Natiq Cəfərli: “Rusiya siyasi qərarla Azərbaycan məhsullarının Rusiya bazarına çıxışını məhdudlaşdırır”
Zamanla Rusiya Azərbaycandan göndərilən meyvə-tərəvəz məhsullarını müxtəlif bəhanələrlə məhv edib. Dəfələrlə tonlarla pomidorları, “zərərverici var” deyərək, ya məhv edirdi, ya da geri göndərirdi. Indi isə şaftalı “zay” çıxıb.
Rusiyanın Krasnodar diyarında Baytarlıq və Fitosanitar Nəzarət üzrə Federal Xidmətin nümayəndələri Azərbaycandan gətirilmiş 18 ton təzə şaftalı və nektarini məhv edib. Onlar, guya həmin məhsullarda kənd təsərrüfatı üçün təhlükəli həşərat olan Qərb çiçək tripsləri aşkar etdiklərini bildiriblər. Qurum Azərbaycandan meyvə idxalına qadağa qoyub və 18 ton məhsulun hamısını yerindəcə məhv edib. Azərbaycandan gətirilən 15 ton pomidorda isə daha bir karantin zərərvericisi - Cənubi Amerika pomidor mina güvəsi "tapılıb".
Maraqlıdır, Rusiya məhsullarımızı zay elan etməklə iqtisadi əsas pərdəsi altında siyasi təzyiq göstərməyə çalışır, yoxsa həqiqətən də meyvə-tərəvəzlərimiz yararlı deyil?
“Zaman-zaman Rusiya ilə Azərbaycan arasında müəyyən problemlər yaşananda kənd təsərrüfatı məhsullarımızda müəyyən “xəstəliklər” tapılır”
İqtisadçı ekspert Natiq Cəfərli “Bakı-Xəbər”ə şərhində bildirdi ki, Rusiya zaman-zaman, tək Azərbaycan deyil, keçmiş sovet və digər ölkələrlə münasibətdə gərginlik olan kimi ixrac-idxal əməliyyatlarında problem yaratmaqla qarşı tərəfə cavab verməyə çalışır. Bu birinci dəfə deyil baş verir: “Zaman-zaman Rusiya ilə Azərbaycan arasında müəyyən problemlər yaşananda kənd təsərrüfatı məhsullarımızda müəyyən “xəstəliklər” tapılır. Bundan öncə də Azərbaycan pomidorunda, kartofunda, almasında və digər kənd təsərrüfatı məhsullarında qurd və xəstəlik tapmışdılar. Bu nöqteyi-nəzərdən Rusiyanın bu tipli davranışları yenilik deyil. Indi də eyni hal yaşanır, eyni yanaşma göstərilir. Hazırda Rusiya ilə Azərbaycan arasında müəyyən problemlər var. Belə olan halda Rusiya siyasi qərarla Azərbaycan məhsullarının Rusiya bazarına çıxışını məhdudlaşdırır. Bu addımı da müəyyən təzyiq vasitəsi kimi istifadə etməyə çalışır. Bu, Rusiyanın ənənəvi təzyiq vasitəsidir. Onu da deyim ki, dünyada artıq beynəlxalq standartlara uyğun sertifikatlaşma anlayışı var. Avropa Birliyinə, bu sertifikat olmasa, məhsul ixrac edə bilməzsiniz. O sertifikatlar olandan sonra isə heç kim onu yoxlamır. Dünyada qəbul edilmiş qaydalar var. Hansısa ölkənin şirkəti beynəlxalq standartlara uyğun sertifikatlar alırsa, həmin ölkənin məhsullarını rahatlıqla bazara buraxırlar”.
Günel CƏLİLOVA
