Azərbaycan Mərkəzi Bankının açıqladığı statistik məlumatlara əsasən, bu ilin iyun ayının 1-nə olan vəziyyətə görə, ölkədə milli valyutada yeni verilmiş kreditlər üzrə orta illik faiz dərəcəsi 18.90% təşkil edib.
Bu göstərici ötən ilin eyni dövrü ilə müqayisədə 3.79 faiz bəndi artım deməkdir.
Qeyd edək ki, bu ilin iyun ayının 1-nə ölkədə xarici valyuta ilə də verilən kreditlər üzrə orta faiz dərəcəsi 6.59% təşkil edib ki, bu da ötən ilin eyni dövrü ilə müqayisədə 0.84 faiz çoxdur
Ekspertlər hesab edir ki, faizlərin yüksəlməsi adi vətəndaşların və sahibkarların kredit götürmək imkanlarına da təsir edəcək.
Maraqlıdır, milli valyutada kreditlər üzrə faizlərin artmasının əsas səbəbləri nələrdir?
Əkrəm Həsənov: “Faizlərin yüksəlməsi pulun bahalaşması ilə bağlıdır”
Iqtisadçı ekspert Əkrəm Həsənov “Bakı-Xəbər”ə şərhində bildirdi ki, kredit faizlərinin yüksəlməsinin bir neçə səbəbi var: “İlk olaraq deyim ki, faizlərin yüksəlməsi ilk növbədə pulun bahalaşması ilə bağlıdır. Mərkəzi Bank tərəfindən banklara, xüsusilə iri banklara qarşı məcburi ehtiyat normaları artırılıb. Yəni banklar Mərkəzi Bankda daha çox vəsait saxlamalıdır. Bu isə banklar üçün likvidliyin azalması və nəticədə kredit vəsaitlərinin bahalaşması deməkdir.
Digər səbəb isə inflyasiya ilə bağlıdır. Məlumdur ki, son zamanlar qiymət artımı yaşanır”.
Kamran Məmmədli: “Kredit faizlərinin yüksək olmasının əsas səbəbi kredit risqinin yüksək olmasıdır”
Iqtisadçı Kamran Məmmədli “Bakı-Xəbər”ə şərhində qeyd etdi ki, xarici ölkələrlə müqayisədə Azərbaycanda kredit faizləri yüksəkdir: “Kredit faizlərinin yüksək olmasının əsas səbəbi kredit risqinin yüksək olmasıdır. Yəni kreditin qaytarılmaması və yaxud da qaytarılmasında problemlərin yaşanması. Kimlərsə krediti qaytarmır, problem yaradır.
Kredit faizlərinin azalması üçün bank sektorunda müəyyən işlər görülməlidir. Belə ki, xarici banklara şərait yaratmaq lazımdır. Əgər ölkənin bank sektorunda digər oyunçuların - dünyanın böyük banklarının iştirakı təmin edilərsə, o halda ölkə ərazisində kredit təklifləri artar. Bu halda yerli banklar da məcbur olub faizləri endirəcək".
Günel CƏLİLOVA
