Sentyabrın 15-dən Azərbaycanda çörəyin qiymətində bahalaşma qeydə alınıb. Bu, konkret olaraq iki firmanın məhsullarında özünü göstərib: “Çörəkçi” və “Nömrə 1”. Qeyd edək ki, qiymət artımı çörək növlərindən asılı olaraq, 5-10 qəpik civarındadır.
Maraqlıdır, çörəyin satış qiymətinin artmasının səbəbi nə ilə bağlıdır?
“Nömrə 1” - Rahim Nizamədinov: “İşçilərin maaşını verə bilmək üçün qiymət artımı qaçılmaz idi”
“Nömrə 1” çörək sexinin satış müdiri Rahim Nizamədinov “Bakı-xəbər”ə açıqlamasında qeyd etdi ki, cari ilin əvvəlində dizelin satış qiyməti 33 faiz qalxdı: “Ay ərzində iki dəfə unun satış qiymətində artım müşahidə olunur. İstehsal etdiyimiz çörəklər xüsusi paketlərə qoyulur. Həmin paketlərin qiyməti də 20 faiz artıb. Bəzi çörək və ya şirniyyat məhsullarına şəkər, yağdan istifadə olunur. Qeyd etdiyim məhsulun qiyməti də 20 -25 faiz artıb. Məlumat üçün bildirim ki, şirkətin 700-yə yaxın işçisi var. İşçilərin maaşını verə bilmək üçün qiymət artımı qaçılmaz idi”.
Pərviz Heydərov: “Nə güzəştlər tətbiq edilirsə-edilsin, xeyri olmayacaq, gec-tez qiymətlər qalxacaqdı”
İqtisadçı Pərviz Heydərov bildirdi ki, çörəyin qiymətində artım qaçılmaz idi: “Bunu ilin əvvəlindən proqnoz etmişdim. Dünya bazarlarında buğdanın qiyməti qalxıb. Azərbaycan da buna qarşı istəyir ki, idxal üzrə ƏDV olunsun - istəyir yerli istehsalçılara subsidiya verilsin və sair".
İqtisadçının dediyinə görə, nə güzəştlər tətbiq edilirsə-edilsin, xeyri olmayacaq, gec-tez qiymətlər qalxacaqdı: “Bir məhsul idxaldan asılıdırsa, dünya bazarında həmin şeyin qiymət dəyişikliyindən xilas ola bilməz. Bu aksiomadır. Çox maraqlıdır, ən zəruri ərzaq məhsullarının qiymətləri artır, hökumət isə növbəti il üçün, məsələn, istehlak qiymətləri indeksini - inflyasiyanı bu ildəkindən aşağı səviyyədə proqnozlaşdırır”.
Günel CƏLİLOVA
