Ət 1 manat da bahalaşdı....
Natiq Cəfərli: “İribuynuzlu mal-qaranın sayı 300 minə yaxın azalıb, xırdabuynuzlu isə 1 milyondan çox azalıb”
Son günlər ölkədə mal ətinin, xüsusilə erkək dana ətinin qiymətinin artması müşahidə olunur. Qeyd edək ki, bir neçə gün öncəyə qədər kiloqramı 15 manata satılan ət indi bəzi yerlərdə 15,5-16 manata təklif olunur.
Qiymət artımı təkcə iri marketlərdə deyil, kiçik satış və kəsim məntəqələrində də müşahidə olunur. Ətin satış qiymətinin artması həm alıcıların narazılığına, həm də mövsümün təsiri ilə bağlı sualların yaranmasına səbəb olub. Bahalaşmanın səbəbi kimi daxildə danaların azlığı və yay aylarında maldarlığa marağın azalması göstərilir.
Bəs yay aylarında maldarlığa marağın və kəsimlik heyvanların sayının azalması ət qiymətlərindəki artımı izah edə bilərmi? Bu, mövsümi dəyişkənlikdir, yoxsa daha ciddi struktur probleminin əlamətidir?
“Iqtisadiyyatda belə bir qanun var, təklif azaldıqca, tələb yerində qalır, bu da qiyməti artıran fakta çevrilir”
İqtisadçı Natiq Cəfərli "Bakı-Xəbər"ə şərhində bildirdi ki, son iki ildə Azərbaycanda xırda və iribuynuzlu mal-qaranın sayında ciddi azalma var: “İribuynuzlu mal-qaranın sayı 300 minə yaxın azalıb, xırdabuynuzlu isə 1 milyondan çox azalıb. Iqtisadiyyatda belə bir qanun var, təklif azaldıqca, tələb yerində qalır, bu da qiyməti artıran faktora çevrilir. Əsas məsələ iri və xırdabuynuzlu mal-qaranın sayının azalmasıdır. Bununla yanaşı, yem qiymətləri də bahalaşıb. Yemin qiymətinin artması da ətin qiymətindəki kəskin dəyişikliyə səbəb olur. Son 12-13 il ərzində ətin qiyməti 2,5 dəfə artıb. Bu,kifayət qədər ciddi bir artımdır''.
Ekspert hesab edir ki, işğaldan azad olunmuş ərazilərdə heyvandarlığın inkişafı üçün əlverişli şərait mövcuddur: ''İşğaldan azad olunmuş ərazilərimizdə mal-qara saxlamaq üçün olduqca münbit şərait var. Əgər orda fermerlərin işləməsi üçün yaxşı şərait qurularsa, bir neçə ildən sonra xırdabuynuzlu və iribuynuzlu mal-qara sayının artması gözləniləndir. Bazarda təklif artdıqca qiymətlərin sabitlənməsi, hətta azalması müşahidə oluna bilər. İqtisadiyyatın qanunu budur ki, məhsul bolluğu olmadan qiymət aşağı düşmür. Təşviq siyasətinin aparılması çox vacibdir. Yalnız bundan sonra qiymətlər sabitləşə, hətta bir müddətdən sonra aşağı da düşə bilər”.
Günel CƏLİLOVA
