Sərgidə Azərbaycanın ixrac coğrafiyasını genişləndirmək üçün əla formul təqdim edildi - 3 tərəfli balans, sərmayə...
Vüqar Bayramov: “Azərbaycan Avrasiyanın enerji xəritəsini dəyişən ölkədir”
Prezident İlham Əliyev 30-cu “Caspian Oil and Gas”, 13-cü “Caspian Power” və 30-cu “Baku Energy Forum”un rəsmi açılış mərasimində çıxışında Azərbaycanın enerji sahəsindəki uğurunu belə səciyyələndirib ki, biz hər zaman istehsalçılar, tranzit ölkələr və istehlakçılar arasında maraqların balansına diqqət yetirmişik:
“Biz ixrac coğrafiyasının genişləndirilməsi üçün bəzi ölkələrlə danışıqlar və sərmayə qoyuluşu mərhələsindəyik. Bütün bunlar müsbət dinamikadır və biz enerji sahəmizin inkişafının təkcə Azərbaycanın potensialına deyil, həmçinin qonşuluğumuza da töhfə verdiyini görürük. Beləliklə, enerji resursları düzgün idarə edilirsə, investorlar, tranzit ölkələr və istehsalçılar arasında əməkdaşlıq məhz bu səviyyədədirsə, o zaman uğur əldə edilir. Hər kəs üçün uğurlu vəziyyət yaranır və biz hər zaman istehsalçılar, tranzit ölkələr və istehlakçılar arasında maraqların balansına diqqət yetirmişik”.
“Bu, həm də ölkəmizin gücünü göstərən faktorlardandır”
Sözügedən məsələni “Bakı-Xəbər”ə şərh edən millət vəkili Vüqar Bayramovun fikrincə, Bakı enerji həftəsi bir tərəfdən Azərbaycanın potensial və imkanlarının təqdim edilməsi baxımından vacibdir: “Digər tərəfdən, həm də aparıcı şirkətlər, beyin mərkəzləri, bir sıra ölkələrin dövlət rəsmilərinin bir araya gəldiyi əməkdaşlıq platformasıdır. Bu konteksdən, təbii ki, uzun müddət Azərbaycanın sözügedən tədbirə ev sahibliyi etməsi önəmli əhəmiyyət kəsb edir. Baxmayaraq xeyli müddətdir bu tədbir keçirilir, amma buna rəğmən, xüsusən də inkişaf etmiş ölkələrin, aparıcı şirkətlərin tədbirə marağının yüksək olması ondan xəbər verir ki, Azərbaycan enerji ölkəsi olaraq Avrasiyanın enerji xəritəsini dəyişən ölkədir. Digər tərəfdən, daha innovativ və müasir çağırışlara uğun yanaşmaları və texnologiyanın təqdimatını həyata keçirə bilir. Çünki burada şirkətlər də fərqli texnologiya və innovasiyanı təqdim edirlər. O baxımdan təbii ki, Azərbaycan üçün həm mövcud potensialın təqdimatı, həm əvvəlki dövrlərdə həyata keçirilən fəaliyyətlərin, əldə edilən uğurların bölüşdürülməsi baxımından faydalıdır. Bu, həm də ölkəmizin gücünü göstərən faktorlardandır. Ümumiyyətlə, Azərbaycanın enerji siyasəti, strategiyası dövlətimizi regionda orta güc ölkəsinə çevirib. Bu, əsası Ulu Öndər tərəfindən qoyulan strategiyanın məhz həmin dövrlərdə uzaqgörən siyasət nəticəsində reallaşması anlamına gəlir. Xüsusən nəzərə almaq lazımdır ki, 90-cı illərin əvvəllərində ovaxtkı hakimiyyətin yarıtmaz siyasəti nəticəsində ölkə iqtisadiyyatı ciddi tənəzzüllə üz-üzə idi. Heydər Əliyevin yenidən hakimiyyətə qayıtması həm tənəzzülün aradan qaldırılmasına, həm də yeni strategiyanın yaradılmasına imkan yaratdı. Bu strategiya Azərbaycanın geosiyasi mövqeyini gücləndirməkdədir, müasir çağırışlara uyğundur. Prezident Əliyevin rəhbərliyi ilə həyata keçirilir. Ötən il Azərbaycan 25 milyard kubmetr qazı 12 ölkəyə ixrac edib. Bu, ölkəmizin nə qədər vacib rola malik olduğunu bir daha ortaya qoyur”.
Vidadi ORDAHALLI
