Azərbaycan Respublikasının Maliyyə Bazarlarına Nəzarət Palatasının maliyyə bazarları, o cümlədən ödəniş sistemləri sahəsində həyata keçirdiyi tənzimləmə və nəzarət çərçivəsində Azərbaycan Respublikasının işğal altında olan ərazilərində fəaliyyət göstərən banklar tərəfindən beynəlxalq kart təşkilatlarının brendini daşıyan ödəniş kartlarına xidmət göstərilməsi faktları müəyyən edilib. Həmçinin, qondarma “Dağlıq Qarabağ Respublikası”nın “maliyyə nazirliyinin” rəsmi internet səhifəsi üzərindən maddi yardımın toplanması faktı aşkarlanıb. Bu barədə Maliyyə Bazarlarına Nəzarət Palatasının yaydığı məlumatda deyilir.
Qeyd edilir ki, bu faktların mövcudluğu ölkəmizin suverenliyinin və ərazi bütövlüyünün, beynəlxalq hüquqi normaların pozulması, “çirkli pulların yuyulması” və terrorizmin maliyyələşdirilməsi baxımından əlverişli şəraitin yaradılması, habelə beynəlxalq kart təşkilatları tərəfindən müəyyən edilmiş tələblərin gözlənilməməsi deməkdir. Palata tərəfindən aşkar olunmuş faktlar əsasında “Visa Inc.” və “MasterCard Worldwide” beynəlxalq kart təşkilatının rəhbər nümayəndələri ilə görüşlər keçirilərək? bu təşkilatların brendini daşıyan ödəniş kartlarına işğal olunmuş ərazilərdə xidmət göstərilməsinin təxirə salınmadan dayandırılması diqqətə çatdırılıb. Həyata keçirilən kompleks tədbirlər və birgə fəaliyyət nəticəsində qondarma “Dağlıq Qarabağ Respublikasının” “maliyyə nazirliyinin” rəsmi internet səhifəsi üzərindən beynəlxalq kart təşkilatlarının brendini daşıyan ödəniş kartları ilə maddi yardımların toplanması, habelə işğal olunmuş ərazilərdə bir sıra bankların bankomat şəbəkəsi üzərindən bu ödəniş kartlarının qəbulu dayandırılıb. Palata ödəniş sistemləri sahəsində tənzimləmə və nəzarət çərçivəsində Azərbaycan Respublikasının işğal altında olan ərazilərində fəaliyyət göstərən banklar tərəfindən beynəlxalq kart təşkilatlarının brendini daşıyan ödəniş kartlarına xidmət göstərilməsini daim monitorinq edərək, müvafiq tədbirlərin həyata keçirilməsi diqqət mərkəzində saxlanır. Göründüyü kimi, Azərbaycan bu fəaliyyəti dayandırmaqla qondarma qurumu ciddi bir kanaldan yararlanmaq haqqından məhrum edib. Həmin beynəlxalq kart təşkilatlarının işğal olunmuş ərazilərdəki fəaliyyəti “DQR”ə hansı maliyyə dividendləri gətirirdi və onlar bununla nələrdən məhrum oldular?
İqtisadçı Elşən Əliyev “Bakı-Xəbər”ə bildirdi ki, Azərbaycanın bu səyi ilə əldə olunan nəticəni qənaətbəxş saya bilərik: “Bilirsiniz ki, həmin ərazini müstəqil qurum kimi heç bir ölkə tanımır. Ancaq faktiki olaraq həmin ərazilərdə ermənilər yaşayır və bir sıra işlər görürlər. “DQR”in əsas himayəçisi rolunda çıxış edən Ermənistanın özünün ora lazımı şəkildə maddi yardım etmək, orda icra olunan layihələrə maddi dəstək vermək kimi gücü yoxdur. Artıq bir sıra hesabatlarda dəqiq təsbit olunub ki, Ermənistan həmin ərazilərdən həm də terrorizm, narkotrafik üçün istifadə edir. Eyni zamanda orada süni məskunlaşma aparır. Təbiidir ki, bütün bu fəaliyyətlər beynəlxalq aləmlə kommunikasiya və maliyyə mübadiləsinin olmasını tələb edir. Bu baxımdan beynəlxalq kart sisteminin fəaliyyəti onlar üçün çox əlverişlidi. Bu vasitə ilə separatçı qurum ərazisində olan istənilən şəxsə istənilən məbləğdə pul köçürülə bilər. Ordakı rejim qanuni olmadığı üçün xaricdən daxil olan vəsaitlərin qanuni olub-olmadığını yoxlamaqda heç maraqlı da olmur. Bu da faktdır ki, qondarma qurum ərazisində bir sıra qanunsuz layihələr icra olunur. Elanlarda bildirilir ki, onlara maliyyəni dünyanın müxtəlif ölkələrində fəaliyyət göstərən erməni fondları ötürür. Həmin layihələrin maliyyələşməsində də əlverişli variant kimi kart sistemindən istifadə olunub. Ən əsası isə, qondarma rejimin tez-tez təşkil etdiyi ianə toplama marafonlarına vəsaitlər bu vasitə ilə daxil olurdu. Bu qadağa bütün hallarda qondarma rejimə maliyyə əməliyyatlarını həyata keçirməkdə çətinlik yardacaq. Çox təqdirəlayiq haldı. Ancaq bu iş davamlı olmalıdır. Çünki ordakı rejim yalnız sözügedən iki kart ödənişlərindən istifadə etmir. Ora daxil olan maliyyə marşrutunu tam müəyyən edib, digər beynəlxlaq qurumların da fəaliyyətinə son verməyə çalışmalıyıq. Çünki beynəlxlaq maliyyə qurumları bir qədər siyasi proseslərdən uzaq olur. Məsələnin mahiyyəti onlara tam çatdırılanda, onlar maksimum dərəcədə reputasiyalarını qorumaqda maraqlı olurlar. İstəməzlər ki, adları çirkli işlərdə hallansın”.
Məhəmmədəli QƏRİBLİ
