Həmin gün moskvalılar, elə yarışa gələn idmançılar da heyrət içində idilər. O, əsl pəhləvanlıq nümunəsi göstərmişdi. Bu barədə xəbərlər saytların manşetinə çevrilmişdi, telekanallar maraqlı sujetlər hazırlamışdı…
Həm yarışla bağlı fikirlərini, həm də qələbə sevincini bölüşmək üçün onu redaksiyamıza dəvət etdik. Gəldi, amma üzündəki kədər ifadəsi diqqətimizdən yayınmadı. Bu barədə bir az sonra…
Bu gün Azərbaycan adına uğura imza atan, bayrağımızı ucalara qaldıran hər bir soydaşımız, Vətən oğlu, Vətən qızı bir atanın, bir ananın, bir nəslin övladı olmur, o, böyük Azərbaycanın övladı kimi tarixə həkk olunur, yaddaşa yazılır.
Onu idman aləmi yaxşı tanıyır. Adı gələndə “Qüvvət, güc Razimin fitrətindədir”,- deyirlər.
Məhz buna görə də hansı yarışa gedibsə oradan əliboş gəlməyib. Elə noyabrın 1-dən 6-dək Moskvada keçirilən pauriftlinq üzrə dünya çempionatından da qələbə ilə dönüb. Soyuq diyarda Odlar yurdunun qaynarqanlı övladı himnimizi səsləndirib, bayrağımızı ucaldıb. Qalanını elə öz dilindən eşitsək yaxşı olar: “Bu yarışa xüsusilə hazırlaşmışdım. Çünki dünyanın ən titullu idmançıları burada öz güclərini sınayacaqdılar. Yarışda 30-dan çox ölkənin 48 kiloqramdan 200 kiloqramadək olan 1300 idmançısı iştirak edirdi. Mən 125 kiloqram çəki çıxış edirdim. Rəqiblərim məni yaxşı tanıyırdılar, hətta bəzi qısqanclıqların da şahidi oldum. Ən güclü rəqibim dördqat dünya çempionu və dünya rekordçusu Aleksandr Zaytsev idi. Onun orada olması sanki moskvalıları ürəkləndirmişdi, çünki öz çəki dərəcəsində qızıl medalın sözsüz sahibi o hesab olunurdu. Ancaq mən özümə söz vermişdim ki, bu yarışda qələbə qazanıb Azərbaycan Polsinin ən güclülərdən biri olduğunu sübut edəcəyəm. Nəhayət, noyabrın 3-ü-sınaq günü gəlib çatdı. Çəkisi 125 kiloqramadək təchizatsız yarışan idmançıların sırasında çiyində ştanqla oturub qalxma hərəkətində 345 kiloqram, ştanqı qurşağadək dartmaqda 330 kiloqram, ştanqı sinədən qaldırma hərəkətində isə 250 kiloqramın öhdəsindən gəlməklə ümumilikdə 925 kiloqram nəticə ilə millimizin medal mücrüsünə daha bir qızıl medal əlavə edib həm dünya çemmpionu adını qazandım, həm də dünya rekorduçusu oldum. Üstəlik, rusiyalı idmançı Aleksandr Zaytsevin neçə illərdir dəyişməyən rekordunu təzələdim. Hər yarışdan gələndən sonra qələbə sevincimi anamla bölüşürdüm. Ancaq bu dəfə…”…
Səbail Rayon Mühafizə İdarəsinin əməkdaşı, polis baş serjantı Razim Hüseynovun uğurları DİN və BMİ rəhbərliyinin diqqətindən kənarda qalmır. Bunu özü də dönə-dönə təkrarlayır. Deyir ki, əgər şərait yaradılmasaydı, idmana belə qayğı göstərilməsəydi, çətin ki, bu uğurlu nəticələri əldə edərdi.
Onu qarşıda respublika çempionatı və Amerikada keçirilən dünya çempionatı gözləyir.
İnanırıq ki, həmkarımız üzümüzə gələn ildə də bizi yeni-yeni qələbələri ilə sevindirəcək, Azərbaycann Polisinin idman tarixinə adını qızıl hərflərlə yazdıracaq.
Hafiz Təmirov, polis mayoru
