Azərbaycanda ən çox və ən az iş yeri açılan rayon və şəhərlərin adı açıqlanıb. Dövlət Statistika Komitəsinin yaydığı məlumatda qeyd olunur ki, ilk 6 ayda ölkədə yaradılan bütün yeni iş yerlərinin 75%-i Bakıda qeydə alınıb – 23 458 nəfər. Ölkənin digər bütün şəhər-rayonlarda isə ümumilikdə 7480 iş yeri yaradılıb.
Ölkə üzrə 73 rayonun 53-də isə yeni yaradılan iş yerlərinin sayı 100-dən az olub. Bəzi rayon və şəhərlərdə daha aşağı göstərici qeydə alınıb.
Belə ki, 12 şəhər və rayonda 50-100, 18 rayonda 20-50 yeni iş yeri yaradılıb. Ölkənin 23 rayon və şəhərində 6 ayda yeni yaradılan iş yerlərinin sayı 20-dən də aşağı olub.
6 rayonda ümumiyətlə iş yeri yaradılmayıb. Bunların arasında yalnız Xocalı rayonu işğal olunmuş ərazi sayılır. Heç bir iş yeri açılmayan digər rayonlar isə Ucar, Kəngərli, Şahbuz, Culfa və Lerikdir. Maraqlıdır, qeyd etdiyimiz rayonlarda niyə yeni iş yeri yaradılmayıb?
“Pandemiyaya qədər ölkədə, bölgələrdə, paytaxtda müəyyən quruculuq, təmir-quraşdırma işləri həyata keçirilirdi…”
Məsələ ilə bağlı fikir bildirən iqtisadçı ekspert Pərviz Heydərov qeyd etdi ki, ölkədə məşğulluq ciddi problemə çevrilib. Bunun da əsas səbəblərindən biri pandemiyadır: “Bu, pandemiyanın dünya iqtisadiyyatı və onun bir hissəsi olan Azərbaycan iqtisadiyyatına vurduğu zərbənin nəticəsidir. Məlumdur ki, ötən il məcburi məhdudiyyətlərə gedildi və bir çox şirkətlər məcburi olaraq müəyyən işçi heyəti ilə vidalaşdılar. Ölkədə dövlətin özəl sektora heç bir işçini ixtisar etməməsi üçün yardım etməsinə baxmayaraq, şirkətlərin fəaliyyəti dayandığına görə bunun qarşısını almaq mümkün deyildi. Bu da qaçılmaz xarakter daşıyırdı. Ona görə də istər-istəməz bu proses baş verdi. Hazırda da bəzi şirkətlərdə əmək haqqının ödənilməsində ciddi problemlər mövcuddur”.
Həmsöhbətimizin sözlərinə görə, pandemiyaya qədər ölkədə, bölgələrdə, paytaxtda müəyyən quruculuq, təmir- quraşdırma işləri həyata keçirilirdi, istehsal obyektləri yaranırdı və bu da məşğulluğun müəyyən dərəcədə genişlənməsinə zəmin yaradırdı. Ancaq pandemiya ilə bağlı dövlət tərəfindən bu cür fəaliyyət dayandırıldı. Ona görə də yeni iş yerlərinin açılması ilə bağlı 6 aylıq rəsmi statistik rəqəm müsbət göstəricidir.
6 rayonda heç bir iş yerinin açılmaması faktına gəldikdə isə, ekspert bildirdi ki, pandemiyanın təsirləri hələ tam olaraq aradan qalxmayıb: “İşğaldan azad olunan əraziləri nəzərə almasaq, digər bölgələrdə yenidənqurma, tikinti-quraşdırma işləri pandemiyaya qədər olan dövrə nisbətən xeyli səngiyib. Ona görə məşğulluq ciddi problemə çevrilib və maneə ilə rastlaşıb. Hesab edirəm ki, pandemiya tamamilə aradan qalxdıqdan, bütün təhlükələr sovuşduqdan, iqtisadiyyatda hazırdakı bərpa prosesləri dayanıqlı xarakter daşıdıqdan sonra yenidən müvəqqəti və daimi iş yerləri açılacaq”.
Günel CƏLİLOVA
