Daxili işlər orqanlarında şəxsi heyətin fiziki, xidməti-peşə və döyüş hazırlığının daim yüksək səviyyədə saxlanması məqsədilə müvafiq tədbirlər görülür. Bu sırada asudə vaxtın düzgün təşkili məsələsinə də xüsusi diqqət yetirilir. Belə tədbirlərdə Qusar Rayon Polis Şöbəsinin əməkdaşları komanda oyunlarında, idmanın ayrı-ayrı növlərində bacarıqlarını artırır.
Bu yaxınlarda Gənclər və İdman Nazirliyinin Qusar rayon idarəsinin təşkilatçılığı ilə Qusar Rayon Olimpiya İdman Kompleksində ölkəmizin tanınmış idmançısı, Fəxri Bədən Tərbiyəsi və İdman İşçisi Fikrət Qardaşovun xatirəsinə həsr olunmuş mini futbol üzrə açıq rayon birinciliyi keçirilib. Bir ay davam edən birinciliyə dekabrın 20-də yekun vurulub.
DİN Mətbuat Xidmətinin Quba regional qrupundan verilən məlumata görə, turnirdə iştirak edən Qusar RPŞ-nin idmançı əməkdaşlarından ibarət komanda ilk oyunlardan öz fəallığı ilə seçilib, keçirdiyi bütün qarşılaşmalarda inamlı qələbə qazanıb. Final mərhələsinə vəsiqə qazanan polis idmançıların rəqibi Mərkəzi Kitabxana komandası olub. Həlledici görüşdə təmsilçilərimiz hesabı açsa da, sonradan hesab bərabərləşib. Qalibi müəyyən etmək üçün penal zərbələri təyin olunub. Yekunda Qusar RPŞ-nin komandası turniri ikinci pillədə başa vurub.
Komandaya diplom təqdim olunub.
Nizam HƏMİDOV polis leytenantı
