Pandemiya ilə bağlı ödənilməsi çətinləşən kreditlərin məbləği günbəgün artır. Ötən ili 893 milyon manat problemli kredit portfeli ili başa vuran banklarda bu ilin ilk yarısında bu göstərici 914 milyon manata yüksəlib.
Açıqlanan statistik rəqəmlərə əsasən, son 6 ayda problemli kreditlərin həcmi 2.5 faiz artıb. İyun ayının yekunlarında problemli kreditlərin həcmində aylıq artım 7.7 milyon manat olub.
Problemli kreditlərin artımı tək paytaxt Bakıda deyil, bölgələrdə də müşahidə edilir. Maraqlı məqam ondan ibarətdir ki, ölkə üzrə ən çox problemli kredit Gədəbəy rayonunun payına düşür.
Bölgələr üzrə vaxtı keçmiş kreditlər üzrə üstünlük niyə məhz Gədəbəy rayonunda qeydə alınıb?
“Pandemiya dönəminin fəsadlarının vurduğu ziyanı nəzərə alsaq, problemli kreditlərin artması gözlənilən idi”
Iqtisadçı ekspert Natiq Cəfərli bildirdi ki, dünyada problemli kreditlər üçün kritik hədd 3 faiz sayılır, bizdə bu həddi artıq 2 dəfədən çox keçilib: “Ölkə üzrə ən çox problemli kredit Gədəbəy rayonundadır – ümumi kredit portfelinin 14,4 faizi problemlidir. Bakı şəhəri üzrə isə bu göstərici 6,4 faiz təşkil edir. Təkcə Bakı şəhərində vaxtı keçmiş kreditlərin həcmi 754,1 mln. manat və ya paytaxt üzrə ümumi kredit qoyuluşlarının 6,4%-ni təşkil edib. Vətəndaşlar da, biznes də götürdüyü krediti qaytarmaqda çətinlik çəkir, çünki son 1,5 il pandemiya dövründə hökumət kreditlərlə bağlı heç bir ciddi dəstək proqramı qəbul etmədi, işsizlik və nominal gəlirlərin azalması, kiçik-orta biznesin zəifləməsi, yüksək faizlər problemli kreditlərin artmasının əsas səbəbləridir”.
N.Cəfərlinin sözlərinə görə, ölkə üzrə ən az problemli kredit Naxçıvandadır. Belə ki, Sədərək rayonunda 1 faiz, Şərurda isə 0,8 faizdir.
Həmsöhbətimiz onu da əlavə etdi ki, problemli kreditlərin həcminin azalması üçün pandemiya dönəmində həm kiçik və orta sahibkarlar, həm də vətəndaşlara verilən kredit borclarına görə böyük dəstək paketi, təəssüf ki, qəbul olunmadı: “Məlumdur ki, ötən ilin aprelində kommersiya krediti alan kiçik və orta sahibkarlar üçün faizlərin yarıbayarı hesablanması ilə bağlı bir proqram açıqlandı. Lakin bu yetərli olmadı. Pandemiya dönəminin fəsadlarının vurduğu ziyanı nəzərə alsaq, problemli kreditlərin artması gözlənilən idi”.
Günel CƏLİLOVA
