Sahibkarlıq fəaliyyətinə başlamağın ilkin şərtlərindən biri də bank hesabının açılmasıdır. Bunun üçün şəxs istənilən bankda özünə hesab açdıra bilər. Bank hesabı olan şəxs müəyyən müddət keçəndən sonra həmin hesabı bağlatdıra bilər. Qanunvericiliyə görə, bank hesabının bağlanmasına görə rüsum, ödəniş tələb edilmir.
Ancaq bu günlərdə “Ziraat Bank”da hesabı olan müştəridən həmin hesabı bağlamaq üçün əlavə rüsum tələb olunub. Bildirilir ki, hər hansı fiziki, yaxud hüquqi şəxs sözügedən bankda hesabını bağlamaq və arayış almaq üçün müraciət edəndə ondan 20 manat ödəniş istənilir. Bu hal həmin bankda hesabı olan müştərilərin narazılığına səbəb olub. Onlar bildirir ki, hesabın bağlanması üçün müştəridən pul tələb edilməsi qanunvericiliyə ziddir. Məlumat üçün bildirək ki, bank hesabının bağlanılması barədə rüsumun tələb edilməsi barədə qanunvericilikdə heç bir müddəa yoxdur.
“Ziraat Bank”: “Cari hesabın bağlanılması üçün rüsum tələb edilmir, hesabı bağlamaq istəyi barədə ərizə yazılmalıdır”
Məsələ ilə bağlı “Ziraat Bank”la əlaqə saxladıq. Bankdan qəzetimizə bildirildi ki, cari hesabın bağlanılması üçün rüsum tələb edilmir: “Hesabı bağlamaq istəyi barədə ərizə yazılmalıdır”.
Natiq Cəfərli: “Adi hesabın bağlanmasına görə rüsum nə qanunvericilikdə, nə də praktikada nəzərdə tutulub”
İqtisadçı ekspert Natiq Cəfərli bildirdi ki, bəzi banklarda hesab açmaq üçün cüzi rüsum tələb olunur: “Amma hesabın bağlanması tam könüllü məsələdir və bunun üçün hər hansı rüsum nəzərdə tutulmur. Yalnız o halda ola bilər ki, həmin müştərinin bank xidmətləri ilə bağlı borcu qalıb, ya da müqavilədə nəzərdə tutulan xidmətin ödənişini etməyib, o zaman hesab bağlanarkən pul istənilə bilər. Lakin adi hesabın bağlanmasına görə rüsum nə qanunvericilikdə, nə də praktikada nəzərdə tutulub”.
Günel CƏLİLOVA
