2021-ci ilin iyul ayı ərzində xarici valyutada nağd mübadilə əməliyyatlarının həcmi açıqlanıb. Maraqlı məqam ondan ibarətdir ki, digər xarici valyutalarla müqayisədə Rusiya rublunun mübadiləsinə maraq artıb. Belə ki, ötən ay ərzində 1 751 527 400 Rusiya rublunun alışı həyata keçirilib. Cari dövrdə 182 588 000 rus rublunun satışı banklar tərəfindən təmin edilib. Rus rublunun alışı ötən ilə nisbətən 28,7 faiz artıb. Həmçinin, satışı da 2020-ci ilin iyul ayı ilə müqayisədə 7,3 faiz çox olub.
Onu da qeyd edək ki, ötən ilin eyni dövrünə nəzərən Rusiya rublunun banklar tərəfindən satışı və ya əhali tərəfindən alış həcmləri də artıb. Digər üç valyutanın (dollar, avro, funt sterlinq) əhali tərəfindən banklardan alış həcmləri isə azalıb.
Maraqlıdır, Rusiya rubluna marağın artmasının səbəbi nə ilə bağlıdır?
“Pandemiya ilə bağlı qapanma olmazsa, qarşıdakı aylarda rubla maraq daha da artacaq”
İqtisadçı ekspert Eldəniz Əmirov “Bakı-Xəbər”ə açıqlamasında qeyd etdi ki, 2021-ci ilin ilk 7 ayı ərzində rublun alışı ilə bağlı göstərici 35 faiz azalıb. Yalnız iyul ayında qeyd olunan göstərici iyun ayı ilə müqayisədə 6,9 faiz artıb. Bir ayda əhalinin rubl almağa marağı 7 faizə yaxın artıb: “Məlumat üçün bildirim ki, 7 ay ərzində əhalinin rubl satışı alışından 8 dəfə artıq olub. Məlumdur ki, Rusiyada olan azərbaycanlı iş adamları bu və ya digər formada iqtisadi fəaliyyətlə məşğul olur. Pandemiya ilə bağlı olaraq Rusiyaya üz tutan şəxslərin sayı azaldı. Sərhədlərin bağlı olması və ya nəqliyyat xərclərinin 10 dəfəyə qədər artması kimi problemlər iqtisadi aktivliyin azalmasına səbəb oldu. Nəticə etibarı ilə insanlar əlində olan rubl kütləsini satdı. Bu kimi faktlar rubl satışının artmasına səbəb oldu”.
İyul ayında rubl alışında artımın nə səbəbdən baş verməsinə gəlincə, həmsöhbətimiz bildirdi ki, 2021-ci ilin əvvəlində pandemiyanın təsiri daha sərt idi: “Koronavirus infeksiyasına görə tətbiq edilən qapanmalar iqtisadi aktivliyə təsir etmişdi. Bu səbəbdən də insanlar əllərində olan rublu satırdılar. Ancaq sonradan Rusiyanın da digər dövlətlər kimi sərt qapanmaya getməməsi müəyyən iqtisadi aktivliyə səbəb oldu. Azərbaycanda olan iş adamları da Rusiyada ticarət obyektlərində və digər müəssisələrdə işləyəcəyini düşündükləri üçün həmin ölkədə öz fəaliyyətlərini davam etdirmək niyyətinə düşdülər. Bu da valyuta mübadiləsində canlanmaya səbəb oldu. Beləliklə, iyul ayı ərzində rubl alanların sayı artıb. Hesab edirəm ki, qarşıdakı aylarda rubla maraq daha da artacaq. Qapanma olmazsa rubla maraq artacaq”.
Günel CƏLİLOVA
