25/08/2019 18:17
728 x 90

Ermənistanın regionda Azərbaycanın üçtərəfli əməkdaşlıq formatlarını gülünc yamsılamaq cəhdi - Ermənistan-Gürcüstan-İran...

Elşən Mustafayev: “Qərbə doğru meyllənən Gürcüstanın İranla belə əməkdaşlıq formatında təmsil oluna biləcəyi inandırıcı sayılmır”

img

Bütün sahələrdə ciddi böhran yaşayan Ermənistan indi də Azərbaycanın bəzi ölkələrlə yaratdığı əməkdaşlıq formatlarını təkrarlamağa cəhd edir. Məlumdur ki, Azərbaycan bütün yaxın qonşuları ilə ikitərəfli və üçtərəfli formatlar çərçivəsində yaxından əməkdaşlıq qurub. Ən maraqlısı isə budur ki, bütün bu əməkdaşlıq formatlarının təşəbbüskarı qismində də Azərbaycanın özü çıxış edir.

Ermənistanın hakim partiyasını təmsil edən “Mənim addımım” fraksiyasının sözcüsü Manukyan jurnalistlərə açıqlamasında bildirib ki, yaxın qonşuları olan ölkələrlə İran-Ermənistan-Gürcüstan formatında uğurlu əməkdaşlıq etməkdə maraqlıdırlar. Belə əməkdaşlıq formatı nə dərəcədə mümkünüdür? Ekspert Elşən Mustafayev “Bakı-Xəbər”ə açıqlamasında bildirdi ki, əvvəla, bu təşəbbüsün niyə məhz indiki məqamda ortaya çıxdığına diqqət etməliyik: “Ermənistanın hakim dairələrinə yaxın şəxslərin belə açıqlama ilə çıxış etməsi təsadüfi sayıla bilməz. İrana qarşı təzyiqlərin artdığı bir dönəmdə Ermənistan niyə üzünü Tehrana doğru tutmaq istəyir? Burda söhbət qaz şantajından gedir. Ermənistan hökumətini narahat edən məsələlərdən biri də Rusiyadan alınan təbii qazın qiyməti ilə bağlıdır. Çünki qaz enerjidaşıyıcısı olmaqla yanaşı, ölkədə elektrik enerjisinin, gündəlik tələbat mallarının qiymətinə, demək ki, baş nazirin reytinqinə birbaşa təsir göstərən amildir. O səbəbdən Nikol Paşinyan hakimiyyətə gələr-gəlməz əlindən gələni edir ki, Rusiya satdığı qazı bahalaşdırmasın. Lakin İrəvan hələ də Moskva ilə məqbul qaz anlaşmasına nail ola bilməyib. Bu il yanvarın 1-dən “Qazprom” işğalçı ölkəyə satdığı “mavi yanacaq”a qiyməti hər min kubmetr üçün 150 dollardan 165 dollara qaldırıb. Artıq Ermənistan rəsmiləri bəyan edir ki, Rusiya 2020-ci il yanvarın 1-dən qiyməti 200 dollara qaldıracaq. Görünür, bütün bunları nəzərə alan Ermənistan rəhbərliyi altdan-altdan Rusiya qazına alternativ axtarır. Məhz bu xüsusda İran onlar üçün əlverişli sayıla bilər. Digər qonşu ölkələrin onlara qaz satma ehtimalı yoxdur. Ermənistan bu layihəyə Gürcüstanı da qoşmaq istəməklə özünə yoldaş axtarır. Ancaq Qərbə doğru meyillənən Gürcüstanın İranla belə əməkdaşlıq formatında təmsil oluna biləcəyi inandırıcı sayılmır. Onu da yada salaq ki, İranın energetika sektoruna sanksiya tətbiq edən ABŞ ölkələrə müraciət edərək, Tehrandan neft-qaz almamağa çağırıb. Vaşinqton bu çağırışa məhəl qoymayan dövlətləri dəfələrlə sanksiyalarla təhdid edib. Göründüyü kimi, Ermənistan bu təhdidlərə məhəl qoymaq istəmir. Hətta öz ağası Moskvanı da şantaj edir ki, Rusiya qazını ucuz İran qazı ilə əvəzləyə bilər. Ermənistan fərdi şəkildə İranla qaz sövdələşməsinə gedə bilər. Amma İran da Ermənistana qazı havayı satmaq niyətində deyil. Razılaşma olsa belə, Ermənistan ABŞ-ın ciddi təzyiqləri ilə üzləşəcək. Gürcüstanın bu formatda təmsil oluna bilmə şansı isə sıfıra bərabərdi. Bunu da Ermənistanın növbəti uydurması saya bilərik”.

Məhəmmədəli QƏRİBLİ

Son xəbərlər