrlə müqayisədə çoxdur. Bu da cəmiyyətdə birmənalı qarşılanmır və dəfələrlə mübahisələrə səbəb olub. Azərbaycanda kişilər üçün 62, qadınlar üçün 60 pensiya yaşı daha məqbul variant idi. Əfsuslar olsun ki, bunu 65 yaşa qaldırdılar. Müəyyən iş sahələrində - təhsildə, səhiyyədə çalışanların böyük əksəriyyətinin qadın olduğunu nəzərə alsaq, görünür həm də bu səbəbdən pensiya yaşını artırıblar. Ola bilsin, səbəblərdən biri də bununla əlaqədardır”.
Vidadi ORDAHALLI
