Vüqar Bayramov: “Azərbaycan “yaşıl” enerji siyasətini genişləndirməklə. yalnız ənənəvi məhsulların deyil, həm də innovativ texnologiyaların ixracını təmin etməyi hədəfləyir”
Məlum olduğu kimi, Azərbaycan Respublikası İqtisadiyyat Nazirliyi yanında İqtisadi Zonaların İnkişafı Agentliyi (İZİA) Çin şirkəti "China Datang Overseas Investment Co." ilə birgə Azərbaycanda “Yaşıl Enerji Sənaye Parkı”nın yaradılması üzrə Anlaşma Memorandumu (MoU) imzalayıb.
Bakıda keçirilən 1-ci Azərbaycan Beynəlxalq İnvestisiya Forumu çərçivəsində baş tutan mərasimdə saziş İZİA-nın İdarə Heyətinin sədri Seymur Adıgözəlov və "China Datang Overseas Investment Co." şirkətinin Baş meneceri Yuanlonq Zhou tərəfindən imzalanıb.
Qeyd edək ki, parkın məqsədi bərpa olunan enerji və ekoloji texnologiyaların inkişafına töhfə verməkdir.
“Yaşıl Enerji Sənaye Parkı”nın yaradılması ilə ekologiya mükəmməl şəkildə qorunacaq və iqlim dəyişikliyi ilə bağlı tədbirlərə daha yaxından töhfə verəcək”
“Yaşıl Enerji Sənaye Parkı”nın əhəmiyyəti haqqında danışan millət vəkili Vüqar Bayramov “Bakı-Xəbər”ə açıqlamasında qeyd etdi ki, “Yaşıl Enerji Sənaye Parkı”nın yaradılmasının əhəmiyyəti çoxdur: “Bu parkın yaradılması ekologiyanın inkişafı deməkdir. Həmçinin, bu park sayəsində yaşıl enerji məhsullarının istehsalı həyata keçiriləcək. Nəzərə almaq lazımdır ki, Azərbaycan yalnız ənənəvi deyil, innovativ yaşıl enerji məhsullarının istehsalını da həyata keçirir. “Yaşıl Enerji Sənaye Parkı”nın yaradılması ilə ekologiya mükəmməl şəkildə qorunacaq və iqlim dəyişikliyi ilə bağlı tədbirlərə daha yaxından töhfə verəcək”.
Həmsöhbətimiz hesab edir ki, yaşıl enerji məhsullarının istehsalının genişləndirilməsi ixracata da təsir edəcək: “Azərbaycanın enerji sektorunda innovativ sahələrin inkişafı dəstəklənir. Nəzərə alsaq ki, Azərbaycan regionda “yaşıl” enerjiyə ən çox investisiya cəlb edən ölkələrdən biridir, bu istiqamətdə atılan addımlar mühüm əhəmiyyət kəsb edir. Son illərdə ölkəmiz “yaşıl” enerji sahəsinə 1 milyard dollardan artıq xarici sərmayə cəlb edib. Eyni zamanda digər aidiyyəti dövlət qurumları “yaşıl” enerji layihələrinin inkişafını yaxından dəstəkləyir. Ölkə başçısının müraciət mətnində qeyd olunduğu kimi, bu istiqamətdə vəsaitlər ayrılır, Qarabağ və Şərqi Zəngəzur iqtisadi rayonlarının “yaşıl” enerji zonasına çevrilməsi üçün intensiv işlər davam etdirilir. Ümumiyyətlə, Azərbaycan “yaşıl” enerji ilə bağlı konkret hədəflərini açıqlayıb. Belə ki, 2030-cu ilədək ölkədə elektrik enerjisində yaşıl mənbələrin payının 35 faizə çatdırılması nəzərdə tutulur. Bununla yanaşı, karbon emissiyalarının 40 faizə qədər azaldılması planlaşdırılır. Azərbaycan “yaşıl” enerji siyasətini genişləndirməklə, yalnız ənənəvi məhsulların deyil, həm də innovativ texnologiyaların ixracını təmin etməyi hədəfləyir. Bu, ölkəmizin Avropa bazarlarında strateji tərəfdaş kimi rolunu daha da gücləndirəcək”.
Günel CƏLİLOVA
