“Biz bundan sonra da qısa müddətdə səmərə verən və nəticəyə yönəlmiş fəaliyyət sahələrini tapmağa çalışmalıyıq”. Bu fikirləri Prezident İlham Əliyev Moskvada keçirilən üçtərəfli görüşdən sonra mətbuata bəyanatında söyləyib.
Ölkə başçısının sözlərinə görə, əvvəl imzalanan bəyanat uğurla həyata keçirilir: “Bütövlükdə demək istərdim ki, 9 noyabr, Azərbaycan vaxtı ilə 10 noyabr tarixli birgə bəyanat uğurla həyata keçirilir. Bu bəyanatın bəndlərinin çox hissəsi yerinə yetirilib. Rusiya sülhməramlı missiyası öz işini səmərəli şəkildə yerinə yetirir və iki ay ərzində kiçik insidentlər istisna olmaqla narahatlıq üçün ciddi əsas olmayıb. Bütün bunlar belə əminlik yaradır ki, Vladimir Vladimiroviçin dediyi kimi, Dağlıq Qarabağ münaqişəsi keçmişdə qalıb və biz gələcək barədə, qonşular kimi birlikdə necə yaşamaq, nəqliyyat arteriyalarının açılması məsələlərini həll etməyə necə çalışmaq və gələcəkdə regional sabitliyi və təhlükəsizliyi möhkəmlətmək haqqında düşünməliyik”.
Maraqlıdır, ümumilikdə, əlaqələrin qurulmasında, münasibətlərin inkişaf etdirilməsində qısa müddətdə səmərə verən və nəticəyə yönəlmiş fəaliyyət sahələri nə ola bilər? Ekspertlər bunu necə dəyərləndirirlər?
“Sözügedən işlərin görülməsi zamanı Azərbaycan tərəfinin xidmətlərinə tələbat artır”
Məsələyə münasibət bildirən iqtisadiyyat üzrə fəlsəfə doktoru Firdovsi Şahbazov bununla bağlı bir sıra məqamlara toxundu: “Əvvəla Moskvada 3 ölkə başçısının imzaladığı bəyanat mühüm əhəmiyyət kəsb edir. Bu, münasibətlərin mərhələli şəkildə bərpa olunmasına xidmət edəcək. Məlum olduğu kimi, razılaşmaya əsasən, birgə komissiya yaradılacaq. Hesab edirəm ki, nəqliyyat əlaqələrinin bərpası digər fəaliyyət sahələrinin tapılmasına yol açacq. Məsələn, Rusiya sülhməramlılarının təminatı, Dağlıq Qarabağa humanitar yardımın aparılması və digər bu kimi işlərin Azərbaycan üzərindən həyata keçirilməsi daha sərfəlidir. Ermənistan üzərindən sözügedən işlərin görülməsi Rusiyaya baha başa gəlir. Çünki Ermənistan Rusiya ilə quru sərhədinə malik deyil. Rusiya Ermənistanla əlaqələri Gürcüstan vasitəsilə qurduğu üçün xərclər artır. Üstəlik, Abxaziyadakı məlum vəziyyətlə əlaqədar olaraq dəmir yolu işləmir. Azərbaycanın isə Rusiya ilə sərhədləri var və iki ölkə birbaşa dəmir yolu əlaqəsinə malikdir. Məlum olduğu kimi, Rusiyadan yüklər dəmir yolu ilə Bərdəyə gətirilir, oradan avtomobil nəqliyyatı ilə Dağlıq Qarabağa daşınır. Bütün bunlar iqtisadi baxımdan ölkəmiz üçün sərfəlidir. Ona görə ki, sözügedən işlərin görülməsi zamanı Azərbaycan tərəfinin xidmətlərinə tələbat artır. Bu da qarşılıqlı əlaqələrdə səmərəli nəticələr əldə etməyə imkan verir. Məsələn, tikinti materiallarını Rusiya Azərbaycan vasitəsilə Qarabağa daşıyır. Azərbaycan olmadan bərpa işlərini səmərəli təşkil etmək mümkünsüzdür. Bir sözlə, humanitar və iqtisadi xarakterli fəaliyyət sahələri səmərəli nəticələr verə bilər”.
Ekspert hesab edir ki, ümumən bütün bunlar Azərbaycanın xeyrinədir.
Vidadi ORDAHALLI
