Erməni mediasının verdiyi məlumata görə, sabiq prezident Robert Köçəryan yenidən həbs edilib. Bu barədə Ermənistan Apellyasiya Məhkəməsi qərar verib. Apellyasiya məhkəməsi İrəvan məhkəməsinin 18 mayda Köçəryanın zaminlə azadlığa buraxılması haqqında qərarını ləğv edib və onun yenidən həbs edilməsi barədə qərar çıxarıb. Bununla məhkəmə baş prokurorluğun verdiyi protesti təmin etmiş olub. Sabiq prezidentin qərara etiraz üçün 15 gün vaxtı var.
Qeyd edək ki, Köçəryan separatçı Qarabağ rejiminin indiki və keçmiş “prezidentləri” Bako Saakyan və Arkadi Qukasyanın zəmanətilə azadlığa buraxılmışdı. O, 2008-ci il 1-2 mart hadisələrində hakimiyyəti devirməkdə ittiham edilir. Həmin hadisələrdə 10 nəfər ölmüş, 230 nəfər yaralanmışdı. Bəllidir ki, Köçəryanın həbsi, sonra azadlığa buraxılması Ermənistan daxilində ciddi qarşıdurmaya səbəb olub. İddialara görə, onun yenidən həbs edilməsi “DQR”- lə Ermənistan rəhbərliyinin onsuz da gərgin olan münasibətlərini daha da alovlandırcaq. Bu iddianı nə dərəcədə əsaslı saymaq olar? Siyasi elmlər doktoru Hatəm Cabbarlı “Bakı-Xəbər”ə bildirdi ki, bu vəziyyət Ermənistandakı daxili gərginliyi bir qədər də artıracaq: “Rusiyanın Ermənistandakı səfirinin Robert Köçəryanla görüşməsindən sonra hakimiyyət hadisələrə nəzarəti itirdiyini gördü. Buna görə də, Nikol Paşinyan məhkəmə-hüquq sistemi üzərindəki təzyiqlərini bir qədər də artırdı. Bunun nəticəsində o, Köçəryanın yenidən həbsinə nail ola bildi. Əslində Köçəryanın qondarma “DQR”in indiki və sabiq “prezidentləri” tərəfindən zaminə götürülüb azadlığa buraxılması belə qanunsuz idi. Çünki belə ciddi ittihamla həbs edilən sabiq prezidentin azad edilməsi hüquqi deyil, siyasi təzyiq mahiyyəti daşıyırdı. Köçəryanın yenidən həbsə salınması gözlənilən idi. Bu addım Ermənistanın daxilində Paşinyanın mövqelərinin güclənməsinə xidmət edir. Eyni zamanda bu, Rusiyanın Robert Köçəryan kartı ilə oynamasının qarşısını ala bilir. Güman edirəm ki, Robert Köçəryanın bu dəfə azadlığa çıxmaq şansı olmayacaq. Ona elan edilən ittihamlar üzrə cəza təyin olunacaq. Köçəryan faktoru artıq ölkə sərhədlərini də aşır. Burda ilk ağıla gələn Avropanın insan haqları təşkilatlarının təpkisi ola bilərdi. Amma biz görürük ki, həmin qurumlar susqun mövqe tutur. Nəzərə çarpan odur ki, bu məsələyə daha çox Rusiya diqqət ayırır. Rusiyanın rəsmi nümayəndəsi olan səfirin Köçəryan və Baş prokurorla təkbətək görüşməsi onun bu məsələdəki çabaları və narahatlığından xəbər verir. Hətta kənardan Rusiya Röbert Köçəyanın vəkilliyini edirmiş kimi durumda olması təsirini bağışlayır. Təbiidir ki, Rusiya “DQR” kartı ilə hadisələrə təsir etməyə çalışacaq. Bu da Paşinyanla “DQR” rəhbərliyi arasındakı gərginliyi daha da qızışdıracaq. Rusiya onun əlindən alınan “kartı” asanlıqla Paşinyana təslim etməyi düşünmür”.
Məhəmmədəli QƏRİBLİ
