Vüqar Bayramov: “Rusiya hansısa məhdudiyyətləri tətbiq etsə, bundan daha çox itirən tərəf özü olacaq”
Rusiya mətbuatı yazır ki, 2020-ci ildən 2025-ci ilə qədər Rusiya ilə Azərbaycan arasında ticarət dövriyyəsi sabit artım nümayiş etdirib. Belə ki, ticarət dövriyyəsi 2020-ci ildəki 3 milyard dollardan 2024-cü ildə 4,8 milyard dollara yüksəlib.
Məlum olduğu kimi, Yekaterinqburq hadisələri ilə əlaqədar iki ölkə münasibətlərində gərginlik var və bu, iqtisadi əlaqələrinə də təsirsiz ötüşmür. Rus mediası qeyd edir ki, Azərbaycan mallarının idxalda payının 1%-dən az olduğu Rusiya üçün vəziyyət kritik deyil: “Azərbaycan da öz hərəkətləri ilə özünün əsas satış bazarını kəsdi, çünki pomidorun 96%-i, meyvələrin 98%-i Rusiyaya göndərilib. Qeyd edilir ki, bu qərar Bakının 1,2 milyard dollara qədər ixrac gəliri itirməsinə gətirib çıxaracaq”.
Maraqlıdır, doğrudanmı daha çox bundan ziyan görən tərəf Azərbaycan olacaq? Həqiqətənmi Azərbaycan bundan 1,2 milyard dollar itirə bilər?
“Azərbaycan zamanla meyvə-tərəvəzi üçün alternativ bazar tapacaq”
Sözügedən məsələyə aydınlıq gətirən millət vəkili Vüqar Bayramov “Bakı-Xəbər”ə açıqlamasında məsələyə fərqli prizmadan yanaşdı: “Əvvəla, Rusiya Azərbaycanın ikinci ən böyük idxal tərəfdaşıdır. Uzun müddət Rusiya Azərbaycanın ən böyük idxal tərəfdaşı olub və 2024-cü ildən etibarən Çin ölkəmizin birinci idxal tərəfdaşıdır. Yəni biz Çindən sonra ən çox məhsulu Rusiyadan idxal edirik. Bu da ondan xəbər verir ki, əslində Rusiya ilə əməkdaşlıqda bu ölkənin iqtisadiyyatı və şirkətləri qazanan tərəfdir. Çünki Rusiya Azərbaycan bazarına öz məhsullarını ixrac edir və bundan böyük həcmdə valyuta əldə edir. Təbii ki, iqtisadi münasibətlərin zəifləməsi hər iki ölkədə fəaliyyət göstərən şirkətlərin idxal və ixrac əməliyyatlarına təsir göstərir və bu, arzuolunan deyil. Çünki nəticə etibarı ilə bu, iki ölkə arasında ticarət dövriyyəsinə mənfi təsir göstərən faktordur. Ancaq birmənalı şəkildə Rusiya ilə Azərbaycan arasında ticarət dövriyyəsinin təhlili göstərir ki, Rusiya Azərbaycanla müqayisədə ticarət dövriyyəsində daha çox valyuta əldə edən tərəfdir. O baxımdan Rusiya tərəfi çalışmalıdır ki, Azərbaycanla iqtisadi və ticarət əlaqələrini davam etdirsin. Çünki bu, Rusiya şirkətləri üçün vacibdir. Ona görə də Rusiya hansısa məhdudiyyətləri tətbiq etsə, bundan daha çox itirən tərəf olacaq. Azərbaycan zamanla meyvə-tərəvəzi üçün alternativ bazar tapacaq. Rusiyada elə bazar yoxdur ki, orda Azərbaycanda istehsal olunan aqrar məhsula rast gəlinməsin. Bizim aqrar məhsulların dadı və keyfiyyəti fərqlənir. O üzdən, Azərbaycan məhsulları Rusiya bazarlarında ən çox alınan xarici meyvə-tərəvəzlər sırasındadır. Rusiyada alternativ bazarlardan (məsələn, Mərakeş, İran və ya Misir) gələn məhsullar keyfiyyət və dad baxımından Azərbaycan məhsulları ilə eyni səviyyədə qəbul edilmir”.
Vidadi ORDAHALLI
