19/09/2019 00:41
728 x 90

Qondarma “Qarabağ Respublikası”nın rəhbərliyi Azərbaycana qarşı yeni ərazi iddiaları irəli sürdü

Elşən Mustafayev:”Səslənən iddialar tamamilə absurddu, heç bir hüquq və normalara sığmır”

img

Ermənistanın Xarici İşlər naziri Zohrab Mnatsakanyanın növbəti dəfə Azərbaycan Respublikasının dövlət sərhədini pozaraq işğal altındakı torpaqlarımıza səfəri zamanı onunla görüşüb məsləhətləşən qondarma separatçı rejimin “xarici işlər naziri” sayılan Masis Mailyan bəyanatla çıxış edib. Erməni KİV-inin yaydığı məlumata görə, separatçı “nazir” qondarma rejimin danışıqlarda tərəf kimi çıxış etməsi tələbini səsləndirməklə yanaşı, “Artsax”ın ərazi bütövlüyünün bərpasına çalışmaq”dan da danışıb. Söhbət, əsasən, keçmiş Dağlıq Qarabağ Muxtar Vilayəti tərkibində Azərbaycanın tarixi və konstutision torpaqları olan keçmiş “Şaumyan” və hazırkı Xocavənd və Tərtər rayonlarının (keçmiş Ağdərə rayonunun bir sıra kəndləri) dövlətimizin nəzarətində olan hissələrindən gedir. Bunlar 1991-ci ildə Çaykənd əməliyyatları zamanı azad edilmiş separatçı rejimin Kəlbəcər rayonunun ərazisini də “daxil edərək” qanunsuz “Şaumyan rayonu” tərkibinə saldıqları hazırda Göygöl və Goranboy rayonlarına daxil edilən Çaykənd, Qarabulaq, Azad, Todan, Meşəli, Buzluq, Ağcakənd, Gülüstan və s. kəndlərdir.

Göründüyü kimi, qondarma qurum rəhbərliyi işğaldan əl çəkmək əvəzinə, hətta Azərbaycana qarşı yeni ərazi iddiaları irəli sürür. Separatçıların bu addımı nəyə hesablana bilər?

Ekspert Elşən Mustafayev “Bakı-Xəbər”ə bildirdi ki, bununla Ermənistan rəhbərliyi sülhə sadiq olmadıqlarını sübut edir: “Beynəlxalq vasitəçilərin sülhə ümidlə yanaşdıqları, bunun təşviq edildiyi bir zamanda ermənilərin bu azqınlığı başadüşülən deyil. Bilirsiniz ki, qondarma qurum rəsmisi bu bəyanatı özbaşına verə bilməz. Bu, birmənalı şəkildə Ermənistanın siyasi rəhbərliyi ilə razılaşdırılıb. Adıçəkilən ərazilər birbaşa Azərbaycanın ərazi subyektinə aiddir. 1991-ci ildə orda aparılan əməliyyatlar nəticəsində ermənilər könüllü şəkildə oranı tərk edib. Qondarma qurumun özünün məskunlaşdığı ərazi də Azərbaycana aiddirsə, hansı “ərazi bütövlüyü”ndən danışmaq olar? Fikir verirsinizsə, bu detal əvvəl onlar tərəfindən qabardılmayıb. Bununla ermənilər diqqəti əsas mövzudan yayındırmağa çalışırlar. Çünki əsas mövzu ondan ibarətdir ki, onlar işğal etdikləri rayonlardan çıxmalıdır. O rayonlardan ki, heç Dağlıq Qarabağa aidiyyəti yoxdur. Ancaq uzun illərdi ki, onlar bu istiqamətdə bir addım da atmırlar. Azərbaycan kiminsə ərazisinə aid torpaqları zəbt etməyib ki, onları kiməsə qaytara. Münaqişə həllini tapandan sonra ermənilərin Azərbaycan vətəndaşı kimi Dağlıq Qarabağ və ətraf ərazilərdə yaşamasına kimsə etiraz etməyəcək. Bunun üçün onlar konstruktiv olmalı, işğaldan əl çəkməlidirlər. Səslənən iddialar tamamilə absurddu, heç bir hüquq və normalara sığmır. Sadəcə, prosesi uzatmağa hesablanmış gedişatlardı. Qondarma qurum rəsmən tanınmadığı üçün, onların “rəsmilərinin” səsləndirdiyi bəyanatlara ciddi fikir verməyə də lüzum görmürəm”.

Məhəmmədəli QƏRİBLİ

Son xəbərlər