Çin Azərbaycanla əlaqələrdə Rusiyanı üstələməyə başladı...
Vüqar Bayramov: “Çin Azərbaycanın əsas strateji müttəfiqlərindən biridir”
Azərbaycanın idxal bazarında Çin yenidən liderliyə yüksəlib. 2025-ci ilin ilk aylarında Rusiya Azərbaycana idxalda əsas ölkə idi. Amma may ayının sonunda vəziyyət dəyişdi və idxalda Çin Rusiyanı ötdü.
Açıqlanan statistik rəqəmlərə əsasən, yanvar-may ayları ərzində idxal edilən 9,965 milyard dollarlıq malın 17,3 faizi, yəni 1,73 milyard dolları Çinin payına düşüb. Rusiyadan idxalın həcmi isə 1,715 milyard dollar təşkil edib. Sıralamada üçüncü yerdə 1,013 milyard dollarla Türkiyə qərarlaşıb.
Qeyd edək ki, son 2 ilə qədər Azərbaycan daha çox məhsulu Rusiyadan alırdı. Lakin 2023-cü ilin sonlarına doğru və 2024-cü ildə Çin liderliyi ələ alıb.
2025-ci ilin ilk 5 ayının nəticələri göstərir ki, Çin Azərbaycanın idxal bazarında əsas payçı olmağa davam edəcək.
Çindən idxalın artmasına səbəb olan əsas faktorlar nələrdir?
“2024-cu ildə Çin Azərbaycanın ən böyük ticarət və idxal tərəfdaşı olub, cari ilin sonuna qədər də bu ölkədən ölkəmizə idxal olunacaq məhsulların həcminin artmasının şahidi olacağıq”
Millət vəkili Vüqar Bayramov “Bakı-Xəbər”ə şərhində bildirdi ki, Çin Azərbaycanın əsas strateji müttəfiqlərindən biridir: “Son illər Çinlə Azərbaycanın ticarət dövriyyəsi artıb. Bu da Çindən ölkəmizə məhsul ixracının artması deməkdir. Məlumat üçün deyim ki, 2024-cu ildə də Çin Azərbaycanın ən böyük ticarət və idxal tərəfdaşı olub. 2025-ci ildə də bu təcrübə davam edir, növbəti aylarda da Çindən ölkəmizə idxal olunacaq məhsulların həcminin artmasının şahidi olacağıq. Bu da birbaşa iki ölkə arasındakı strateji münasibətlərə təsir edir. Ölkəyə daxil olacaq pulun azalması heç də yaxşı hal deyil. Qarşılıqlı əlaqələrin inkişaf etməsi ticarət dövriyyəsinin artmasına səbəb olur”.
Həmsöhbətimiz onu da əlavə etdi ki, Azərbaycan qlobal miqyasda əsas güc mərkəzlərindən birinə çevrilir: “Azərbaycan ilə Çin arasında tranzit daşımaların həcmi 2024-cü ildə 378 min ton olub ki, bu da 2023-cü illə müqayisədə 86 faiz çoxdur. Bütün bunlar Prezident İlham Əliyevin rəhbərliyi ilə Azərbaycanın geosiyası və geoiqtisadi mövqeyinin daha da güclənməsindən xəbər verir. Bu isə Azərbaycanın qlobal miqyasda əsas güc mərkəzlərindən birinə çevrilməsi deməkdir”.
Günel CƏLİLOVA
