Bank xidmətlərindən istifadə edən müştərilər arasında ən çox narazılıq doğuran məsələlərdən biri müqavilə şərtlərinin birtərəfli qaydada dəyişdirilməsidir. Xüsusilə kredit və ya debet kartı əldə edərkən müştəri bankla müqavilə bağlayır, faiz dərəcələri və digər xidmət haqları müqavilədə dəqiq göstərilir.
Ancaq bəzi hallarda bank müqavilənin qüvvədə olduğu müddətdə şərtləri xəbərdarlıq etmədən dəyişir. Bu dəyişiklik müştərilər arasında narazılığa səbəb olur və onların hüquqlarının pozulması kimi qiymətləndirilir.
Maraqlıdır, bank müştəriyə xəbər vermədən faizləri və ya xidmət haqlarını dəyişdirə bilərmi?
Əkrəm Həsənov: “Bank tarif dəyişikliyi barədə müştəriyə mütləq məlumat verməlidir, məlumatlandırma internet saytına baxmaq prinsipi ilə məhdudlaşmamalıdır”
Bank sahəsi üzrə ekspert Əkrəm Həsənov “Bakı-Xəbər”ə şərhində bildirdi ki, banklar müəyyən hallarda xidmət tariflərini dəyişə bilərlər: “Bu, sağlam məntiqə əsaslanan normal haldır, çünki bank hesabı üzrə müqavilə 5 və ya daha çox müddətə bağlansa da, tariflərin vaxtaşırı dəyişməsi mümkündür. Bu, bankın ömrünün sonuna qədər eyni şərtlərlə xidmət göstərməsi anlamına gəlmir və banklara qarşı da düzgün yanaşma olmaz. Ancaq bank tarif dəyişikliyi barədə müştəriyə mütləq məlumat verilməlidir. Məlumatlandırma internet saytına baxmaq prinsipi ilə məhdudlaşmamalıdır. Daha doğru yanaşma SMS və ya məktub vasitəsilə rəsmi bildiriş göndərilməsidir. Əks halda, müştərinin məlumatlandırılmaması məhkəmə predmetinə çevrilə bilər”.
Kamran Məmmədli: “Bankla müştəri arasında bağlanan müqavilənin birtərəfli qaydada dəyişdirilməsi məhkəmə predmeti olur”
Iqtisadçı Kamran Məmmədli “Bakı-Xəbər”ə açıqlamasında bildirdi ki, bankla müştəri arasında bağlanan müqavilənin birtərəfli qaydada dəyişdirilməsi məhkəmə predmeti olur: "Kredit, əmanət və ya debet kartlarla bağlı bank müqavilə şərtlərini dəyişdirirsə, bu barədə şəxsə məlumat verməlidir. Bu məlumat SMS və ya zənglə bildiriş formasında ola bilər. Müştəriyə məlumat verilmədən müqavilə şərtləri dəyişirsə, vətəndaş həmin bankı məhkəməyə verə bilər, bu onun hüququdur”.
Günel CƏLİLOVA
