“Azərbaycanda uşaq taekvando məkəbi çox güclüdür” “Bu sahəyə göstərilən dövlət qayğısı uşaq və yeniyetmələrin taekvandoya kütləvi axın etməsinə münbit şərait yaradır”
Uşaq taekvando məktəbi həmişə dövlətin diqqət mərkəzində olub. Bu gün respublikamızın ayrı-ayrı yerlərində müxtəlif taekvando klubları faəliyyət göstərir. Həmin klublardan biri də “Qala” taekvando klubudur. Bu klub Azərbaycan uşaq taekvando məktəbinin inkişafında çox işlər görür. Bu günlərdə klubda olduq və klubun rəhbəri, 4-cü dan qara kəmər sahibi, 1-ci dərəcəli məşqçi Ramil Həsənovla klubun fəaliyyəti, nailiyyətləri barədə danışdıq.
- Ramil müəllim, bu günlərdə Gürcüstanda keçirilən beynəlxalq taekvando yarışından qayıtmısınız. Azərbaycanı təkcə Sizin rəhbərlik etdiyiniz “Qala” taekvando klubunun üzvləri təmsil edirdi, yoxsa başqa komandalar da vardı?
- Azərbaycandan bu yarışa 10-a yaxın komanda qatılmışdı. Bu klubların da hamısı Azərbaycan Taekvando Federasiyasının nəzdindədir. Bu yarış Tiflis şəhərində keçirildi.
- Komanda şəklində yanaşsaq, bu yarışda Azərbaycan necə nəticə göstərdi?
- Azərbaycan komandası birinci oldu. Bu gün Azərbaycanda dövlət səviyyəsində idmana böyük qayğı və diqqət var. Cənab Prezident İlham Əliyev idmanın inkişafı üçün çox böyük işlər görür. Mən burada ölkəmizin 1-ci vitse-prezidenti Mehriban xanım Əliyevanın da idmana qayğısını xüsusi vurğulamaq istəyirəm. Ölkəmizdə, sözün əsl mənasında, idman güclü şəkildə inkişaf edib. Bu da idmanla bağlı həyata keçirilən uğurlu işlərin nəticəsidir. Taekvando Federasiyasının prezidenti Kəmaləddin Heydərov taekvandoçulara, taekvando klublarına böyük diqqət və qayğı göstərir. O bu sahənin inkişafına çalışır. Kəmaləddin müəllim 2000-ci ildə Taekvando Federasiyasının prezidenti seçildikdən sonra taekvandoçulara daha böyük diqqət göstərdi. Biz hər zaman onun qayğısını öz üzərimizdə hiss edirik. O çalışır ki, idmanın bu sahəsi daim inkişaf etsin, bu yöndə daha böyük nailiyyətlər əldə edilsin. O, taekvandoya çox uğurla rəhbərlik edir. Bu sahədə nailiyyətlərimiz hədsizdir. Fikrimcə, Azərbaycan taekvandoçularının beynəlxalq yarışlarda qazandığı qələbələr, uğurlar buna əyani misaldır.
- Ramil müəllim, “Qala” taekvando klubu həmin yarışda neçə nəfərlə təmsil olunurdu və hansı nəticə qazandınız?
- Klubumuz 3 idmançı ilə təmsil olunurdu. Bunlar Xanmurad Süleymanov, Qurbanlı Emil və Sultan Ağayev idilər. 37 kq çəki dərəcəsində Xanmurad medala qədər gəldi, lakin medala çıxış döyüşündə uduzdu. Emil Qurbanov 53 kq çəki dərəcəsində döyüşdü, II yerə, Sultan Ağayev isə III yerə çıxdı.
- Həmin yarışda neçə ölkə təmsil olunurdu?
- Yarışmada Azərbaycan, Türkiyə, İran, Ukrayna, Ermənistan, Gürcüstan daxil olmaqla 10-a qədər ölkə təmsil olunurdu.
- Azərbaycan taekvandoçuları erməni klublarının təmsilçiləri ilə qarşılaşdılarmı?
- Bəli. Bizim idmançıların əksəriyyəti erməni döyüşçülərinin üzərində qələbə çaldı. Düzdür, “Qala” taekvando klubunun təmsilçilərindən erməni ilə qarşılaşan olmadı, ancaq digər klublarımızın üzvləri ermənilərlə döyüşdü və onları uddu. Bilirsiniz, hər bir azərbaycanlı idmançı ilk növbədə vətəndaş olduğunu unutmur. Biz idmançılar dövlətimizin, xalqımızın maraqlarını hər şeydən üstün tuturuq. İdmançılar yarışa qatılanda istəyirlər ki, ermənilərlə qarşılaşıb onlara qalib gəlsinlər. Bu onların Vətənə, dövlətə, bayrağa sədaqətindən irəli gəlir.
- Ramil müəllim, “Qala” taekvando klubu tez-tez yerli və beynəlxalq əhəmiyyətli yarışlara qatılır. Bilmək istəyirəm ki, bu yarışlar klub üzvlərinin inkişafına necə təsir göstərir?
- Ümumiyyətlə, yarışlarda aktivlik göstərmək, mütəmadi olaraq iştirak etmək klub üzvlərinin inkişafına, döyüşdən-döyüşə daha da təkmilləşərək keçməsinə böyük şərait yaradır. Klub mütəmadi olaraq yarışlara qatılır. Tiflisdən əvvəl Saatlıda və Qəbələdə keçirilən turnirlərdə iştirak etmişik. Uşaqlarımız pis nəticə göstərmədilər. Həmin yarışları da bir neçə medalla başa vurduq.
- Taekvandoçu üçün əsas psixoloji hazırlıqdır, yoxsa fiziki güc? Yəni onu qələbəyə daha çox hansı keyfiyyəti aparır?
- Bu məsələ kompleks yanaşma tələb edir. İdmançıya həm psixoloji hazırlıq, həm də fiziki güc gərəkdir. Bunları bir-birindən ayırmaq olmaz.
- Uşaqların özlərinin yarışlara marağı necədir?
- Həvəsi olan uşaqlar çoxdur. Uşaqlarımız var ki, heç bir yarışdan qalmır. Perspektivli tələbələrim də az deyil. Gələcəyinə ümid bəslədiyim uşaqlar var. Məsələn, Əsgər Həsənin, Emil Qurbanlının, Xanmurad Süleymanovun, Sultan Ağayevin, Kənan Yusifovun, Ayxan Qurbanlının, Mircəfər və Mirnadir Cəfərov qardaşlarının, Fatimə və Əli İsmayılovların (qardaş-bacı) və başqa uşaqların adını çəkə bilərəm. Adlarını çəkdiyim və çəkmədiyim uşaqlarımız var ki, onların gələcəyi böyükdür. İdmançıları uşaqlıqdan hazırlamalıyıq ki, onlardan gələcəkdə müsbət nəticələr əldə edə bilək. Klubumuz bu yöndə davaml olaraq çalışır, fəaliyyət göstərir. Bunun nəticəsidir ki, klubumuz indiyə qədər xeyli müsbət nəticəyə nail olub.
- Azərbaycanda taekvando uşaq məktəbinin vəziyyəti necədir?
- Deyərdim ki, Azərbaycanda uşaq taekvando məkəbi çox güclüdür. Bizdə bu sahə inkişaf edib. İdman belədir ki, orada mütləq uşaq məktəbi olmalıdır. Uşaq məktəbi olmasa, gələcək üçün böyük idmançı yetişdirmək mümkün deyil.
- Ümumiyyətlə, Azərbaycan taekvando məktəbi zəif deyil.
- Bu gün, demək olar ki, Azərbaycan taekvandoçuları dünyada birinci yerdədir. Olimpiya Oyunlarında taekvando sahəsində bir qızıl, iki bürünc qazandıq, Dünya kubokunda iki il davamlı olaraq Azərbaycan komandası birinci yerdə oldu. Avropa çempionatlarında da ölkəmiz, demək olar ki, həmişə öndə olub. Bizim taeklvando komandası dünyada ən güclü komandadır.
- “Qala” taekvando klubu nə vaxtdan fəaliyyət göstərir?
- Bu il klubumuzun 10 illiyidir. Klubumuzun həmişə istedadlı təmsilçiləri olub. İndiyə qədər çoxlu nailiyyət qazanmışıq. Avropa çempionumuz olub. Dünya və Avropa çempionatlarında iştirakçılarımız, mükafatçılarımız var. Beynəlxalq turnirlərdə böyüklər arasında çempionlarımız da, II, III yer tutanlarımız da olub. Biz uşaqları yetişdirib Azərbaycan çempionatına çıxarırıq. Çempion olanlar isə yığma komandaya düşür. Ondan sonra yığma komandanın məşqçiləri onlarla məşğul olurlar, təlim-məşq toplantısı keçirlər, idmançıları yarışlara hazırlayırlar.
- Yeri gəlmişkən, uşaqların idmana cəlb edilməsində yaş faktoru necə nəzərə alınır? Ümumiyyətlə, Sizin idman növünə uşaqlar neçə yaşdan götürülür?
- Uşaqları 5 yaşından götürürük. Bu da uşağın fərasəti, idmana marağı, aktivlik səviyyəsi ilə bağlıdır. Elə uşaq olur ki, 5 yaşında da qıvraq olur, hərəkətli olur, hərəkətləri tez mənimsəyir. Elə uşaq da var ki, 15 yaşındadır, ancaq heç nə götürə bilmir. İdmana, sadəcə, öz sağlamlığı üçün gəlir, yəni idmanla peşəkar səviyyədə məşğul olmur. Düzdür, idmana hamı ilk növbədə sağlamlıq üçün gəlir. Ancaq idmanla peşəkar səviyyədə məşğul olan uşaqlarımız çoxdur. Uşağın yaxşı idmançı kimi yetişməsində valideynin də rolu böyükdür.
- Nə mənada?
- O mənada kı, uşağını vaxtlı-vaxtında məşqə gətirir, onun yarışlara çıxmasına kömək edir. Bir sözlə, valideyn uşağa dəstək göstərməlidir ki, uşaqda özünə inam formalaşsın. Bilirsiniz ki, bizim klubun sponsoru yoxdur. Biz valideynlərin maliyyəsi hesabına yarışlara gedirik. Klub özü-özünü maliyyələşdirir.
- Hazırda klubun nə qədər üzvü var?
- 100-dən çoxdur. Klubun filialları da var. Filiallarımızdan biri “Azadlıq” metrosu yaxınlığında yerləşir. Orada tələbəm Avropa çempionu Fatma İbrahimova məşq keçir. Fatma İbrahimova yeniyetmə qızlar arasında ilk Avropa çempionu olub. O biri filialımız isə Sulutəpə qəsəbəsindədir. Orada məşqləri Xaliq Umudov keçir. O da tələbəmdir və ikiqat respublika çempionudur. Hər ikisi gənc məşqçilərdir və sözsüz ki, gələcəkləri çox gözəl olacaq.
- Belə çıxır ki, tələbələrinizi işlə də təmin edirsiniz...
- Bəli. Həm mənə kömək edirlər, həm özləri işləyirlər.
- Ramil müəllim, tez-tez “Qala” klubunda da, digər klublarda da yoldaşlıq görüşləri keçirilir. Yoldaşlıq görüşlərinin əhəmiyyəti nədir?
- Yoldaşlıq görüşlərinin uşaqların yetişməsində rolu çoxdur. Uşaq nə qəədr çox yarış görsə, bir o qədər irəliyə addım atır, inkişaf edir. Çünki zal məşqi ilə elə də inkişaf etmək, irəli getmək olmur. Uşağı zalda məşq etdirib yetişdirsək və onu ildə bir dəfə yarışa çıxarsaq, o uşaqdan heç bir müsbət nəticə gözləmək olmaz. Ancaq, ən azından, ayda 1 dəfə uşaqlar yarış görməlidirlər. Uşaq yarışlarda iştirak etməli və tatamini hiss etməlidir. Bu ona görə lazımdır ki, onlar böyük yarışlara çıxanda özlərini tatami üzərində rahat hiss etsinlər. Yarışsız idmançının inkişaf etməsi mümkün deyil.
- Özünüz nə vaxtdan taekvandodasınız?
- 1990-cı ildən bu sahədəyəm. 2005-ci ilə qədər yarışlarda iştirak etmişəm.
- Harada məşğul olurdunuz?
- Əslən tovuzluyam, amma Bakıda yaşamışıq. İlk dəfə Xoreoqrafiya məktəbində taekvando zalında məşğul olmuşam. Süleyman Məmmədlinin tələbəsi olmuşam. Taekvandonu Azərbaycana Süleyman Məmmədli gətirib. Sonra Qüdrət Kərimovun yanında məşğul olmuşam. Hazırda respublikamızda taekvando üzrə güclü müəllimlərin, güclü idmançıların məşqçisi Qüdrət Kərimov olub.
- Yaxşı idmançı olmaq olar. Amma yaxşı müəllim olmaq çətin məsələdir... Siz yaxşı idmançı və yaxşı müəllimsiniz. Bunun sirri nədir?
- Bilirsiniz, müəllimlik xüsusi bir qabiliyyətdir. O hər idmançıda olmayan keyfiyyətdir. O qədər güclü idmançılar var ki, idman sahəsində çoxlu nailiyyətləri var, Dünya və Olimpiya çempionu olublar. Ancaq onları zala buraxsan, uşaqları hazırlaya bilməzlər. Elə məşqçilər də var ki, elə də böyük nailiyyəti yoxdur, lakin öyrətmək, mənimsətmək qabiliyyəti çox yüksəkdir. Əsl məşqçinin, müəllimin uşaqlarla işləmək bacarığı olmalıdır.
- Sizin nailiyyətlərinizə gələk...
- Yeniyetmələr və gənclər arasında respublika çempionu olmuşam. Demək olar ki, həmişə finalda döyüşmüşəm. Beynəlxalq turnirlərdə iştirak etmişəm. Beynəlxalq turnirlərin qalibi və mükafatçısı olmuşam. Bu sahədə uğurlarım az olmayıb. Mən artıq 10 ildən artıqdır məşqçiliklə məşğulam, uşaq və yeniyetmələrlə işləyirəm. Bu sahəyə göstərilən dövlət qayğısı uşaq və yeniyetmələrin taekvandoya kütləvi axın etməsinə münbit şərait yaradır.
- Digər taekvando klubları ilə əməkdaşlığınız varmı?
- Bütün klublarla əlaqəmiz var, hamısı ilə də əməkdaşlıq edirik. Ya biz gedirik, ya da onlar klubumuza gəlib yoldaşlıq görüşləri keçiririk. Heç olmasa həftədə bir dəfə yoldaşlıq görüşləri keçiririk.
İradə SARIYEVA
