“Bu həm də o deməkdir ki, Köçəryana güzəşt olmayacaq”
Məlum olduğu kimi, Ermənistanın sabiq prezidenti Robert Köçəryan yenidən həsb edilib. Apellyasiya məhkəməsi İrəvan məhkəməsinin 18 mayda Köçəryanın zaminlə azadlığa buraxılması haqqında qərarını ləğv edib və onun yenidən həbs edilməsi barədə qərar çıxarıb. Bu arada Ermənistanın baş prokuroru Artur Davtyan Rusiyanın bu ölkədəki səfiri Sergey Kopırkinlə görüşüb. Erməni mətbuatının yaydığı məlumata görə, görüşdə Davtyan və Kopırkin iki ölkə arasında hüquqi sahədə əlaqələrin, eləcə də Ermənistan və Rusiyanın prokurorluq orqanları arasında ikitərəfli və çoxtərəfli formatlar çərçivəsində əməkdaşlığın yüksək səviyyədə olduğunu qeyd ediblər. Burada diqqəti çəkən məqam odur ki, görüşdə Davtyan qanunsuz yolla əldə edilmiş əmlakın müsadirə edilməsi və Ermənistandan çıxarılan malların qaytarılması üçün institusional mexanizmlərin işlənməsinin vacibliyini vurğulayıb. Baş Prokurorun fikrincə, bu, korrupsiya hallarının araşdırılması və qanunsuz zənginləşmənin qarşısının alınması üzrə cinayət işinin istintaqının effektivliyinin artırılmasına kömək edəcək. Davityan onu da qeyd edib ki, beynəlxalq əməkdaşlıq sahəsində Ermənistandan qanunsuz yolla çıxarılan əmlakın qaytarılması, Ermənistan və digər ölkələrin məhkəmə qərarlarının qarşılıqlı tanınması məsələlərini həll etmək üçün tədbirlər görüləcək. Bütün bunlar onu göstərir ki, Ermənistanın baş prokuroru baltanı dibdən vurdu. Çox güman ki, səfirin məhz belə bir vaxtda baş prokurorla görüşməsi Köçəryanla bağlıdır. Yəqin ki, səfir sabiq prezidentin azadlığa buraxılmasını xahiş edib. Nəzərə almaq lazımdır ki, Köçəryanı prokurorluq tutdurdu. Ancaq Davityanın görüşdə ölkədən çıxarılmış əmlakın geri qaytarılması mexanizmini qabartması onu göstərir ki, məsələ çox ciddidir. Bu o deməkdir ki, Köçəryan klanının qanunsuz olaraq Ermənistandan çıxarıb Rusiyaya yerləşdirdiyi əmlak geri qaytarılmalıdır. Faktiki olaraq Davityan Rusiya səfirinə bildirib ki, sözügedən məsələdə güzəşt olmayacaq. O baxımdan bunu ekspertlər necə dəyərləndirir?
Məsələyə münasibət bildirən VİP-in sədr müavini Ramil Hüseynovun sözlərinə görə, son proseslər onu göstərir ki, Paşinyan Köçəryanın həbsdə saxlanması məsələsində qərarlıdır: “Baxmayaraq ki, Rusiya bu məsələdə Paşinyan hakimiyyətinə güclü təzyiq göstərir. Ancaq Paşinyan görür ki, Köçəryan siyasi arenada qalsa onun axırına çıxacaq. Bu səbəbdən bütün vasitələri işə salaraq sona qədər getmək istəyir. Çünki baş prokurorun ölkədən qanunsuz olaraq çıxarılan əmlakın geri qaytarılması məsələsini qaldırması o deməkdir ki, Rusiya buna mane olmamalıdır. Hər kəsə bəllidir ki, “Qarabağ klanı” Rusiyaya stavka edir. İyirmi il hakimiyyətdə olan bu klan ölkədən çıxarılan əmlakı, vəsaitləri Rusiyaya yerləşdirib. Belə görünür ki, ölkədən çox böyük həcmdə vəsait qanunsuz olaraq çıxarılıb. Bu minvalla Paşinyan Köçəryanın həbsdə qalma müddətini uzatmağa və ən başlıcası, onu siyasi səhnədə neytrallaşdırmağa çalışır. Çox güman ki, bundan sonra Rusiya-Ermənistan siyasi münasibətləri bir az da pisləşəcək. Davityanın məlum açıqlaması o deməkdir ki, Köçəryana güzəşt olmayacaq”.
Vidadi ORDAHALLI
