Bu gün ölkəmizin iqtisadi inkişaf tempinə görə regionun lider dövlətinə, bir çox nüfuzlu beynəlxalq tədbirlərin məkanına çevrilməsində hər bir vətən övladının öz payı var. Əlbəttə, qazandığımız uğurlar heç də asan başa gəlməyib.
Müstəqilliyimizi yenidən itirmək təhlükəsi ilə üzbəüz qaldığımız illərdə, demək olar ki, Azərbaycan gəncliyi diqqətdən kənar qaldı. Bu bütün sahələrdə geriliyə səbəb oldu, əsas da idman sahəsində. Az qala itmək üzrə olan bir çox idman ənənələrinin yenidən dirçəlməsində gənclərimiz, xüsusən də idmançı gənclərimiz çox çətinliklərlə üzləşsələr də, yenə də inamlarını itirmədilər və onları öz himayəsi altına alan ulu öndərimizin hər bir çağırışına səs verərək qısa zaman kəsiyində Azərbaycan adına böyük qələbələrə imza atdılar.
Dünəndən fərqli olaraq, bu gün gəncliyimiz özünə daha inamlı və güvənclidir. Çünki onların sabahını aydın və parlaq görmək istəyən qüdrətli bir ölkənin vətəndaşı kimi Azərbaycanımızı dünyanın ən mötəbər idman yarışlarında təmsil edirlər. Nəticələr də göz önündədir…
O da idman tariximizdə öz yeri və imzası olan idmançı-məşqçilərdəndir.
Beynəlxalq yarışlarda çoxlu sayda mükafatlar qazanması bunun əyani təsdiqidir.
Onunla həmsöhbət olarkən bir məqam daha çox diqqətimi çəkdi. Ən mötəbər yarışlarda belə qalib olsa da, bunu heç vaxt diqqət mərkəzinə gətirmək istəməyib. Öz uğurlarından çox, yetirmələrinin uğuruna sevinib. Bu gün onlarla yetirməsi həm daxili işlər orqanlarının adına başucalığı gətirir, həm də vətənimizə.
Daxili Qoşunlarda xidmət edən hər bir əsgərin sağlam, daha mübariz yetişməsində onun da danılmaz əməyi var. Məşqçi kimi sərtdir, məsuliyyətlidir, ancaq idmanın insanın iç dünyası ilə birbaşa bağlı olduğunu yetirmələrinə ali bir dəyər kimi aşılayır. “İdmanın təkcə sağlamlıq, özünümüdafiə deyil, həm də qarşındakına sevgiylə yanaşmadır”,- deyir kapitan Aydın Həşimov…
O, 1978-ci ildə Bakıda doğulub. Kiçik yaşlarından idmana həvəs göstərib və 1992-ci ildən “Lokomotiv” İdman Cəmiyyətinin Cüdo bölməsində ilk addımlarını atıb, idmanın digər növlərinin-karatenin, güləşin, boksun sirlərinə yiyələnib. Şərq döyüş sənətləri ilə də maraqlanıb. Sonra cüdo üzrə idman ustalığına namizəd olub, əlbəyaxa döyüş üzrə iki dəfə respublika çempionu olub. Gənc döyüşçü tezliklə əlbəyaxa döyüş, ciu-citsu üzrə beynəlxalq yarışlarda güclü olduğunu sübut edib.
Aydın I dan qara kəmər sahibidir. Rusiyada “kombat sambo” üzrə beynəlxalq idman ustası adına layiq görülüb. Yalta şəhərində döyüş növləri üzrə peşəkarlar arasında ən texnikalı idmançı adını qazanıb. 2007-ci ildə Tbilisidə keçirilən Qrənd Pri Silver Svord beynəlxalq superturnirin çempionu, peşəkarlar arasında 2008-ci ildə Dünya kubokunun sahibi, 2009-cu ildə Rusiyada qaydasız döyüş üzrə M1 finalçısı olub.
Ən böyük uğura isə Çin xalq Respublikasında imza atıb. Orada xüsusi təyinatlılar arasında keçirilən super turnirin çempionu olmaqla yanaşı, bu ölkənin İdman Akademiyasının kubokunun sahibi olan ilk azərbaycanlıdır.
Aydın Həşimov bilik və bacarığını gənclərə öytərmək üçün DİN rəhbərliyi tərəfindən yaradılan şəraitdən razılıq edir. Pedoqoji fəaliyyətlə də məşğul olur həmkarımız. DİN İdman Cəmiyyətinin Əlbəyaxa döyüş bölməsində, A.Heydərov adına Sıravi və Kiçik Rəis Heyəti Hazırlayan Məktəbdə məşqçi-müəllim kimi əlbəyaxa döyüşün sirlərini gənc həmkarlarımıza sevə-sevə öyrədib. Bu gün də DQ-nin “N” saylı hərbi hissəsində xidmətdədir, idmandadır…
Onun xidmətləri ölkə və DİN rəhbərliyinin diqqətindən kənarda qalmayıb. Məhz buna görə də kapitan Aydın Həşimov 2007-ci ildə Azərbaycan Respubklikasının Prezidenti tərəfindən “Hərbi xidmətlərə görə” medalı ilə təltif olunub.
Yeri gəlmişkən, bu yaxınlarda ondan çox komandanın iştirak etdiyi əlbəyaxa döyüş üzrə keçirilən DİN birinciliyində onun yetirmələri güclü olduqlarını bir daha sərgiləyib və nəticədə 4 qızıl, 2 gümüş və 1 bürünc medal qazanıblar. Hansı komandanın qalib olduğunu isə qazanılan medallar deyir, yəni əlavə şərhə ehtiyac yoxdur…
Yarışla bağlı təəssüratlarını bölüşərkən bundan sonra da Vətənə yanlız qələbə qazandıra biləcək idmançıların yetişməsi üçün əlindən gələni edəcəyini bildirən kapitan Aydın Həşimov Daxili Qoşunların, ümumiyyətlə, bütün əsgərlərimizn əlbəyaxa döyüşün sirlərinə yiyələnməsinin vacib olduğunu bildirir. Deyir ki, qələbə təkcə topla, tüfənglə əldə olunmur, burda fiziki güc, qüvvə və sağlam ruhun aşılanması da vacibdir.
Hafiz TƏMİROV polis mayoru
