“O zaman mənzərə onun üçün tamamilə aydın ola bilər və belə cəfəng fikirlər səsləndirməz”
Avropa Şurasının insan hüquqları üzrə komissarı Dunya Miyatoviç Azərbaycanda dördgünlük səfərdə olub. Səfər zamanı o bir sıra görüşlər keçirib. İyulun 9-dan 12-dək davam edən səfər zamanı komissar hakimiyyət nümayəndələri, o cümlədən xarici işlər naziri Elmar Məmmədyarov, ədliyyə naziri Fikrət Məmmədov, daxili işlər naziri Vilayət Eyvazovla görüşüb. Prezident Administrasiyasında beynəlxalq əlaqələr şöbəsinin müdiri Hikmət Hacıyevlə siyasi məsələləri müzakirə edib. Həmçinin baş prokuror Zakir Qaralov, Ali Məhkəmənin sədri Ramiz Rzayev, Qaçqınlar və Məcburi Köçkünlərin İşləri üzrə Dövlət Komitəsinin sədri Rövşən Rzayev, ombudsman Elmira Süleymanova, vətəndaş cəmiyyətinin nümayəndələri, hüquqşünaslar, Vəkillər Kollegiyasının sədri və üzvləri ilə görüşlər olub. Komissarın səfərinin başqa bir istiqaməti Azərbaycanda vəkillərin vəziyyəti olub. Komissar qeyd edib ki, Avropa Şurası ölkələri arasında Azərbaycanda 100 000 sakinə düşən hüquqşünasların sayı azdır. Bu, əsasən kəndlərdə, vəkillərin sayının çox az olduğu yerlərdə ədalət mühakiməsinə çıxış imkanlarını azaldır. Ən qəribəsi odur ki, Myatoviç səfərin sonunda Azərbaycandakı ifadə azadlığı ilə bağlı tənqidi fikirlər səslndirib. Onun sözlərinə görə, guya Azərbaycanda ifadə azadlığı əvvəlkitək təhlükə altındadır. Onun bu fikirləri nə dərəcədə doğrudur?
Məsələyə münasibət bildirən “Xalq Cəbhəsi” qəzetinin baş redaktoru Elçin Mirzəbəylinin sözlərinə görə, Azərbaycanda ifadə azadlığı ilə bağlı səslənən bu kimi tənqidlərin heç bir əsası yoxdur: “Məlumat və ifadə azadlığını müəyyənləşdirmək üçün kriteriyalar var. Bu kriteriya və standartları da Myatoviç yaxşı bilməlidir. Azərbaycanda hər kəs öz fikirlərini açıq şəkildə ifadə edə bilir. Ölkənin bütün əhalisi internetlə təmin olunub. Milyonlarla insan sosial şəbəkələrə çıxış əldə edib. Açıq şəkildə öz fikirlərini ifadə edirlər. Çoxsaylı bloggerlər var ki, yutub və sosial şəbəkələr vasitəsilə öz fikirlərini ifadə edirlər. Media azadlığına gəldikdə isə, bu sahədə heç bir problem yoxdur. Azsaylı ölkələrdənik ki, Azərbaycan dövləti siyasi baxışlarına və dünyagörüşlərinə fərq qoymayaraq bütün media qurumları üçün bərabər imkanlar yaradıb. Onlara maddi dəstək verərək ifadə azadlığını təmin edir. Bu konteksdən yanaşdıqda, səslənən tənqidi fikirlərin heç bir əsası yoxdur. Azərbaycanda ifadə azadlığı problemi yoxdu və olmayacaq da. Myatoviç, yaxşı olardı ki, Ermənistana xüsusi olaraq diqqət yetirsin. Paşinyan hakimiyyəti tərəfindən redaksiyalardan qovulan jurnalistlərə nəzər salsın. Eyni zamanda, Avropa İttifaqında həbs olunan çoxsaylı jurnalistlərə baxsın. O zaman mənzərə onun üçün tamamilə aydın ola bilər və belə cəfəng fikirlər səsləndirməz”.
Vidadi ORDAHALLI
