Pandemiya dövründə AvroBirliklə ticarətimizdə müsbət saldo 4 milyard dollardan çox olub - oturuşmuş iqtisadi model...
Koronavirus pandemiyası və 44 günlük müharibəyə baxmayaraq, 2020-ci ilin 10 ayı ərzində Azərbaycandan Avropa İttifaqı ölkələrinə 6 milyard 145,4 milyon dollar həcmində məhsul ixrac edilib. Bu dövr ərzində Aİ ölkələrindən 2 milyard 43,4 milyon dollar həcmində məhsul idxal olunub. Aİ ölkələri ilə ticarət dövriyyəsində 4 milyard 102 milyon dollar həcmində müsbət ticarət saldosu yaranıb.
Avropa İttifaqı ölkələri arasında ən çox ticarət dövriyyəsinə sahib ölkələrin sırasını İtaliya, Almaniya, Xorvatiya, Yunanıstan, Fransa, İspaniya, Böyük Britaniya, Çexiya, Portuqaliya və Avstriya təşkil edib. Cari dövr ərzində İtaliyaya 3 milyard 880,1 milyon dollar dəyərində məhsul ixrac edilib. Ölkədən Azərbaycana 341,1 milyon dollar dəyərində məhsul idxal olunub.Ticarət dövriyyəsinə görə İtaliyadan sonra Almaniya gəlir. Azərbaycandan ölkəyə ixrac edilən məhsulların ümumi dəyəri 229,6 milyon dollar, oradan idxal olunan məhsulların dəyəri isə 468,2 milyon dollar olub. Sentyabr ayı ilə müqayisədə oktyabr ayında Azərbaycanla ticarət dövriyyəsinin həcminə görə Xorvatiya Yunanıstanı üstələyib. Müvafiq dövrdə ölkəmizdən Xorvatiyaya 448,8 milyon dollarlıq məhsul ixrac edilib. Həmçinin, Yunanıstana ixrac edilən məhsulların ümumi dəyəri 432,5 milyon dollar, idxal olunan məhsulların dəyəri isə 11,1 milyon dollar təşkil edib. Bu dövr ərzində Fransaya ixrac edilən məhsulların həcmi 83,3 milyon dollar olub. Azərbaycanın idxal etdiyi məhsulların dəyəri isə 344,6 milyon dollar təşkil edib.
Ümumilikdə, pandemiya dövründə Avropa Birliyi ilə ticarətimizdə müsbət saldonun əldə olunmasını ekspertlər necə dəyərləndirirlər?
- “Son statistik rəqəmlərə baxanda biz görürük ki, bu sahədə çox ciddi müsbət nəticələr var”
Məsələyə münasibət bildirən iqtisadçı-ekspert Fuad İbrahimovun sözlərinə görə, Avropa Birliyi ölkələri ilə ticarətdə qeydə alınan müsbət saldo Azərbaycan iqtisadiyyatının dayanıqlı olmağından irəli gəlir: “Pandemiya şəraitində belə göstəricilərin əldə olunması müsbət haldır. İqtisadiyyatın dayanıqlığını formalaşdıran əsas prinsiplərdən biri odur ki, idxal-ixrac əməliyyatlarında müsbət saldo olsun. Son statistik rəqəmlərə baxanda biz görürük ki, bu sahədə çox ciddi müsbət nəticələr var. Ticarət dövriyyəsində qeydə alınan müsbət saldo həm də milli valyutanın dayanıqlığını göstərir. İstənilən dünya valyutasının məzənnəsinə təsir edə biləcək ən başlıca amillərdən biri məhz idxal-ixrac əməliyyatları arasındakı balansdır. Balans birbaşa pulun məzənnəsinə təsir edir. Ticarətdə mənfi saldo olanda pulun məzənnəsi aşağı düşür. Müsbət saldo olduqda isə milli valyutanın məzənnəsi möhkəmlənir. Göründüyü kimi, Avropa Birliyi ilə ticarətdə qeydə alınan müsbət saldo manatın məzənnəsinə müsbət təsir edir. Bütün bunlar həm də ölkədə makroiqtisadi göstəricilərin dayanıqlı olmasından irəli gəlir”.
İqtisadçı-ekspert hesab edir ki, Azərbaycan ilin sonuna qədər bu müsbət göstəriciləri qoruyacaq.
Vidadi ORDAHALLI
