“Biz artıq 20 meqavatdan çox elektrik enerjisini alternativ mənbələrdən hasil etməyə başlayırıq və bu hələ başlanğıcdır”. Bunu Prezident İlham Əliyev Kəlbəcər rayon yarımstansiyasının açılışını edərkən deyib.
Ölkə başçısının sözlərinə görə, yarımstansiyanın Kəlbəcər rayonunun elektrik enerjisi ilə təchizatı üçün çox böyük əhəmiyyəti var: “Cəmi altı ay ərzində bu yarımstansiya ərsəyə gəldi. Özü də çox çətin bir hava şəraitində, çətin relyefdən, dağlardan keçərək bu önəmli infrastruktur obyektini istifadəyə verdik. Bu tədbirə qədər Lev çayı üzərində su elektrik stansiyasının tikintisi ilə tanış oldum. Orada generasiya gücü 4,4 meqavatdır. Biz artıq Güləbird Su Elektrik Stansiyasını işə saldıq, orada 8 meqavatdır, o, Laçın rayonundadır. Suqovuşan Su Elektrik Stansiyası da təmir olundu, yenidən quruldu, orada da 7,8 meqavatdır. Yəni görün, biz artıq 20 meqavatdan çox elektrik enerjisini alternativ mənbələrdən hasil etməyə başlayırıq və bu hələ başlanğıcdır. Onların sayını tədricən təxminən 20-yə çatdıracağıq, bəlkə də 30-a çatdıracağıq, amma tədricən. Beləliklə, bizim enerji potensialımız da güclənəcək. Qarabağ və Şərqi Zəngəzur “yaşıl enerji” zonası kimi yaşayacaq və bizim bütün planlarımız yerinə yetiriləcək. Cəmi 7-8 ay ərzində bu qədər işin görülməsi bizim gücümüzü göstərir, əzmkarlığımızı göstərir, güclü siyasi iradəni göstərir”.
Onu da qeyd edək ki, Prezidentin sadaladığı SES-lərin 3-ü də sərt dağlıq ərazidə yerləşir. Bir neçə aya 20 meqavatdan artıq elektrik enerjisini alternativ mənbələr hesabına təmin etmək nə deməkdir?
“Alternativ mənbələr hesabına elektrik enerjisi istehsalının təmin edilməsi bərpa işlərini sürətləndirəcək”
Məsələyə münasibət bildirən iqtisadçı-ekspert Fuad İbrahimovun sözlərinə görə, qısa bir müddətdə bunları ərsəyə gətirmək çox böyük uğurdur: “Özü də nəzərə almaq lazımdır ki, işlərin bir qismi qış aylarında həyata keçirilib. Belə infrastruktur layihələrinin qısa müddətdə həyata keçirilməsi böyük uğurdur. İlk növbədə hər hansı xarici mənbədən asılılıq yoxdursa, o zaman bunu həyata keçirmək üçün daxili maliyyə dayanıqlığı olmalıdır. Paralel də olaraq maddi-texniki təchizat bazası olmalıdır. Maddi-texniki təchizat bazası ilə yanaşı, hazır kadr potensialını da nəzərə almaq lazımdır. Bunların hamısı bizdə var. Ümumiyyətlə nəzərə almaq lazımdır ki, Azərbaycan son dövrlərdə çoxsaylı mürəkkəb infrastruktur layihələri həyata keçirə bilib. Bununla belə, idarəetmə və kadrların hazırlanmasında kifayət qədər təcrübəyə malikdir. Bunun nəticəsidir ki, işğaldan azad edilən rayonların enerji təchizatının qurulması ilə bağlı çox ciddi nəticələrə nail olmaq mümkün olub. Azərbaycan maddi-texniki təchizat bazasını, o cümlədən peşəkar kadrları işə cəlb edərək ən mürəkkəb infrastrukturları qısa müddətdə ərsəyə gətirib. İşğaldan azad edilən ərazilərdə alternativ mənbələr hesabına elektrik enerjisi istehsalının təmin edilməsi bərpa işlərini sürətləndirəcək. Bu həm sözügedən ərazilərə qayıdışı sürətləndirəcək, həm də orada bərpa işlərinə, yeni istehsal və xidmət sahələrinin yaranmasına öz töhfəsini verəcək. Çünki elektrik enerjisi istehsalı çox önəmli faktordur”.
İqtisadçı-ekspert onu da qeyd etdi ki, bölgənin inkişafı baxımından alternativ enerjinin əldə olunması yeni imkanlar yaradacaq.
Vidadi ORDAHALLI
