Vüqar Bayramov: “Orta Dəhlizin potensialından daha yaxından istifadə edilir”
Avropa İttifaqının ardınca Böyük Britaniya da Azərbaycan ərazisindən keçən Orta Dəhlizə qoşulmaq istiqamətində fəaliyyətlərə başlayıb.
Bu arada Britaniya parlamentinin yuxarı - Lordlar Palatası Londonda “Orta dəhliz: strateji investisiya və əməkdaşlıq imkanları” adlı Xəzər nəqliyyat əlaqəsinə dair yüksək səviyyəli dəyirmi masa keçirib.
Tədbirlə bağlı açıqlanan məlumata görə, Böyük Britaniya Qazaxıstan, Cənubi Qafqaz və Türkiyə vasitəsilə Asiyanı Avropaya birləşdirən mühüm multimodal ticarət marşrutu olan, Orta dəhliz kimi tanınan Transxəzər Beynəlxalq Nəqliyyat Marşrutunun inkişaf etdirilməsində artan strateji marağını təsdiqləyib.
Britaniya Baş nazirinin Azərbaycan və Mərkəzi Asiya üzrə Ticarət nümayəndəsi Lord Con Alderdays marşrutun iqtisadi və strateji əhəmiyyətini vurğulayıb, bütün region ölkələrini bu marşruta üstünlük verməyə çağırıb və Böyük Britaniyanın regional infrastrukturun inkişafına dəstək üçün artıq atdığı konkret addımları qeyd edib: “Böyük Britaniyanın İxracın Maliyyələşdirilməsi Agentliyi Azərbaycanın aviasiya sektorunda ilk sövdələşməni tamamlayıb. Qazaxıstan və Gürcüstanda liman və dəmir yollarının təkmilləşdirilməsini qiymətləndirir və nəqliyyat infrastrukturu üçün 20 milyard funt sterlinqlik yeni maliyyələşdirmə paketi ayırıb”.
Sözügedən məsələni “Bakı-Xəbər”ə şərh edən millət vəkili Vüqar Bayramovun fikrincə, Azərbaycan regional, eyni zamanda beynəlxalq nəqliyyat dəhlizlərinin genişlənməsinə töhfə verən ölkədir: “Məsələ ondadır ki, biz Orta Dəhliz vasitəsilə daha çox yüklərin daşınması məqsədilə həm infrastrukturun genişlənməsi, həm də elektron xidmətlərdən istifadə dairəsinin daha da artırılması siyasətini həyata keçiririk. Sözsüz ki, bütün bunlar bir tərəfdən regionun əhəmiyyətini artırır, digər tərəfdən Azərbaycanın geosiyasi mövqeyinin daha da gücləndirilməsinə xidmət edir. Aİ, eləcə də Böyük Britaniya ilə Şərq arasında daşınan yüklərin artıq region üzərindən keçən hissəsində artımlar müşahidə edilir. Ümumiyyətlə, Orta Dəhlizin potensialından daha yaxından istifadə edilir. Bu da, təbii ki, bir tərəfdən infrastrukturun yenilənməsi, digər tərəfdən digər işlər sayəsində səmərəli logistika zənciri yaradır. Ümumiyyətlə, daşımalar üçün lazım olan xərcin və zamanın azalması Orta Dəhlizin effektivliyini artırır. Bu, dəmir yolunun daha da inkişaf etməsi ilə bağlıdır. Digər tərəfdən də, Rusiya və İrana qarşı tətbiq edilən sanksiyalar Orta Dəhlizə Qərb ölkələrinin marağının daha da artmasına gətirib çıxarır. Ümumilikdə, biz bu istiqamətdə daha çox yüklərin daşınmasını müşahidə edirik. Azərbaycanla imzalanan müqavilələr, ölkəmizin nəqliyyat infrastrukturuna dəstək bir daha təsdiq edir ki, dövlətimiz regional və qlobal dəhlizlərin reallaşmasına töhfə verən tərəfdir. Böyük Britaniya bütün bunların önəminin fərqində olduğu üçün dəstəyini əsirgəmir”.
Vidadi ORDAHALLI
