Daha bir rayonumuz - Ağdam erməni faşizminin işğalından azad olundu və bu rayondan olan həmvətənlərimizin də yurd həsrətinə son qoyuldu.
Sevindirici məqam ondan ibarətdir ki, Azərbaycan Ordusu heç bir itki, şəhid vermədən, qan tökülmədən Ağdam rayonuna daxil oldu. Bundan sonrakı qısa zaman kəsiyində Kəlbəcər və Laçın rayonlarının boşaldılması və Azərbaycana təhvil verilməsi prosesi də uğurla başa çatacaq.
Qeyd edək ki, 1150 kv. km. ərazisi olan Ağdam çox böyük strateji əhəmiyyətə malikdir. Ağdam Azərbaycanda ən böyük rayonlardan biridir.
Onu da vurğulayaq ki, Ağdam ağır, yeyinti və yüngül sənayeyə, inkişaf etmiş kənd təsərrüfatına malik rayon olub. Rayon ərazisi bitkiçilik və heyvandarlıq üzrə fermer təsərrüfatlarının və aqroparkların yaradılması, sənaye məhəlləsinin formalaşdırılması, müalicəvi və idman turizminin inkişafı istiqamətində geniş perspektivləri özündə əks etdirir. Həmçinin, Ağdam rayonu ticarət mərkəzinin də formalaşması üçün unikal perspektivə malikdir. Topdan və pərakəndə ticarət məntəqələrinin fəaliyyətə başlaması ilə rayon əhalisinin geniş məşğulluğunu təmin etmək mümkündür. Habelə, rayon ərazisi tikinti materiallarının istehsalı ilə əlaqədar keçmiş təcrübəyə malikdir. Şahbulaq yüksəkliyində yerləşən daş karxanasının işinin bərpa edilməsi ilə sözügedən sektorda canlanmaya səbəb ola bilər.
Bir sözlə, Ağdam rayonu iqtisadi baxımdan strateji əhəmiyyətə malik bölgədir. Ermənistanın Ağdamı itirməsi onlar üçün böyük iqtisadi itki sayılır. Azərbaycanın Ağdamı müharibəsiz, qansız geri qaytarması həm sosial, həm də iqtisadi baxımdan əhəmiyyətlidir.
“İşğaldan əvvəl Ağdam rayonunda yeyinti və yüngül sənaye, kənd təsərrüfatının fərqli sahələri inkişaf etmişdi”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, Ağdam rayonu böyük iqtisadi potensiala malikdir: “Erməni işğalı nəticəsində Ağdamın rayon mərkəzi ilə birlikdə 90 kəndi, 38 kolxozu, 12 sənaye mərkəzi, 74 məktəbi, 271 mədəniyyət evi, 67 idarə və 99 klubu düşmən əlinə keçdi. Məlumdur ki, işğaldan əvvəl Ağdam rayonunda yeyinti və yüngül sənaye, kənd təsərrüfatının fərqli sahələri inkişaf etmişdi. Geniş əkin sahəsi olan və ölkənin ən iri aqrar rayonlarından sayılan Ağdamda 27 il ərzində cəmi 17 min hektar sahədə əkin aparılıb. Ağdam rayonunun torpaqlarının 92 faizi əkin üçün yararlı torpaqlardır. Bu isə rayonun böyük aqrar potensialının olmasından xəbər verir.
Dövlət Statistika Komitəsinin məlumatına görə, 2019-cu ildə Ağdam rayonunda 172 milyon 934 min manatlıq məhsul istehsal olunub. Son 4 ildə ölkəmizin nəzarətində olan Ağdam kəndlərində məhsul istehsalı 70 faizdən çox artıb”.
Millət vəkili hesab edir ki, işğaldan azad olunan Ağdam rayonu qısa zamanda Azərbaycan iqtisadiyyatına xüsusi töhfə verə biləcək. Ağdam yeni bərpa və quruculuq mərhələsinə qədəm qoyur.
Günel CƏLİLOVA
