Məlum olduğu kimi, artıq Azərbaycanda Dövlət Taxıl Fonduna keyfiyyətsiz məhsul qəbul edilməyəcək. Nazirlər Kabineti Dövlət Taxıl Fondunun saxlanması və istifadəsi qaydalarına dəyişiklik edib.
Yeni qaydalara əsasən, Fonda tədarük olunan taxıl yeni AZS 888:2020 “Buğda Texniki şərtlər” dövlət standartına uyğun olmalıdır. Standarta uyğun olmayan məhsul Taxıl Fondu tərəfindən qəbul edilməyəcək. Buna səbəb isə yerli istehsalın keyfiyyətinin fondun tələblərinə cavab verməməsidir. Bəzən yerli istehsalla Fonda lazım olan taxılın cəmi 10 faizini toplamaq mümkün olur. Buna görə də ölkənin ərzaq buğdasına olan tələbatı həm də idxal vasitəsilə ödənilir.
Məlumdur ki, Azərbaycanın əsas taxıl idxalçıları Rusiya, Qazaxıstan və Ukraynadır. Həmin ölkələr arasında daha keyfiyyətli taxıl Qazaxıstan idxalı hesab olunur.
Maraqlıdır, Azərbaycanda Dövlət Taxıl Fondunun tətbiq etdiyi yeni qaydalar fermerlərin işinə necə təsir edəcək və fondun taxıl ehtiyatı azalacaqmı?
“Rəqabət mühitinin inkişaf etdirilməsi üçün fermerlər istehsal etdikləri məhsulun yetişdirilməsi, saxlanılması, daşınması, emalına xüsusi nəzarət etməlidir”
Iqtisadçı ekspert Əli Əlirzayev bildirdi ki, taxıl dövlət standartına uyğun olaraq fermerlərdən alınacaq: “Bazarı keyfiyyətli taxılla təmin etmək lazımdır. Rəqabət mühitinin inkişaf etdirilməsi üçün fermerlər istehsal etdikləri məhsulun yetişdirilməsi, saxlanması, daşınması, emalına xüsusi nəzarət etməlidir. Bu qaydalara əməl edilərsə fermerlərin gəliri də artar”.
Həmsöhbətimiz onu da əlavə etdi ki, bir qisim fermerlərin Fonda daha aşağı həcmdə taxıl təqdim edəcəyi gözlənilir: “Amma Fonda qəbul edilməyən taxıl daxili istehlaka yönəldilə bilər. Bu da keyfiyyətsiz məhsulların ortaya çıxmasına səbəb olur. Ona görə də hesab edirəm ki, Fondun tələbləri daxili istehlakda da tətbiq edilməlidir. Digər tərəfdən isə, yüksək keyfiyyətli taxılın istehsal edilməsi üçün dövlət tədbirlər görməlidir. Fermerlər arasında maarifləndirmə işləri aparılmalıdır. İri buğda istehsalçılarına konkret yol xəritələri təqdim olunmalıdır. Eləcə də fermerlər yüksək keyfiyyətli buğda toxumları ilə təmin olunmalıdır. Qarşıya qoyulan əsas məqsəd idxaldan asılılığı minimuma endirmək olmalıdır”.
Günel CƏLİLOVA
